| |
|

This overlay will guide you through the buttons:

This overlay will guide you through the buttons:

Shloka 1
जनमेजय उवाच॥
ययातिः पूर्वकोऽस्माकं दशमो यः प्रजापतेः । कथं स शुक्रतनयां लेभे परमदुर्लभाम् ॥१॥
yayātiḥ pūrvako'smākaṃ daśamo yaḥ prajāpateḥ . kathaṃ sa śukratanayāṃ lebhe paramadurlabhām ..1..
Shloka 2
एतदिच्छाम्यहं श्रोतुं विस्तरेण द्विजोत्तम । आनुपूर्व्या च मे शंस पूरोर्वंशकरान्पृथक् ॥२॥
etadicchāmyahaṃ śrotuṃ vistareṇa dvijottama . ānupūrvyā ca me śaṃsa pūrorvaṃśakarānpṛthak ..2..
Shloka 3
वैशम्पायन उवाच॥
ययातिरासीद्राजर्षिर्देवराजसमद्युतिः । तं शुक्रवृषपर्वाणौ वव्राते वै यथा पुरा ॥३॥
yayātirāsīdrājarṣirdevarājasamadyutiḥ . taṃ śukravṛṣaparvāṇau vavrāte vai yathā purā ..3..
Shloka 4
तत्तेऽहं सम्प्रवक्ष्यामि पृच्छतो जनमेजय । देवयान्याश्च संयोगं ययातेर्नाहुषस्य च ॥४॥
tatte'haṃ sampravakṣyāmi pṛcchato janamejaya . devayānyāśca saṃyogaṃ yayāternāhuṣasya ca ..4..
Shloka 5
सुराणामसुराणां च समजायत वै मिथः । ऐश्वर्यं प्रति सङ्घर्षस्त्रैलोक्ये सचराचरे ॥५॥
surāṇāmasurāṇāṃ ca samajāyata vai mithaḥ . aiśvaryaṃ prati saṅgharṣastrailokye sacarācare ..5..
Shloka 6
जिगीषया ततो देवा वव्रिरेऽऽङ्गिरसं मुनिम् । पौरोहित्येन याज्यार्थे काव्यं तूशनसं परे ॥६॥ ( ब्राह्मणौ तावुभौ नित्यमन्योन्यस्पर्धिनौ भृशम् ॥६॥ )
jigīṣayā tato devā vavrire''ṅgirasaṃ munim . paurohityena yājyārthe kāvyaṃ tūśanasaṃ pare ..6.. ( brāhmaṇau tāvubhau nityamanyonyaspardhinau bhṛśam ..6.. )
Shloka 7
तत्र देवा निजघ्नुर्यान्दानवान्युधि सङ्गतान् । तान्पुनर्जीवयामास काव्यो विद्याबलाश्रयात् ॥७॥ ( ततस्ते पुनरुत्थाय योधयां चक्रिरे सुरान् ॥७॥ )
tatra devā nijaghnuryāndānavānyudhi saṅgatān . tānpunarjīvayāmāsa kāvyo vidyābalāśrayāt ..7.. ( tataste punarutthāya yodhayāṃ cakrire surān ..7.. )
Shloka 8
असुरास्तु निजघ्नुर्यान्सुरान्समरमूर्धनि । न तान्सञ्जीवयामास बृहस्पतिरुदारधीः ॥८॥
asurāstu nijaghnuryānsurānsamaramūrdhani . na tānsañjīvayāmāsa bṛhaspatirudāradhīḥ ..8..
Shloka 9
न हि वेद स तां विद्यां यां काव्यो वेद वीर्यवान् । सञ्जीवनीं ततो देवा विषादमगमन्परम् ॥९॥
na hi veda sa tāṃ vidyāṃ yāṃ kāvyo veda vīryavān . sañjīvanīṃ tato devā viṣādamagamanparam ..9..
