Gyaandweep | Atharva Veda , Kanda 7, Sukta 70

यत्किं चासौ मनसा यच्च वाचा यज्ञैर्जुहोति हविषा यजुषा ।तन् मृत्युना निर्ऋतिः संविदाना पुरा सत्यादाहुतिं हन्त्वस्य ॥१॥

yatkiṃ cāsau manasā yacca vācā yajñairjuhoti haviṣā yajuṣā |tan mṛtyunā nirṛtiḥ saṃvidānā purā satyādāhutiṃ hantvasya ||1||

यातुधाना निर्ऋतिरादु रक्षस्ते अस्य घ्नन्त्वनृतेन सत्यम् ।इन्द्रेषिता देवा आजमस्य मथ्नन्तु मा तत्सं पादि यदसौ जुहोति ॥२॥

yātudhānā nirṛtirādu rakṣaste asya ghnantvanṛtena satyam |indreṣitā devā ājamasya mathnantu mā tatsaṃ pādi yadasau juhoti ||2||

अजिराधिराजौ श्येनौ संपातिनाविव ।आज्यं पृतन्यतो हतां यो नः कश्चाभ्यघायति ॥३॥

ajirādhirājau śyenau saṃpātināviva |ājyaṃ pṛtanyato hatāṃ yo naḥ kaścābhyaghāyati ||3||

अपाञ्चौ त उभौ बाहू अपि नह्याम्यास्यम् ।अग्नेर्देवस्य मन्युना तेन तेऽवधिषं हविः ॥४॥

apāñcau ta ubhau bāhū api nahyāmyāsyam |agnerdevasya manyunā tena te'vadhiṣaṃ haviḥ ||4||

अपि नह्यामि ते बाहू अपि नह्याम्यास्यम् ।अग्नेर्घोरस्य मन्युना तेनऽवधिषं हविः ॥५॥

api nahyāmi te bāhū api nahyāmyāsyam |agnerghorasya manyunā tena'vadhiṣaṃ haviḥ ||5||

Languages