Gyaandweep | Atharva Veda , Kanda 7, Sukta 5

यज्ञेन यज्ञमयजन्त देवास्तानि धर्माणि प्रथमान्यासन् ।ते ह नाकं महिमानः सचन्त यत्र पूर्वे साध्याः सन्ति देवाः ॥१॥

yajñena yajñamayajanta devāstāni dharmāṇi prathamānyāsan |te ha nākaṃ mahimānaḥ sacanta yatra pūrve sādhyāḥ santi devāḥ ||1||

यज्ञो बभूव स आ बभूव स प्र जज्ञे स उ वावृधे पुनः ।स देवानामधिपतिर्बभूव सो अस्मासु द्रविणमा दधातु ॥२॥

yajño babhūva sa ā babhūva sa pra jajñe sa u vāvṛdhe punaḥ |sa devānāmadhipatirbabhūva so asmāsu draviṇamā dadhātu ||2||

यद्देवा देवान् हविषाऽयजन्तामर्त्यान् मनसा मर्त्येन ।मदेम तत्र परमे व्योमन् पश्येम तदुदितौ सूर्यस्य ॥३॥

yaddevā devān haviṣā'yajantāmartyān manasā martyena |madema tatra parame vyoman paśyema taduditau sūryasya ||3||

यत्पुरुषेण हविषा यज्ञं देवा अतन्वत ।अस्ति नु तस्मादोजीयो यद्विहव्येनेजिरे ॥४॥

yatpuruṣeṇa haviṣā yajñaṃ devā atanvata |asti nu tasmādojīyo yadvihavyenejire ||4||

मुग्धा देवा उत शुनाऽयजन्तोत गोरङ्गैः पुरुधाऽयजन्त ।य इमं यज्ञं मनसा चिकेत प्र णो वोचस्तमिहेह ब्रवः ॥५॥

mugdhā devā uta śunā'yajantota goraṅgaiḥ purudhā'yajanta |ya imaṃ yajñaṃ manasā ciketa pra ṇo vocastamiheha bravaḥ ||5||

Languages