Shloka 10
ते तु देवा भयोद्विग्नाः काव्यादुशनसस्तदा । ऊचुः कचमुपागम्य ज्येष्ठं पुत्रं बृहस्पतेः ॥१०॥
te tu devā bhayodvignāḥ kāvyāduśanasastadā . ūcuḥ kacamupāgamya jyeṣṭhaṃ putraṃ bṛhaspateḥ ..10..
Shloka 11
भजमानान्भजस्वास्मान्कुरु नः साह्यमुत्तमम् । यासौ विद्या निवसति ब्राह्मणेऽमिततेजसि ॥११॥ ( शुक्रे तामाहर क्षिप्रं भागभाङ्नो भविष्यसि ॥११॥ )
bhajamānānbhajasvāsmānkuru naḥ sāhyamuttamam . yāsau vidyā nivasati brāhmaṇe'mitatejasi ..11.. ( śukre tāmāhara kṣipraṃ bhāgabhāṅno bhaviṣyasi ..11.. )
Shloka 12
वृषपर्वसमीपे स शक्यो द्रष्टुं त्वया द्विजः । रक्षते दानवांस्तत्र न स रक्षत्यदानवान् ॥१२॥
vṛṣaparvasamīpe sa śakyo draṣṭuṃ tvayā dvijaḥ . rakṣate dānavāṃstatra na sa rakṣatyadānavān ..12..
Shloka 13
तमाराधयितुं शक्तो भवान्पूर्ववयाः कविम् । देवयानीं च दयितां सुतां तस्य महात्मनः ॥१३॥
tamārādhayituṃ śakto bhavānpūrvavayāḥ kavim . devayānīṃ ca dayitāṃ sutāṃ tasya mahātmanaḥ ..13..
Shloka 14
त्वमाराधयितुं शक्तो नान्यः कश्चन विद्यते । शीलदाक्षिण्यमाधुर्यैराचारेण दमेन च ॥१४॥ ( देवयान्यां हि तुष्टायां विद्यां तां प्राप्स्यसि ध्रुवम् ॥१४॥ )
tvamārādhayituṃ śakto nānyaḥ kaścana vidyate . śīladākṣiṇyamādhuryairācāreṇa damena ca ..14.. ( devayānyāṃ hi tuṣṭāyāṃ vidyāṃ tāṃ prāpsyasi dhruvam ..14.. )
Shloka 15
तथेत्युक्त्वा ततः प्रायाद्बृहस्पतिसुतः कचः । तदाभिपूजितो देवैः समीपं वृषपर्वणः ॥१५॥
tathetyuktvā tataḥ prāyādbṛhaspatisutaḥ kacaḥ . tadābhipūjito devaiḥ samīpaṃ vṛṣaparvaṇaḥ ..15..
Shloka 16
स गत्वा त्वरितो राजन्देवैः सम्प्रेषितः कचः । असुरेन्द्रपुरे शुक्रं दृष्ट्वा वाक्यमुवाच ह ॥१६॥
sa gatvā tvarito rājandevaiḥ sampreṣitaḥ kacaḥ . asurendrapure śukraṃ dṛṣṭvā vākyamuvāca ha ..16..
Shloka 17
ऋषेरङ्गिरसः पौत्रं पुत्रं साक्षाद्बृहस्पतेः । नाम्ना कच इति ख्यातं शिष्यं गृह्णातु मां भवान् ॥१७॥
ṛṣeraṅgirasaḥ pautraṃ putraṃ sākṣādbṛhaspateḥ . nāmnā kaca iti khyātaṃ śiṣyaṃ gṛhṇātu māṃ bhavān ..17..
Shloka 18
ब्रह्मचर्यं चरिष्यामि त्वय्यहं परमं गुरौ । अनुमन्यस्व मां ब्रह्मन्सहस्रं परिवत्सरान् ॥१८॥
brahmacaryaṃ cariṣyāmi tvayyahaṃ paramaṃ gurau . anumanyasva māṃ brahmansahasraṃ parivatsarān ..18..
Shloka 19
