Gyaandweep | Atharva Veda , Kanda 7, Sukta 109

इदमुग्राय बभ्रवे नमो यो अक्षेषु तनूवशी ।घृतेन कलिं शिक्षामि स नो मृडातीदृशे ॥१॥

idamugrāya babhrave namo yo akṣeṣu tanūvaśī |ghṛtena kaliṃ śikṣāmi sa no mṛḍātīdṛśe ||1||

घृतमप्सराभ्यो वह त्वमग्ने पांसून् अक्षेभ्यः सिकता अपश्च ।यथाभागं हव्यदातिं जुषाणा मदन्ति देवा उभयानि हव्या ॥२॥

ghṛtamapsarābhyo vaha tvamagne pāṃsūn akṣebhyaḥ sikatā apaśca |yathābhāgaṃ havyadātiṃ juṣāṇā madanti devā ubhayāni havyā ||2||

अप्सरसः सधमादं मदन्ति हविर्धानमन्तरा सूर्यं च ।ता मे हस्तौ सं सृजन्तु घृतेन सपत्नं मे कितवं रन्धयन्तु ॥३॥

apsarasaḥ sadhamādaṃ madanti havirdhānamantarā sūryaṃ ca |tā me hastau saṃ sṛjantu ghṛtena sapatnaṃ me kitavaṃ randhayantu ||3||

आदिनवं प्रतिदीव्ने घृतेनास्मामभि क्षर ।वृक्षमिवाशन्या जहि यो अस्मान् प्रतिदीव्यति ॥४॥

ādinavaṃ pratidīvne ghṛtenāsmāmabhi kṣara |vṛkṣamivāśanyā jahi yo asmān pratidīvyati ||4||

यो नो द्युवे धनमिदं चकार यो अक्षाणां ग्लहनं शेषणं च ।स नो देवो हविरिदं जुषाणो गन्धर्वेभिः सधमादं मदेम ॥५॥

yo no dyuve dhanamidaṃ cakāra yo akṣāṇāṃ glahanaṃ śeṣaṇaṃ ca |sa no devo haviridaṃ juṣāṇo gandharvebhiḥ sadhamādaṃ madema ||5||

संवसव इति वो नामधेयमुग्रंपश्या राष्ट्रभृतो ह्यक्षाः ।तेभ्यो व इन्दवो हविषा विधेम वयं स्याम पतयो रयीणाम् ॥६॥

saṃvasava iti vo nāmadheyamugraṃpaśyā rāṣṭrabhṛto hyakṣāḥ |tebhyo va indavo haviṣā vidhema vayaṃ syāma patayo rayīṇām ||6||

देवान् यन् नाथितो हुवे ब्रह्मचर्यं यदूषिम ।अक्षान् यद्बभ्रून् आलभे ते नो मृडन्त्वीदृशे ॥७॥

devān yan nāthito huve brahmacaryaṃ yadūṣima |akṣān yadbabhrūn ālabhe te no mṛḍantvīdṛśe ||7||

Languages