Gyaandweep | Mahabharatam - आदि पर्व

Shloka 1

दुःषन्त उवाच॥

सुव्यक्तं राजपुत्री त्वं यथा कल्याणि भाषसे । भार्या मे भव सुश्रोणि ब्रूहि किं करवाणि ते ॥१॥

suvyaktaṃ rājaputrī tvaṃ yathā kalyāṇi bhāṣase . bhāryā me bhava suśroṇi brūhi kiṃ karavāṇi te ..1..

Shloka 2

सुवर्णमाला वासांसि कुण्डले परिहाटके । नानापत्तनजे शुभ्रे मणिरत्ने च शोभने ॥२॥

suvarṇamālā vāsāṃsi kuṇḍale parihāṭake . nānāpattanaje śubhre maṇiratne ca śobhane ..2..

Shloka 3

आहरामि तवाद्याहं निष्कादीन्यजिनानि च । सर्वं राज्यं तवाद्यास्तु भार्या मे भव शोभने ॥३॥

āharāmi tavādyāhaṃ niṣkādīnyajināni ca . sarvaṃ rājyaṃ tavādyāstu bhāryā me bhava śobhane ..3..

Shloka 4

शकुन्तलोवाच॥

फलाहारो गतो राजन्पिता मे इत आश्रमात् । तं मुहूर्तं प्रतीक्षस्व स मां तुभ्यं प्रदास्यति ॥५॥

phalāhāro gato rājanpitā me ita āśramāt . taṃ muhūrtaṃ pratīkṣasva sa māṃ tubhyaṃ pradāsyati ..5..

Shloka 5

दुःषन्त उवाच॥

इच्छामि त्वां वरारोहे भजमानामनिन्दिते । त्वदर्थं मां स्थितं विद्धि त्वद्गतं हि मनो मम ॥६॥

icchāmi tvāṃ varārohe bhajamānāmanindite . tvadarthaṃ māṃ sthitaṃ viddhi tvadgataṃ hi mano mama ..6..

Shloka 6

आत्मनो बन्धुरात्मैव गतिरात्मैव चात्मनः । आत्मनैवात्मनो दानं कर्तुमर्हसि धर्मतः ॥७॥

ātmano bandhurātmaiva gatirātmaiva cātmanaḥ . ātmanaivātmano dānaṃ kartumarhasi dharmataḥ ..7..

Shloka 7

अष्टावेव समासेन विवाहा धर्मतः स्मृताः । ब्राह्मो दैवस्तथैवार्षः प्राजापत्यस्तथासुरः ॥८॥

aṣṭāveva samāsena vivāhā dharmataḥ smṛtāḥ . brāhmo daivastathaivārṣaḥ prājāpatyastathāsuraḥ ..8..

Shloka 8

गान्धर्वो राक्षसश्चैव पैशाचश्चाष्टमः स्मृतः । तेषां धर्मान्यथापूर्वं मनुः स्वायम्भुवोऽब्रवीत् ॥९॥

gāndharvo rākṣasaścaiva paiśācaścāṣṭamaḥ smṛtaḥ . teṣāṃ dharmānyathāpūrvaṃ manuḥ svāyambhuvo'bravīt ..9..

Shloka 9

प्रशस्तांश्चतुरः पूर्वान्ब्राह्मणस्योपधारय । षडानुपूर्व्या क्षत्रस्य विद्धि धर्म्याननिन्दिते ॥१०॥

praśastāṃścaturaḥ pūrvānbrāhmaṇasyopadhāraya . ṣaḍānupūrvyā kṣatrasya viddhi dharmyānanindite ..10..

Shloka 10

राज्ञां तु राक्षसोऽप्युक्तो विट्शूद्रेष्वासुरः स्मृतः । पञ्चानां तु त्रयो धर्म्या द्वावधर्म्यौ स्मृताविह ॥११॥

rājñāṃ tu rākṣaso'pyukto viṭśūdreṣvāsuraḥ smṛtaḥ . pañcānāṃ tu trayo dharmyā dvāvadharmyau smṛtāviha ..11..

Shloka 11

पैशाचश्चासुरश्चैव न कर्तव्यौ कथञ्चन । अनेन विधिना कार्यो धर्मस्यैषा गतिः स्मृता ॥१२॥

paiśācaścāsuraścaiva na kartavyau kathañcana . anena vidhinā kāryo dharmasyaiṣā gatiḥ smṛtā ..12..

