Gyaandweep | Atharva Veda , Kanda 7, Sukta 26

विष्णोर्नु कं प्रा वोचं वीर्याणि यः पार्थिवानि विममे रजांसि ।यो अस्कभायदुत्तरं सधस्थं विचक्रमाणस्त्रेधोरुगायः ॥१॥

viṣṇornu kaṃ prā vocaṃ vīryāṇi yaḥ pārthivāni vimame rajāṃsi |yo askabhāyaduttaraṃ sadhasthaṃ vicakramāṇastredhorugāyaḥ ||1||

प्र तद्विष्णु स्तवते वीर्याणि मृगो न भीमः कुचरो गिरिष्ठाः ।परावत आ जगम्यात्परस्याः ॥२॥

pra tadviṣṇu stavate vīryāṇi mṛgo na bhīmaḥ kucaro giriṣṭhāḥ |parāvata ā jagamyātparasyāḥ ||2||

यस्योरुषु त्रिषु विक्रमनेष्वधिक्षियन्ति भुवनानि विश्वा ।उरु विष्णो वि क्रमस्वोरु क्षयाय नस्कृधि ।घृतं घृतयोने पिब प्रप्र यज्ञपतिं तिर ॥३॥

yasyoruṣu triṣu vikramaneṣvadhikṣiyanti bhuvanāni viśvā |uru viṣṇo vi kramasvoru kṣayāya naskṛdhi |ghṛtaṃ ghṛtayone piba prapra yajñapatiṃ tira ||3||

इदं विष्णुर्वि चक्रमे त्रेधा नि दधे पदा ।समूढमस्य पंसुरे ॥४॥

idaṃ viṣṇurvi cakrame tredhā ni dadhe padā |samūḍhamasya paṃsure ||4||

त्रीणि पदा वि चक्रमे विष्णुर्गोपा अदाभ्यः ।इतो धर्माणि धारयन् ॥५॥

trīṇi padā vi cakrame viṣṇurgopā adābhyaḥ |ito dharmāṇi dhārayan ||5||

विष्णोः कर्माणि पश्यत यतो व्रतानि पस्पशे ।इन्द्रस्य युज्यः सखा ॥६॥

viṣṇoḥ karmāṇi paśyata yato vratāni paspaśe |indrasya yujyaḥ sakhā ||6||

तद्विष्णोः परमं पदं सदा पश्यन्ति सूरयः ।दिवीव चक्षुराततम् ॥७॥

tadviṣṇoḥ paramaṃ padaṃ sadā paśyanti sūrayaḥ |divīva cakṣurātatam ||7||

दिवो विष्ण उत पृथिव्या महो विष्ण उरोरन्तरिक्षात्।हस्तौ पृणस्व बहुभिर्वसव्यैराप्रयच्छ दक्षिणादोत सव्यात्॥८॥

divo viṣṇa uta pṛthivyā maho viṣṇa urorantarikṣāt|hastau pṛṇasva bahubhirvasavyairāprayaccha dakṣiṇādota savyāt||8||

Languages