Gyaandweep | Mahabharatam - आदि पर्व

Shloka 1

नारद उवाच॥

शृणु मे विस्तरेणेममितिहासं पुरातनम् । भ्रातृभीः सहितः पार्थ यथावृत्तं युधिष्ठिर ॥१॥

śṛṇu me vistareṇemamitihāsaṃ purātanam . bhrātṛbhīḥ sahitaḥ pārtha yathāvṛttaṃ yudhiṣṭhira ..1..

Shloka 2

महासुरस्यान्ववाये हिरण्यकशिपोः पुरा । निकुम्भो नाम दैत्येन्द्रस्तेजस्वी बलवानभूत् ॥२॥

mahāsurasyānvavāye hiraṇyakaśipoḥ purā . nikumbho nāma daityendrastejasvī balavānabhūt ..2..

Shloka 3

तस्य पुत्रौ महावीर्यौ जातौ भीमपराक्रमौ । सहान्योन्येन भुञ्जाते विनान्योन्यं न गच्छतः ॥३॥

tasya putrau mahāvīryau jātau bhīmaparākramau . sahānyonyena bhuñjāte vinānyonyaṃ na gacchataḥ ..3..

Shloka 4

अन्योन्यस्य प्रियकरावन्योन्यस्य प्रियंवदौ । एकशीलसमाचारौ द्विधैवैकं यथा कृतौ ॥४॥

anyonyasya priyakarāvanyonyasya priyaṃvadau . ekaśīlasamācārau dvidhaivaikaṃ yathā kṛtau ..4..

Shloka 5

तौ विवृद्धौ महावीर्यौ कार्येष्वप्येकनिश्चयौ । त्रैलोक्यविजयार्थाय समास्थायैकनिश्चयम् ॥५॥

tau vivṛddhau mahāvīryau kāryeṣvapyekaniścayau . trailokyavijayārthāya samāsthāyaikaniścayam ..5..

Shloka 6

कृत्वा दीक्षां गतौ विन्ध्यं तत्रोग्रं तेपतुस्तपः । तौ तु दीर्घेण कालेन तपोयुक्तौ बभूवतुः ॥६॥

kṛtvā dīkṣāṃ gatau vindhyaṃ tatrograṃ tepatustapaḥ . tau tu dīrgheṇa kālena tapoyuktau babhūvatuḥ ..6..

Shloka 7

क्षुत्पिपासापरिश्रान्तौ जटावल्कलधारिणौ । मलोपचितसर्वाङ्गौ वायुभक्षौ बभूवतुः ॥७॥

kṣutpipāsāpariśrāntau jaṭāvalkaladhāriṇau . malopacitasarvāṅgau vāyubhakṣau babhūvatuḥ ..7..

Shloka 8

आत्ममांसानि जुह्वन्तौ पादाङ्गुष्ठाग्रधिष्ठितौ । ऊर्ध्वबाहू चानिमिषौ दीर्घकालं धृतव्रतौ ॥८॥

ātmamāṃsāni juhvantau pādāṅguṣṭhāgradhiṣṭhitau . ūrdhvabāhū cānimiṣau dīrghakālaṃ dhṛtavratau ..8..

Shloka 9

तयोस्तपःप्रभावेण दीर्घकालं प्रतापितः । धूमं प्रमुमुचे विन्ध्यस्तदद्भुतमिवाभवत् ॥९॥

tayostapaḥprabhāveṇa dīrghakālaṃ pratāpitaḥ . dhūmaṃ pramumuce vindhyastadadbhutamivābhavat ..9..

Shloka 10

ततो देवाभवन्भीता उग्रं दृष्ट्वा तयोस्तपः । तपोविघातार्थमथो देवा विघ्नानि चक्रिरे ॥१०॥

tato devābhavanbhītā ugraṃ dṛṣṭvā tayostapaḥ . tapovighātārthamatho devā vighnāni cakrire ..10..

Shloka 11

रत्नैः प्रलोभयामासुः स्त्रीभिश्चोभौ पुनः पुनः । न च तौ चक्रतुर्भङ्गं व्रतस्य सुमहाव्रतौ ॥११॥

ratnaiḥ pralobhayāmāsuḥ strībhiścobhau punaḥ punaḥ . na ca tau cakraturbhaṅgaṃ vratasya sumahāvratau ..11..

