Gyaandweep | Atharva Veda , Kanda 7, Sukta 76

आ सुस्रसः सुस्रसो असतीभ्यो असत्तराः ।सेहोररसतरा हवणाद्विक्लेदीयसीः ॥१॥

ā susrasaḥ susraso asatībhyo asattarāḥ |sehorarasatarā havaṇādvikledīyasīḥ ||1||

या ग्रैव्या अपचितोऽथो या उपपक्ष्याः ।विजाम्नि या अपचितः स्वयंस्रसः ॥२॥

yā graivyā apacito'tho yā upapakṣyāḥ |vijāmni yā apacitaḥ svayaṃsrasaḥ ||2||

यः कीकसाः प्रशृणाति तलीद्यमवतिष्ठति ।निर्हास्तं सर्वं जायान्यं यः कश्च ककुदि श्रितः ॥३॥

yaḥ kīkasāḥ praśṛṇāti talīdyamavatiṣṭhati |nirhāstaṃ sarvaṃ jāyānyaṃ yaḥ kaśca kakudi śritaḥ ||3||

पक्षी जायान्यः पतति स आ विशति पूरुषम् ।तदक्षितस्य भेषजमुभयोः सुक्षतस्य च ॥४॥

pakṣī jāyānyaḥ patati sa ā viśati pūruṣam |tadakṣitasya bheṣajamubhayoḥ sukṣatasya ca ||4||

विद्म वै ते जायान्य जानं यतो जायान्य जायसे ।कथं ह तत्र त्वं हनो यस्य कृण्मो हविर्गृहे ॥५॥

vidma vai te jāyānya jānaṃ yato jāyānya jāyase |kathaṃ ha tatra tvaṃ hano yasya kṛṇmo havirgṛhe ||5||

धृषत्पिब कलशे सोममिन्द्र वृत्रहा शूर समरे वसूनाम् ।माध्यन्दिने सवन आ वृषस्व रयिष्ठानो रयिमस्मासु धेहि ॥६॥

dhṛṣatpiba kalaśe somamindra vṛtrahā śūra samare vasūnām |mādhyandine savana ā vṛṣasva rayiṣṭhāno rayimasmāsu dhehi ||6||

Languages