Gyaandweep | Mahabharatam - आदि पर्व

जनमेजय उवाच॥

त्वत्तः श्रुतमिदं ब्रह्मन्देवदानवरक्षसाम् । अंशावतरणं सम्यग्गन्धर्वाप्सरसां तथा ॥१॥

tvattaḥ śrutamidaṃ brahmandevadānavarakṣasām |aṃśāvataraṇaṃ samyaggandharvāpsarasāṃ tathā ||1||

इमं तु भूय इच्छामि कुरूणां वंशमादितः । कथ्यमानं त्वया विप्र विप्रर्षिगणसंनिधौ ॥२॥

imaṃ tu bhūya icchāmi kurūṇāṃ vaṃśamāditaḥ |kathyamānaṃ tvayā vipra viprarṣigaṇasaṃnidhau ||2||

वैशम्पायन उवाच॥

पौरवाणां वंशकरो दुःषन्तो नाम वीर्यवान् । पृथिव्याश्चतुरन्ताया गोप्ता भरतसत्तम ॥३॥

pauravāṇāṃ vaṃśakaro duḥṣanto nāma vīryavān |pṛthivyāścaturantāyā goptā bharatasattama ||3||

चतुर्भागं भुवः कृत्स्नं स भुङ्क्ते मनुजेश्वरः । समुद्रावरणांश्चापि देशान्स समितिञ्जयः ॥४॥

caturbhāgaṃ bhuvaḥ kṛtsnaṃ sa bhuṅkte manujeśvaraḥ |samudrāvaraṇāṃścāpi deśānsa samitiñjayaḥ ||4||

आम्लेच्छाटविकान्सर्वान्स भुङ्क्ते रिपुमर्दनः । रत्नाकरसमुद्रान्तांश्चातुर्वर्ण्यजनावृतान् ॥५॥

āmlecchāṭavikānsarvānsa bhuṅkte ripumardanaḥ |ratnākarasamudrāntāṃścāturvarṇyajanāvṛtān ||5||

न वर्णसङ्करकरो नाकृष्यकरकृज्जनः । न पापकृत्कश्चिदासीत्तस्मिन्राजनि शासति ॥६॥

na varṇasaṅkarakaro nākṛṣyakarakṛjjanaḥ |na pāpakṛtkaścidāsīttasminrājani śāsati ||6||

धर्म्यां रतिं सेवमाना धर्मार्थावभिपेदिरे । तदा नरा नरव्याघ्र तस्मिञ्जनपदेश्वरे ॥७॥

dharmyāṃ ratiṃ sevamānā dharmārthāvabhipedire |tadā narā naravyāghra tasmiñjanapadeśvare ||7||

नासीच्चोरभयं तात न क्षुधाभयमण्वपि । नासीद्व्याधिभयं चापि तस्मिञ्जनपदेश्वरे ॥८॥

nāsīccorabhayaṃ tāta na kṣudhābhayamaṇvapi |nāsīdvyādhibhayaṃ cāpi tasmiñjanapadeśvare ||8||

स्वैर्धर्मै रेमिरे वर्णा दैवे कर्मणि निःस्पृहाः । तमाश्रित्य महीपालमासंश्चैवाकुतोभयाः ॥९॥

svairdharmai remire varṇā daive karmaṇi niḥspṛhāḥ |tamāśritya mahīpālamāsaṃścaivākutobhayāḥ ||9||

कालवर्षी च पर्जन्यः सस्यानि फलवन्ति च । सर्वरत्नसमृद्धा च मही वसुमती तदा ॥१०॥

kālavarṣī ca parjanyaḥ sasyāni phalavanti ca |sarvaratnasamṛddhā ca mahī vasumatī tadā ||10||

स चाद्भुतमहावीर्यो वज्रसंहननो युवा । उद्यम्य मन्दरं दोर्भ्यां हरेत्सवनकाननम् ॥११॥

sa cādbhutamahāvīryo vajrasaṃhanano yuvā |udyamya mandaraṃ dorbhyāṃ haretsavanakānanam ||11||

धनुष्यथ गदायुद्धे त्सरुप्रहरणेषु च । नागपृष्ठेऽश्वपृष्ठे च बभूव परिनिष्ठितः ॥१२॥

dhanuṣyatha gadāyuddhe tsarupraharaṇeṣu ca |nāgapṛṣṭhe'śvapṛṣṭhe ca babhūva pariniṣṭhitaḥ ||12||

बले विष्णुसमश्चासीत्तेजसा भास्करोपमः । अक्षुब्धत्वेऽर्णवसमः सहिष्णुत्वे धरासमः ॥१३॥

bale viṣṇusamaścāsīttejasā bhāskaropamaḥ |akṣubdhatve'rṇavasamaḥ sahiṣṇutve dharāsamaḥ ||13||

संमतः स महीपालः प्रसन्नपुरराष्ट्रवान् । भूयो धर्मपरैर्भावैर्विदितं जनमावसत् ॥१४॥1.68.14

saṃmataḥ sa mahīpālaḥ prasannapurarāṣṭravān |bhūyo dharmaparairbhāvairviditaṃ janamāvasat ||14||1.68.14

Languages