Shloka 12

अथ मायां पुनर्देवास्तयोश्चक्रुर्महात्मनोः । भगिन्यो मातरो भार्यास्तयोः परिजनस्तथा ॥१२॥

atha māyāṃ punardevāstayoścakrurmahātmanoḥ . bhaginyo mātaro bhāryāstayoḥ parijanastathā ..12..

Shloka 13

परिपात्यमाना वित्रस्ताः शूलहस्तेन रक्षसा । स्रस्ताभरणकेशान्ता एकान्तभ्रष्टवाससः ॥१३॥

paripātyamānā vitrastāḥ śūlahastena rakṣasā . srastābharaṇakeśāntā ekāntabhraṣṭavāsasaḥ ..13..

Shloka 14

अभिधाव्य ततः सर्वास्तौ त्राहीति विचुक्रुशुः । न च तौ चक्रतुर्भङ्गं व्रतस्य सुमहाव्रतौ ॥१४॥

abhidhāvya tataḥ sarvāstau trāhīti vicukruśuḥ . na ca tau cakraturbhaṅgaṃ vratasya sumahāvratau ..14..

Shloka 15

यदा क्षोभं नोपयाति नार्तिमन्यतरस्तयोः । ततः स्त्रियस्ता भूतं च सर्वमन्तरधीयत ॥१५॥

yadā kṣobhaṃ nopayāti nārtimanyatarastayoḥ . tataḥ striyastā bhūtaṃ ca sarvamantaradhīyata ..15..

Shloka 16

ततः पितामहः साक्षादभिगम्य महासुरौ । वरेण छन्दयामास सर्वलोकपितामहः ॥१६॥

tataḥ pitāmahaḥ sākṣādabhigamya mahāsurau . vareṇa chandayāmāsa sarvalokapitāmahaḥ ..16..

Shloka 17

ततः सुन्दोपसुन्दौ तौ भ्रातरौ दृढविक्रमौ । दृष्ट्वा पितामहं देवं तस्थतुः प्राञ्जली तदा ॥१७॥

tataḥ sundopasundau tau bhrātarau dṛḍhavikramau . dṛṣṭvā pitāmahaṃ devaṃ tasthatuḥ prāñjalī tadā ..17..

Shloka 18

ऊचतुश्च प्रभुं देवं ततस्तौ सहितौ तदा । आवयोस्तपसानेन यदि प्रीतः पितामहः ॥१८॥

ūcatuśca prabhuṃ devaṃ tatastau sahitau tadā . āvayostapasānena yadi prītaḥ pitāmahaḥ ..18..

Shloka 19

मायाविदावस्त्रविदौ बलिनौ कामरूपिणौ । उभावप्यमरौ स्यावः प्रसन्नो यदि नौ प्रभुः ॥१९॥

māyāvidāvastravidau balinau kāmarūpiṇau . ubhāvapyamarau syāvaḥ prasanno yadi nau prabhuḥ ..19..

Shloka 20

पितामह उवाच॥

ऋतेऽमरत्वमन्यद्वां सर्वमुक्तं भविष्यति । अन्यद्वृणीतां मृत्योश्च विधानममरैः समम् ॥२०॥

ṛte'maratvamanyadvāṃ sarvamuktaṃ bhaviṣyati . anyadvṛṇītāṃ mṛtyośca vidhānamamaraiḥ samam ..20..

Shloka 21

करिष्यावेदमिति यन्महदभ्युत्थितं तपः । युवयोर्हेतुनानेन नामरत्वं विधीयते ॥२१॥

kariṣyāvedamiti yanmahadabhyutthitaṃ tapaḥ . yuvayorhetunānena nāmaratvaṃ vidhīyate ..21..

Shloka 22

त्रैलोक्यविजयार्थाय भवद्भ्यामास्थितं तपः । हेतुनानेन दैत्येन्द्रौ न वां कामं करोम्यहम् ॥२२॥

trailokyavijayārthāya bhavadbhyāmāsthitaṃ tapaḥ . hetunānena daityendrau na vāṃ kāmaṃ karomyaham ..22..

