Gyaandweep | Atharva Veda , Kanda 6, Sukta 133

य इमां देवो मेखलामाबबन्ध यः संननाह य उ नो युयोज ।यस्य देवस्य प्रशिषा चरामः स पारमिछात्स उ नो वि मुञ्चात्॥१॥

ya imāṃ devo mekhalāmābabandha yaḥ saṃnanāha ya u no yuyoja |yasya devasya praśiṣā carāmaḥ sa pāramichātsa u no vi muñcāt||1||

आहुतास्यभिहुत ऋषीणामस्यायुधम् ।पूर्वा व्रतस्य प्राश्नती वीरघ्नी भव मेखले ॥२॥

āhutāsyabhihuta ṛṣīṇāmasyāyudham |pūrvā vratasya prāśnatī vīraghnī bhava mekhale ||2||

मृत्योरहं ब्रह्मचारी यदस्मि निर्याचन् भूतात्पुरुषं यमाय ।तमहं ब्रह्मणा तपसा श्रमेणानयैनं मेखलया सिनामि ॥३॥

mṛtyorahaṃ brahmacārī yadasmi niryācan bhūtātpuruṣaṃ yamāya |tamahaṃ brahmaṇā tapasā śrameṇānayainaṃ mekhalayā sināmi ||3||

श्रद्धाया दुहिता तपसोऽधि जाता स्वसा ऋषीणां भूतकृतां बभूव ।सा नो मेखले मतिमा धेहि मेधामथो नो धेहि तप इन्द्रियं च ॥४॥

śraddhāyā duhitā tapaso'dhi jātā svasā ṛṣīṇāṃ bhūtakṛtāṃ babhūva |sā no mekhale matimā dhehi medhāmatho no dhehi tapa indriyaṃ ca ||4||

यां त्वा पूर्वे भूतकृत ऋषयः परिबेधिरे ।सा त्वं परि ष्वजस्व मां दीर्घायुत्वाय मेखले ॥५॥

yāṃ tvā pūrve bhūtakṛta ṛṣayaḥ paribedhire |sā tvaṃ pari ṣvajasva māṃ dīrghāyutvāya mekhale ||5||

Languages