शुक्र उवाच॥
कच सुस्वागतं तेऽस्तु प्रतिगृह्णामि ते वचः । अर्चयिष्येऽहमर्च्यं त्वामर्चितोऽस्तु बृहस्पतिः ॥१९॥
kaca susvāgataṃ te'stu pratigṛhṇāmi te vacaḥ . arcayiṣye'hamarcyaṃ tvāmarcito'stu bṛhaspatiḥ ..19..
Shloka 20
वैशम्पायन उवाच॥
कचस्तु तं तथेत्युक्त्वा प्रतिजग्राह तद्व्रतम् । आदिष्टं कविपुत्रेण शुक्रेणोशनसा स्वयम् ॥२०॥
kacastu taṃ tathetyuktvā pratijagrāha tadvratam . ādiṣṭaṃ kaviputreṇa śukreṇośanasā svayam ..20..
Shloka 21
व्रतस्य व्रतकालं स यथोक्तं प्रत्यगृह्णत । आराधयन्नुपाध्यायं देवयानीं च भारत ॥२१॥
vratasya vratakālaṃ sa yathoktaṃ pratyagṛhṇata . ārādhayannupādhyāyaṃ devayānīṃ ca bhārata ..21..
Shloka 22
नित्यमाराधयिष्यंस्तां युवा यौवनगोऽऽमुखे । गायन्नृत्यन्वादयंश्च देवयानीमतोषयत् ॥२२॥
nityamārādhayiṣyaṃstāṃ yuvā yauvanago''mukhe . gāyannṛtyanvādayaṃśca devayānīmatoṣayat ..22..
Shloka 23
संशीलयन्देवयानीं कन्यां सम्प्राप्तयौवनाम् । पुष्पैः फलैः प्रेषणैश्च तोषयामास भारत ॥२३॥
saṃśīlayandevayānīṃ kanyāṃ samprāptayauvanām . puṣpaiḥ phalaiḥ preṣaṇaiśca toṣayāmāsa bhārata ..23..
Shloka 24
देवयान्यपि तं विप्रं नियमव्रतचारिणम् । अनुगायमाना ललना रहः पर्यचरत्तदा ॥२४॥
devayānyapi taṃ vipraṃ niyamavratacāriṇam . anugāyamānā lalanā rahaḥ paryacarattadā ..24..
Shloka 25
पञ्च वर्षशतान्येवं कचस्य चरतो व्रतम् । तत्रातीयुरथो बुद्ध्वा दानवास्तं ततः कचम् ॥२५॥
pañca varṣaśatānyevaṃ kacasya carato vratam . tatrātīyuratho buddhvā dānavāstaṃ tataḥ kacam ..25..
Shloka 26
गा रक्षन्तं वने दृष्ट्वा रहस्येकममर्षिताः । जघ्नुर्बृहस्पतेर्द्वेषाद्विद्यारक्षार्थमेव च ॥२६॥ ( हत्वा शालावृकेभ्यश्च प्रायच्छंस्तिलशः कृतम् ॥२६॥ )
gā rakṣantaṃ vane dṛṣṭvā rahasyekamamarṣitāḥ . jaghnurbṛhaspaterdveṣādvidyārakṣārthameva ca ..26.. ( hatvā śālāvṛkebhyaśca prāyacchaṃstilaśaḥ kṛtam ..26.. )
Shloka 27
ततो गावो निवृत्तास्ता अगोपाः स्वं निवेशनम् । ता दृष्ट्वा रहिता गास्तु कचेनाभ्यागता वनात् ॥२७॥ ( उवाच वचनं काले देवयान्यथ भारत ॥२७॥ )
tato gāvo nivṛttāstā agopāḥ svaṃ niveśanam . tā dṛṣṭvā rahitā gāstu kacenābhyāgatā vanāt ..27.. ( uvāca vacanaṃ kāle devayānyatha bhārata ..27.. )
Shloka 28
अहुतं चाग्निहोत्रं ते सूर्यश्चास्तं गतः प्रभो । अगोपाश्चागता गावः कचस्तात न दृश्यते ॥२८॥
