Gyaandweep | Atharva Veda , Kanda 7, Sukta 83

अप्सु ते राजन् वरुण गृहो हिरण्ययो मितः ।ततो धृतव्रतो राजा सर्वा धामानि मुञ्चतु ॥१॥

apsu te rājan varuṇa gṛho hiraṇyayo mitaḥ |tato dhṛtavrato rājā sarvā dhāmāni muñcatu ||1||

दाम्नोदाम्नो राजन्न् इतो वरुण मुञ्च नः ।यदापो अघ्न्या इति वरुणेति यदूचिम ततो वरुण मुञ्च नः ॥२॥

dāmnodāmno rājann ito varuṇa muñca naḥ |yadāpo aghnyā iti varuṇeti yadūcima tato varuṇa muñca naḥ ||2||

उदुत्तमं वरुण पाशमस्मदवाधमं वि मध्यमं श्रथाय ।अधा वयमादित्य व्रते तवानागसो अदितये स्याम ॥३॥

uduttamaṃ varuṇa pāśamasmadavādhamaṃ vi madhyamaṃ śrathāya |adhā vayamāditya vrate tavānāgaso aditaye syāma ||3||

प्रास्मत्पाशान् वरुण मुञ्च सर्वान् य उत्तमा अधमा वारुणा ये ।दुष्वप्न्यं दुरितं नि ष्वास्मदथ गछेम सुकृतस्य लोकम् ॥४॥

prāsmatpāśān varuṇa muñca sarvān ya uttamā adhamā vāruṇā ye |duṣvapnyaṃ duritaṃ ni ṣvāsmadatha gachema sukṛtasya lokam ||4||

Languages