Shloka 12

गान्धर्वराक्षसौ क्षत्रे धर्म्यौ तौ मा विशङ्किथाः । पृथग्वा यदि वा मिश्रौ कर्तव्यौ नात्र संशयः ॥१३॥

gāndharvarākṣasau kṣatre dharmyau tau mā viśaṅkithāḥ . pṛthagvā yadi vā miśrau kartavyau nātra saṃśayaḥ ..13..

Shloka 13

सा त्वं मम सकामस्य सकामा वरवर्णिनि । गान्धर्वेण विवाहेन भार्या भवितुमर्हसि ॥१४॥

sā tvaṃ mama sakāmasya sakāmā varavarṇini . gāndharveṇa vivāhena bhāryā bhavitumarhasi ..14..

Shloka 14

शकुन्तलोवाच॥

यदि धर्मपथस्त्वेष यदि चात्मा प्रभुर्मम । प्रदाने पौरवश्रेष्ठ शृणु मे समयं प्रभो ॥१५॥

yadi dharmapathastveṣa yadi cātmā prabhurmama . pradāne pauravaśreṣṭha śṛṇu me samayaṃ prabho ..15..

Shloka 15

सत्यं मे प्रतिजानीहि यत्त्वां वक्ष्याम्यहं रहः । मम जायेत यः पुत्रः स भवेत्त्वदनन्तरम् ॥१६॥

satyaṃ me pratijānīhi yattvāṃ vakṣyāmyahaṃ rahaḥ . mama jāyeta yaḥ putraḥ sa bhavettvadanantaram ..16..

Shloka 16

युवराजो महाराज सत्यमेतद्ब्रवीहि मे । यद्येतदेवं दुःषन्त अस्तु मे सङ्गमस्त्वया ॥१७॥

yuvarājo mahārāja satyametadbravīhi me . yadyetadevaṃ duḥṣanta astu me saṅgamastvayā ..17..

Shloka 17

वैशम्पायन उवाच॥

एवमस्त्विति तां राजा प्रत्युवाचाविचारयन् । अपि च त्वां नयिष्यामि नगरं स्वं शुचिस्मिते ॥१८॥ ( यथा त्वमर्हा सुश्रोणि सत्यमेतद्ब्रवीमि ते ॥१८॥ )

evamastviti tāṃ rājā pratyuvācāvicārayan . api ca tvāṃ nayiṣyāmi nagaraṃ svaṃ śucismite ..18.. ( yathā tvamarhā suśroṇi satyametadbravīmi te ..18.. )

Shloka 18

एवमुक्त्वा स राजर्षिस्तामनिन्दितगामिनीम् । जग्राह विधिवत्पाणावुवास च तया सह ॥१९॥

evamuktvā sa rājarṣistāmaninditagāminīm . jagrāha vidhivatpāṇāvuvāsa ca tayā saha ..19..

Shloka 19

विश्वास्य चैनां स प्रायादब्रवीच्च पुनः पुनः । प्रेषयिष्ये तवार्थाय वाहिनीं चतुरङ्गिणीम् ॥२०॥ ( तया त्वामानयिष्यामि निवासं स्वं शुचिस्मिते ॥२०॥ )

viśvāsya caināṃ sa prāyādabravīcca punaḥ punaḥ . preṣayiṣye tavārthāya vāhinīṃ caturaṅgiṇīm ..20.. ( tayā tvāmānayiṣyāmi nivāsaṃ svaṃ śucismite ..20.. )

Shloka 20

इति तस्याः प्रतिश्रुत्य स नृपो जनमेजय । मनसा चिन्तयन्प्रायात्काश्यपं प्रति पार्थिवः ॥२१॥

iti tasyāḥ pratiśrutya sa nṛpo janamejaya . manasā cintayanprāyātkāśyapaṃ prati pārthivaḥ ..21..

Shloka 21

भगवांस्तपसा युक्तः श्रुत्वा किं नु करिष्यति । एवं सञ्चिन्तयन्नेव प्रविवेश स्वकं पुरम् ॥२२॥

bhagavāṃstapasā yuktaḥ śrutvā kiṃ nu kariṣyati . evaṃ sañcintayanneva praviveśa svakaṃ puram ..22..