Shloka 23

सुन्दोपसुन्दावूचतुः॥

त्रिषु लोकेषु यद्भूतं किञ्चित्स्थावरजङ्गमम् । सर्वस्मान्नौ भयं न स्यादृतेऽन्योन्यं पितामह ॥२३॥

triṣu lokeṣu yadbhūtaṃ kiñcitsthāvarajaṅgamam . sarvasmānnau bhayaṃ na syādṛte'nyonyaṃ pitāmaha ..23..

Shloka 24

पितामह उवाच॥

यत्प्रार्थितं यथोक्तं च काममेतद्ददानि वाम् । मृत्योर्विधानमेतच्च यथावद्वां भविष्यति ॥२४॥

yatprārthitaṃ yathoktaṃ ca kāmametaddadāni vām . mṛtyorvidhānametacca yathāvadvāṃ bhaviṣyati ..24..

Shloka 25

नारद उवाच॥

ततः पितामहो दत्त्वा वरमेतत्तदा तयोः । निवर्त्य तपसस्तौ च ब्रह्मलोकं जगाम ह ॥२५॥

tataḥ pitāmaho dattvā varametattadā tayoḥ . nivartya tapasastau ca brahmalokaṃ jagāma ha ..25..

Shloka 26

लब्ध्वा वराणि सर्वाणि दैत्येन्द्रावपि तावुभौ । अवध्यौ सर्वलोकस्य स्वमेव भवनं गतौ ॥२६॥

labdhvā varāṇi sarvāṇi daityendrāvapi tāvubhau . avadhyau sarvalokasya svameva bhavanaṃ gatau ..26..

Shloka 27

तौ तु लब्धवरौ दृष्ट्वा कृतकामौ महासुरौ । सर्वः सुहृज्जनस्ताभ्यां प्रमोदमुपजग्मिवान् ॥२७॥

tau tu labdhavarau dṛṣṭvā kṛtakāmau mahāsurau . sarvaḥ suhṛjjanastābhyāṃ pramodamupajagmivān ..27..

Shloka 28

ततस्तौ तु जटा हित्वा मौलिनौ सम्बभूवतुः । महार्हाभरणोपेतौ विरजोम्बरधारिणौ ॥२८॥

tatastau tu jaṭā hitvā maulinau sambabhūvatuḥ . mahārhābharaṇopetau virajombaradhāriṇau ..28..

Shloka 29

अकालकौमुदीं चैव चक्रतुः सार्वकामिकीम् । दैत्येन्द्रौ परमप्रीतौ तयोश्चैव सुहृज्जनः ॥२९॥

akālakaumudīṃ caiva cakratuḥ sārvakāmikīm . daityendrau paramaprītau tayoścaiva suhṛjjanaḥ ..29..

Shloka 30

भक्ष्यतां भुज्यतां नित्यं रम्यतां गीयतामिति । पीयतां दीयतां चेति वाच आसन्गृहे गृहे ॥३०॥

bhakṣyatāṃ bhujyatāṃ nityaṃ ramyatāṃ gīyatāmiti . pīyatāṃ dīyatāṃ ceti vāca āsangṛhe gṛhe ..30..

Shloka 31

तत्र तत्र महापानैरुत्कृष्टतलनादितैः । हृष्टं प्रमुदितं सर्वं दैत्यानामभवत्पुरम् ॥३१॥

tatra tatra mahāpānairutkṛṣṭatalanāditaiḥ . hṛṣṭaṃ pramuditaṃ sarvaṃ daityānāmabhavatpuram ..31..

Shloka 32

तैस्तैर्विहारैर्बहुभिर्दैत्यानां कामरूपिणाम् । समाः सङ्क्रीडतां तेषामहरेकमिवाभवत् ॥३२॥ 1.208.33

taistairvihārairbahubhirdaityānāṃ kāmarūpiṇām . samāḥ saṅkrīḍatāṃ teṣāmaharekamivābhavat ..32.. 1.208.33

Languages

Saved

Languages

Saved

Adi Parva

Mudra Cost for Each Feature

Practice Later

No Playlist Found

Create a Verse Post

namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.