ahutaṃ cāgnihotraṃ te sūryaścāstaṃ gataḥ prabho . agopāścāgatā gāvaḥ kacastāta na dṛśyate ..28..
Shloka 29
व्यक्तं हतो मृतो वापि कचस्तात भविष्यति । तं विना न च जीवेयं कचं सत्यं ब्रवीमि ते ॥२९॥
vyaktaṃ hato mṛto vāpi kacastāta bhaviṣyati . taṃ vinā na ca jīveyaṃ kacaṃ satyaṃ bravīmi te ..29..
Shloka 30
शुक्र उवाच॥
अयमेहीति शब्देन मृतं सञ्जीवयाम्यहम् । 30॥
ayamehīti śabdena mṛtaṃ sañjīvayāmyaham . 30..
Shloka 31
वैशम्पायन उवाच
ततः सञ्जीवनीं विद्यां प्रयुज्य कचमाह्वयत् । आहूतः प्रादुरभवत्कचोऽरिष्टोऽथ विद्यया ॥३१॥ ( हतोऽहमिति चाचख्यौ पृष्टो ब्राह्मणकन्यया ॥३१॥ )
tataḥ sañjīvanīṃ vidyāṃ prayujya kacamāhvayat . āhūtaḥ prādurabhavatkaco'riṣṭo'tha vidyayā ..31.. ( hato'hamiti cācakhyau pṛṣṭo brāhmaṇakanyayā ..31.. )
Shloka 32
स पुनर्देवयान्योक्तः पुष्पाहारो यदृच्छया । वनं ययौ ततो विप्रो ददृशुर्दानवाश्च तम् ॥३२॥
sa punardevayānyoktaḥ puṣpāhāro yadṛcchayā . vanaṃ yayau tato vipro dadṛśurdānavāśca tam ..32..
Shloka 33
ततो द्वितीयं हत्वा तं दग्ध्वा कृत्वा च चूर्णशः । प्रायच्छन्ब्राह्मणायैव सुरायामसुरास्तदा ॥३३॥
tato dvitīyaṃ hatvā taṃ dagdhvā kṛtvā ca cūrṇaśaḥ . prāyacchanbrāhmaṇāyaiva surāyāmasurāstadā ..33..
Shloka 34
देवयान्यथ भूयोऽपि वाक्यं पितरमब्रवीत् । पुष्पाहारः प्रेषणकृत्कचस्तात न दृश्यते ॥३४॥
devayānyatha bhūyo'pi vākyaṃ pitaramabravīt . puṣpāhāraḥ preṣaṇakṛtkacastāta na dṛśyate ..34..
Shloka 35
शुक्र उवाच॥
बृहस्पतेः सुतः पुत्रि कचः प्रेतगतिं गतः । विद्यया जीवितोऽप्येवं हन्यते करवाणि किम् ॥३५॥
bṛhaspateḥ sutaḥ putri kacaḥ pretagatiṃ gataḥ . vidyayā jīvito'pyevaṃ hanyate karavāṇi kim ..35..
Shloka 36
मैवं शुचो मा रुद देवयानि; न त्वादृशी मर्त्यमनुप्रशोचेत् । सुराश्च विश्वे च जगच्च सर्व; मुपस्थितां वैकृतिमानमन्ति ॥३६ - क॥
maivaṃ śuco mā ruda devayāni; na tvādṛśī martyamanupraśocet . surāśca viśve ca jagacca sarva; mupasthitāṃ vaikṛtimānamanti ..36 - ka..
Shloka 37
देवयान्युवाच॥
यस्याङ्गिरा वृद्धतमः पितामहो; बृहस्पतिश्चापि पिता तपोधनः । ऋषेः पुत्रं तमथो वापि पौत्रं; कथं न शोचेयमहं न रुद्याम् ॥३७॥
yasyāṅgirā vṛddhatamaḥ pitāmaho; bṛhaspatiścāpi pitā tapodhanaḥ . ṛṣeḥ putraṃ tamatho vāpi pautraṃ; kathaṃ na śoceyamahaṃ na rudyām ..37..