Shloka 22

मुहूर्तयाते तस्मिंस्तु कण्वोऽप्याश्रममागमत् । शकुन्तला च पितरं ह्रिया नोपजगाम तम् ॥२३॥

muhūrtayāte tasmiṃstu kaṇvo'pyāśramamāgamat . śakuntalā ca pitaraṃ hriyā nopajagāma tam ..23..

Shloka 23

विज्ञायाथ च तां कण्वो दिव्यज्ञानो महातपाः । उवाच भगवान्प्रीतः पश्यन्दिव्येन चक्षुषा ॥२४॥

vijñāyātha ca tāṃ kaṇvo divyajñāno mahātapāḥ . uvāca bhagavānprītaḥ paśyandivyena cakṣuṣā ..24..

Shloka 24

त्वयाद्य राजान्वयया मामनादृत्य यत्कृतः । पुंसा सह समायोगो न स धर्मोपघातकः ॥२५॥

tvayādya rājānvayayā māmanādṛtya yatkṛtaḥ . puṃsā saha samāyogo na sa dharmopaghātakaḥ ..25..

Shloka 25

क्षत्रियस्य हि गान्धर्वो विवाहः श्रेष्ठ उच्यते । सकामायाः सकामेन निर्मन्त्रो रहसि स्मृतः ॥२६॥

kṣatriyasya hi gāndharvo vivāhaḥ śreṣṭha ucyate . sakāmāyāḥ sakāmena nirmantro rahasi smṛtaḥ ..26..

Shloka 26

धर्मात्मा च महात्मा च दुःषन्तः पुरुषोत्तमः । अभ्यगच्छः पतिं यं त्वं भजमानं शकुन्तले ॥२७॥

dharmātmā ca mahātmā ca duḥṣantaḥ puruṣottamaḥ . abhyagacchaḥ patiṃ yaṃ tvaṃ bhajamānaṃ śakuntale ..27..

Shloka 27

महात्मा जनिता लोके पुत्रस्तव महाबलः । य इमां सागरापाङ्गां कृत्स्नां भोक्ष्यति मेदिनीम् ॥२८॥

mahātmā janitā loke putrastava mahābalaḥ . ya imāṃ sāgarāpāṅgāṃ kṛtsnāṃ bhokṣyati medinīm ..28..

Shloka 28

परं चाभिप्रयातस्य चक्रं तस्य महात्मनः । भविष्यत्यप्रतिहतं सततं चक्रवर्तिनः ॥२९॥

paraṃ cābhiprayātasya cakraṃ tasya mahātmanaḥ . bhaviṣyatyapratihataṃ satataṃ cakravartinaḥ ..29..

Shloka 29

ततः प्रक्षाल्य पादौ सा विश्रान्तं मुनिमब्रवीत् । विनिधाय ततो भारं संनिधाय फलानि च ॥३०॥

tataḥ prakṣālya pādau sā viśrāntaṃ munimabravīt . vinidhāya tato bhāraṃ saṃnidhāya phalāni ca ..30..

Shloka 30

मया पतिर्वृतो योऽसौ दुःषन्तः पुरुषोत्तमः । तस्मै ससचिवाय त्वं प्रसादं कर्तुमर्हसि ॥३१॥

mayā patirvṛto yo'sau duḥṣantaḥ puruṣottamaḥ . tasmai sasacivāya tvaṃ prasādaṃ kartumarhasi ..31..

Shloka 31

कण्व उवाच॥

प्रसन्न एव तस्याहं त्वत्कृते वरवर्णिनि । गृहाण च वरं मत्तस्तत्कृते यदभीप्सितम् ॥३२॥

prasanna eva tasyāhaṃ tvatkṛte varavarṇini . gṛhāṇa ca varaṃ mattastatkṛte yadabhīpsitam ..32..

Shloka 32

वैशम्पायन उवाच॥

ततो धर्मिष्ठतां वव्रे राज्याच्चास्खलनं तथा । शकुन्तला पौरवाणां दुःषन्तहितकाम्यया ॥३३॥1.73.34

tato dharmiṣṭhatāṃ vavre rājyāccāskhalanaṃ tathā . śakuntalā pauravāṇāṃ duḥṣantahitakāmyayā ..33..1.73.34

Languages

Saved

Languages

Saved

Adi Parva

Mudra Cost for Each Feature

Practice Later

No Playlist Found

Create a Verse Post

namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.