Gyaandweep | Narayaneeyam Dashkam

प्रियव्रतस्य प्रियपुत्रभूतादाग्नीध्रराजादुदितो हि नाभिः । त्वां दृष्टवानिष्टदमिष्टमध्ये तवैव तुष्ट्यै कृतयज्ञकर्मा ॥ 20.1 ॥

priyavratasya priyaputrabhūtādāgnīdhrarājādudito hi nābhiḥ | tvāṃ dṛṣṭavāniṣṭadamiṣṭamadhye tavaiva tuṣṭyai kṛtayajñakarmā || 20.1 ||

अभिष्टुतस्तत्र मुनीश्वरैस्त्वं राज्ञा स्वतुल्यं सुतमर्थ्यमानः । स्वयं जनिष्येऽहमिति ब्रुवाणस्तिरोदधा बर्हिषि विश्वमूर्ते ॥ 20.2 ॥

abhiṣṭutastatra munīśvaraistvaṃ rājñā svatulyaṃ sutamarthyamānaḥ | svayaṃ janiṣye'hamiti bruvāṇastirodadhā barhiṣi viśvamūrte || 20.2 ||

नाभिप्रियायामथ मेरुदेव्यां त्वमंशतोऽभूरृषभाभिधानः । अलोकसामान्यगुणप्रभावप्रभाविताशेषजनप्रमोदः ॥ 20.3 ॥

nābhipriyāyāmatha merudevyāṃ tvamaṃśato'bhūrṛṣabhābhidhānaḥ | alokasāmānyaguṇaprabhāvaprabhāvitāśeṣajanapramodaḥ || 20.3 ||

त्वयि त्रिलोकीभृति राज्य्भारं निधाय नाभिः सह मेरुदेव्या । तपोवनं प्राप्य भवन्निषेवी गतः किलानन्दपदं पदं ते ॥ 20.4 ॥

tvayi trilokībhṛti rājybhāraṃ nidhāya nābhiḥ saha merudevyā | tapovanaṃ prāpya bhavanniṣevī gataḥ kilānandapadaṃ padaṃ te || 20.4 ||

इन्द्रस्त्वदुत्कर्षकृतादमर्षाद्ववर्ष नास्मिन्नजनाभवर्षे । यदा तदा त्वं निजयोगशक्त्या स्ववर्षमेनद्व्यदधाः सुवर्षम् ॥ 20.5 ॥

indrastvadutkarṣakṛtādamarṣādvavarṣa nāsminnajanābhavarṣe | yadā tadā tvaṃ nijayogaśaktyā svavarṣamenadvyadadhāḥ suvarṣam || 20.5 ||

जितेन्द्रदत्तां कमनीं जयन्तीमथोद्वहन्नात्मरताशयोऽपि । अजीजनत्तत्र शतं तनूजान्येषां क्षितीशो भरतोऽग्रजन्मा ॥ 20.6 ॥

jitendradattāṃ kamanīṃ jayantīmathodvahannātmaratāśayo'pi | ajījanattatra śataṃ tanūjānyeṣāṃ kṣitīśo bharato'grajanmā || 20.6 ||

नवाभवन्योगिवरा नवान्ये त्वपालयन्भारतवर्षखण्डान् । सैका त्वशीतिस्तव शेषपुत्रास्तपोबलाद्भूसुरभूयमीयुः ॥ 20.7 ॥

navābhavanyogivarā navānye tvapālayanbhāratavarṣakhaṇḍān | saikā tvaśītistava śeṣaputrāstapobalādbhūsurabhūyamīyuḥ || 20.7 ||

उक्त्वा सुतेभ्योऽथ मुनीन्द्रमध्ये विरक्तिभक्त्यन्वितमुक्तिमार्गम् । स्वयं गतः पारमहंस्यवृत्तिमधा जडोन्मत्तपिशाचचर्याम् ॥ 20.8 ॥

uktvā sutebhyo'tha munīndramadhye viraktibhaktyanvitamuktimārgam | svayaṃ gataḥ pāramahaṃsyavṛttimadhā jaḍonmattapiśācacaryām || 20.8 ||

परात्मभूतोऽपि परोपदेशं कुर्वन्भवन्सर्वनिरस्यमानः । विकारहीनो विचचार कृत्स्नां महीमहीनात्मरसाभिलीनः ॥ 20.9 ॥

parātmabhūto'pi paropadeśaṃ kurvanbhavansarvanirasyamānaḥ | vikārahīno vicacāra kṛtsnāṃ mahīmahīnātmarasābhilīnaḥ || 20.9 ||

शयुव्रतं गोमृगकाकचर्यां चिरं चरन्नाप्य परं स्वरूपम् । दवाहृताङ्गः कुटकाचले त्वं तापान्ममापाकुरु वातनाथ ॥ 20.10 ॥

śayuvrataṃ gomṛgakākacaryāṃ ciraṃ carannāpya paraṃ svarūpam | davāhṛtāṅgaḥ kuṭakācale tvaṃ tāpānmamāpākuru vātanātha || 20.10 ||

Languages