Shloka 38
स ब्रह्मचारी च तपोधनश्च; सदोत्थितः कर्मसु चैव दक्षः । कचस्य मार्गं प्रतिपत्स्ये न भोक्ष्ये; प्रियो हि मे तात कचोऽभिरूपः ॥३८॥
sa brahmacārī ca tapodhanaśca; sadotthitaḥ karmasu caiva dakṣaḥ . kacasya mārgaṃ pratipatsye na bhokṣye; priyo hi me tāta kaco'bhirūpaḥ ..38..
Shloka 39
शुक्र उवाच॥
असंशयं मामसुरा द्विषन्ति; ये मे शिष्यं नागसं सूदयन्ति । अब्राह्मणं कर्तुमिच्छन्ति रौद्रा; स्ते मां यथा प्रस्तुतं दानवैर्हि ॥३९॥ ( अप्यस्य पापस्य भवेदिहान्तः; कं ब्रह्महत्या न दहेदपीन्द्रम् ॥३९॥ )
asaṃśayaṃ māmasurā dviṣanti; ye me śiṣyaṃ nāgasaṃ sūdayanti . abrāhmaṇaṃ kartumicchanti raudrā; ste māṃ yathā prastutaṃ dānavairhi ..39.. ( apyasya pāpasya bhavedihāntaḥ; kaṃ brahmahatyā na dahedapīndram ..39.. )
Shloka 40
वैशम्पायन उवाच॥
सञ्चोदितो देवयान्या महर्षिः पुनराह्वयत् । संरम्भेणैव काव्यो हि बृहस्पतिसुतं कचम् ॥४०॥
sañcodito devayānyā maharṣiḥ punarāhvayat . saṃrambheṇaiva kāvyo hi bṛhaspatisutaṃ kacam ..40..
Shloka 41
गुरोर्भीतो विद्यया चोपहूतः; शनैर्वाचं जठरे व्याजहार । तमब्रवीत्केन पथोपनीतो; ममोदरे तिष्ठसि ब्रूहि विप्र ॥४१॥
gurorbhīto vidyayā copahūtaḥ; śanairvācaṃ jaṭhare vyājahāra . tamabravītkena pathopanīto; mamodare tiṣṭhasi brūhi vipra ..41..
Shloka 42
कच उवाच॥
भवत्प्रसादान्न जहाति मां स्मृतिः; स्मरे च सर्वं यच्च यथा च वृत्तम् । न त्वेवं स्यात्तपसो व्ययो मे; ततः क्लेशं घोरमिमं सहामि ॥४२॥
bhavatprasādānna jahāti māṃ smṛtiḥ; smare ca sarvaṃ yacca yathā ca vṛttam . na tvevaṃ syāttapaso vyayo me; tataḥ kleśaṃ ghoramimaṃ sahāmi ..42..
Shloka 43
असुरैः सुरायां भवतोऽस्मि दत्तो; हत्वा दग्ध्वा चूर्णयित्वा च काव्य । ब्राह्मीं मायामासुरी चैव माया; त्वयि स्थिते कथमेवातिवर्तेत् ॥४३॥
asuraiḥ surāyāṃ bhavato'smi datto; hatvā dagdhvā cūrṇayitvā ca kāvya . brāhmīṃ māyāmāsurī caiva māyā; tvayi sthite kathamevātivartet ..43..
Shloka 44
शुक्र उवाच॥
किं ते प्रियं करवाण्यद्य वत्से; वधेन मे जीवितं स्यात्कचस्य । नान्यत्र कुक्षेर्मम भेदनेन; दृश्येत्कचो मद्गतो देवयानि ॥४४॥
kiṃ te priyaṃ karavāṇyadya vatse; vadhena me jīvitaṃ syātkacasya . nānyatra kukṣermama bhedanena; dṛśyetkaco madgato devayāni ..44..
