Gyaandweep | Atharva Veda , Kanda 5, Sukta 22

अग्निस्तक्मानमप बाधतामितः सोमो ग्रावा वरुणः पूतदक्षाः ।वेदिर्बर्हिः समिधः शोशुचाना अप द्वेषांस्यमुया भवन्तु ॥१॥

agnistakmānamapa bādhatāmitaḥ somo grāvā varuṇaḥ pūtadakṣāḥ |vedirbarhiḥ samidhaḥ śośucānā apa dveṣāṃsyamuyā bhavantu ||1||

अयं यो विश्वान् हरितान् कृणोष्युच्छोचयन्न् अग्निरिवाभिदुन्वन् ।अधा हि तक्मन्न् अरसो हि भूया अधा न्यङ्ङधरान् वा परेहि ॥२॥

ayaṃ yo viśvān haritān kṛṇoṣyucchocayann agnirivābhidunvan |adhā hi takmann araso hi bhūyā adhā nyaṅṅadharān vā parehi ||2||

यः परुषः पारुषेयोऽवध्वंस इवारुणः ।तक्मानं विश्वधावीर्याधराञ्चं परा सुवा ॥३॥

yaḥ paruṣaḥ pāruṣeyo'vadhvaṃsa ivāruṇaḥ |takmānaṃ viśvadhāvīryādharāñcaṃ parā suvā ||3||

अधराञ्चं प्र हिणोमि नमः कृत्वा तक्मने ।शकम्भरस्य मुष्टिहा पुनरेतु महावृषान् ॥४॥

adharāñcaṃ pra hiṇomi namaḥ kṛtvā takmane |śakambharasya muṣṭihā punaretu mahāvṛṣān ||4||

ओको अस्य मूजवन्त ओको अस्य महावृषाः ।यावज्जातस्तक्मंस्तावान् असि बल्हिकेषु न्योचरः ॥५॥

oko asya mūjavanta oko asya mahāvṛṣāḥ |yāvajjātastakmaṃstāvān asi balhikeṣu nyocaraḥ ||5||

तक्मन् व्याल वि गद व्यङ्ग भूरि यावय ।दासीं निष्टक्वरीमिच्छ तां वज्रेण समर्पय ॥६॥

takman vyāla vi gada vyaṅga bhūri yāvaya |dāsīṃ niṣṭakvarīmiccha tāṃ vajreṇa samarpaya ||6||

तक्मन् मूजवतो गच्छ बल्हिकान् वा परस्तराम् ।शूद्रामिच्छ प्रफर्व्यं तां तक्मन् वीव धूनुहि ॥७॥

takman mūjavato gaccha balhikān vā parastarām |śūdrāmiccha prapharvyaṃ tāṃ takman vīva dhūnuhi ||7||

महावृषान् मूजवतो बन्ध्वद्धि परेत्य ।प्रैतानि तक्मने ब्रूमो अन्यक्षेत्राणि वा इमा ॥८॥

mahāvṛṣān mūjavato bandhvaddhi paretya |praitāni takmane brūmo anyakṣetrāṇi vā imā ||8||

अन्यक्षेत्रे न रमसे वशी सन् मृडयासि नः ।अभूदु प्रार्थस्तक्मा स गमिष्यति बल्हिकान् ॥९॥

anyakṣetre na ramase vaśī san mṛḍayāsi naḥ |abhūdu prārthastakmā sa gamiṣyati balhikān ||9||

यत्त्वं शीतोऽथो रूरः सह कासावेपयः ।भीमास्ते तक्मन् हेतयस्ताभिः स्म परि वृङ्ग्धि नः ॥१०॥

yattvaṃ śīto'tho rūraḥ saha kāsāvepayaḥ |bhīmāste takman hetayastābhiḥ sma pari vṛṅgdhi naḥ ||10||

मा स्मैतान्त्सखीन् कुरुथा बलासं कासमुद्युगम् ।मा स्मातोऽर्वाङैः पुनस्तत्त्वा तक्मन्न् उप ब्रुवे ॥११॥

mā smaitāntsakhīn kuruthā balāsaṃ kāsamudyugam |mā smāto'rvāṅaiḥ punastattvā takmann upa bruve ||11||

तक्मन् भ्रात्रा बलासेन स्वस्रा कासिकया सह ।पाप्मा भ्रातृव्येण सह गछामुमरणं जनम् ॥१२॥

takman bhrātrā balāsena svasrā kāsikayā saha |pāpmā bhrātṛvyeṇa saha gachāmumaraṇaṃ janam ||12||

तृतीयकं वितृतीयं सदन्दिमुत शारदम् ।तक्मानं शीतं रूरं ग्रैष्मं नाशय वार्षिकम् ॥१३॥

tṛtīyakaṃ vitṛtīyaṃ sadandimuta śāradam |takmānaṃ śītaṃ rūraṃ graiṣmaṃ nāśaya vārṣikam ||13||

गन्धारिभ्यो मूजवद्भ्योऽङ्गेभ्यो मगधेभ्यः ।प्रैष्यन् जनमिव शेवधिं तक्मानं परि दद्मसि ॥१४॥

gandhāribhyo mūjavadbhyo'ṅgebhyo magadhebhyaḥ |praiṣyan janamiva śevadhiṃ takmānaṃ pari dadmasi ||14||

Languages