Shloka 45
देवयान्युवाच॥
द्वौ मां शोकावग्निकल्पौ दहेतां; कचस्य नाशस्तव चैवोपघातः । कचस्य नाशे मम नास्ति शर्म; तवोपघाते जीवितुं नास्मि शक्ता ॥४५॥
dvau māṃ śokāvagnikalpau dahetāṃ; kacasya nāśastava caivopaghātaḥ . kacasya nāśe mama nāsti śarma; tavopaghāte jīvituṃ nāsmi śaktā ..45..
Shloka 46
शुक्र उवाच॥
संसिद्धरूपोऽसि बृहस्पतेः सुत; यत्त्वां भक्तं भजते देवयानी । विद्यामिमां प्राप्नुहि जीवनीं त्वं; न चेदिन्द्रः कचरूपी त्वमद्य ॥४६॥
saṃsiddharūpo'si bṛhaspateḥ suta; yattvāṃ bhaktaṃ bhajate devayānī . vidyāmimāṃ prāpnuhi jīvanīṃ tvaṃ; na cedindraḥ kacarūpī tvamadya ..46..
Shloka 47
न निवर्तेत्पुनर्जीवन्कश्चिदन्यो ममोदरात् । ब्राह्मणं वर्जयित्वैकं तस्माद्विद्यामवाप्नुहि ॥४७॥
na nivartetpunarjīvankaścidanyo mamodarāt . brāhmaṇaṃ varjayitvaikaṃ tasmādvidyāmavāpnuhi ..47..
Shloka 48
पुत्रो भूत्वा भावय भावितो मा; मस्माद्देहादुपनिष्क्रम्य तात । समीक्षेथा धर्मवतीमवेक्षां; गुरोः सकाशात्प्राप्य विद्यां सविद्यः ॥४८॥
putro bhūtvā bhāvaya bhāvito mā; masmāddehādupaniṣkramya tāta . samīkṣethā dharmavatīmavekṣāṃ; guroḥ sakāśātprāpya vidyāṃ savidyaḥ ..48..
Shloka 49
वैशम्पायन उवाच॥
गुरोः सकाशात्समवाप्य विद्यां; भित्त्वा कुक्षिं निर्विचक्राम विप्रः । कचोऽभिरूपो दक्षिणं ब्राह्मणस्य; शुक्लात्यये पौर्णमास्यामिवेन्दुः ॥४९॥
guroḥ sakāśātsamavāpya vidyāṃ; bhittvā kukṣiṃ nirvicakrāma vipraḥ . kaco'bhirūpo dakṣiṇaṃ brāhmaṇasya; śuklātyaye paurṇamāsyāmivenduḥ ..49..
Shloka 50
दृष्ट्वा च तं पतितं ब्रह्मराशि; मुत्थापयामास मृतं कचोऽपि । विद्यां सिद्धां तामवाप्याभिवाद्य; ततः कचस्तं गुरुमित्युवाच ॥५०॥
dṛṣṭvā ca taṃ patitaṃ brahmarāśi; mutthāpayāmāsa mṛtaṃ kaco'pi . vidyāṃ siddhāṃ tāmavāpyābhivādya; tataḥ kacastaṃ gurumityuvāca ..50..
Shloka 51
ऋतस्य दातारमनुत्तमस्य; निधिं निधीनां चतुरन्वयानाम् । ये नाद्रियन्ते गुरुमर्चनीयं; पापाँल्लोकांस्ते व्रजन्त्यप्रतिष्ठान् ॥५१॥ 1.76.64
ṛtasya dātāramanuttamasya; nidhiṃ nidhīnāṃ caturanvayānām . ye nādriyante gurumarcanīyaṃ; pāpām̐llokāṃste vrajantyapratiṣṭhān ..51.. 1.76.64
Shloka 52
वैशम्पायन उवाच॥
सुरापानाद्वञ्चनां प्रापयित्वा; सञ्ज्ञानाशं चैव तथातिघोरम् । दृष्ट्वा कचं चापि तथाभिरूपं; पीतं तदा सुरया मोहितेन ॥५२॥
surāpānādvañcanāṃ prāpayitvā; sañjñānāśaṃ caiva tathātighoram . dṛṣṭvā kacaṃ cāpi tathābhirūpaṃ; pītaṃ tadā surayā mohitena ..52..
Shloka 53
समन्युरुत्थाय महानुभाव; स्तदोशना विप्रहितं चिकीर्षुः । काव्यः स्वयं वाक्यमिदं जगाद; सुरापानं प्रति वै जातशङ्कः ॥५३॥
samanyurutthāya mahānubhāva; stadośanā viprahitaṃ cikīrṣuḥ . kāvyaḥ svayaṃ vākyamidaṃ jagāda; surāpānaṃ prati vai jātaśaṅkaḥ ..53..
Shloka 54
यो ब्राह्मणोऽद्य प्रभृतीह कश्चि; न्मोहात्सुरां पास्यति मन्दबुद्धिः । अपेतधर्मो ब्रह्महा चैव स स्या; दस्मिँल्लोके गर्हितः स्यात्परे च ॥५४॥
yo brāhmaṇo'dya prabhṛtīha kaści; nmohātsurāṃ pāsyati mandabuddhiḥ . apetadharmo brahmahā caiva sa syā; dasmim̐lloke garhitaḥ syātpare ca ..54..
Shloka 55
मया चेमां विप्रधर्मोक्तिसीमां; मर्यादां वै स्थापितां सर्वलोके । सन्तो विप्राः शुश्रुवांसो गुरूणां; देवा लोकाश्चोपशृण्वन्तु सर्वे ॥५५॥
mayā cemāṃ vipradharmoktisīmāṃ; maryādāṃ vai sthāpitāṃ sarvaloke . santo viprāḥ śuśruvāṃso gurūṇāṃ; devā lokāścopaśṛṇvantu sarve ..55..
Shloka 56
इतीदमुक्त्वा स महानुभाव; स्तपोनिधीनां निधिरप्रमेयः । तान्दानवान्दैवविमूढबुद्धी; निदं समाहूय वचोऽभ्युवाच ॥५६॥
itīdamuktvā sa mahānubhāva; staponidhīnāṃ nidhiraprameyaḥ . tāndānavāndaivavimūḍhabuddhī; nidaṃ samāhūya vaco'bhyuvāca ..56..
Shloka 57
आचक्षे वो दानवा बालिशाः स्थ; सिद्धः कचो वत्स्यति मत्सकाशे । सञ्जीवनीं प्राप्य विद्यां महार्थां; तुल्यप्रभावो ब्रह्मणा ब्रह्मभूतः ॥५७॥
ācakṣe vo dānavā bāliśāḥ stha; siddhaḥ kaco vatsyati matsakāśe . sañjīvanīṃ prāpya vidyāṃ mahārthāṃ; tulyaprabhāvo brahmaṇā brahmabhūtaḥ ..57..
Shloka 58
गुरोरुष्य सकाशे तु दश वर्षशतानि सः । अनुज्ञातः कचो गन्तुमियेष त्रिदशालयम् ॥५८॥ 1.76.72
guroruṣya sakāśe tu daśa varṣaśatāni saḥ . anujñātaḥ kaco gantumiyeṣa tridaśālayam ..58.. 1.76.72

Add to Playlist

Practice Later

No Playlist Found

Create a Verse Post


namo namaḥ!

भाषा चुने (Choose Language)

namo namaḥ!

Sign Up to practice more than 60 Vedic Scriptures and 100 of chants, one verse at a time.

Login to track your learning and teaching progress.


Sign In