Jñānadvīpa | Bhavishya Purana Brahma Parva, Adhyaya 111

सप्तमीकल्पेऽभ्यङ्गसप्तमीवर्णनम्

अथ एकादशोत्तरशततमोऽध्यायः ।।

atha ekādaśottaraśatatamo'dhyāyaḥ

ब्रह्मोवाच

श्रावणे मासि देवाग्र्यं सप्तम्यां सप्तवाहनम् । शुक्लपक्षे समभ्यर्च्य पुष्पधूपादिभिः शुचिः ।। १।।

śrāvaṇe māsi devāgryaṃ saptamyāṃ saptavāhanam |śuklapakṣe samabhyarcya puṣpadhūpādibhiḥ śuciḥ | | 1

पाखण्डादिभिरालापमकुर्वन्नियतात्मवान् । विप्राय दक्षिणां दत्त्वा नक्तं भुञ्जीत वाग्यतः ।। २।।

pākhaṇḍādibhirālāpamakurvanniyatātmavān |viprāya dakṣiṇāṃ dattvā naktaṃ bhuñjīta vāgyataḥ | | 2

अभ्यङ्गं देवदेवस्य वर्षे वर्षे नियोजयेत् । सप्तम्यामन्नमेवाग्र्यं शुभं शुक्लं नवं तथा ।। ३।।

abhyaṅgaṃ devadevasya varṣe varṣe niyojayet |saptamyāmannamevāgryaṃ śubhaṃ śuklaṃ navaṃ tathā | | 3

विभवेषु तथान्येषु वादित्राण्येव वै विदुः । तथा देवस्य मासेऽस्मिन्नभ्यङ्गः परिगीयते ।। ४।।

vibhaveṣu tathānyeṣu vāditrāṇyeva vai viduḥ |tathā devasya māse'sminnabhyaṅgaḥ parigīyate | |4

यस्तु चाराधयेद्भक्त्या भास्करस्य नरोऽच्युत । अभ्यङ्गं विधिवच्छक्त्या कृत्वा ब्राह्मणभोजनम् ।। ५।।

yastu cārādhayedbhaktyā bhāskarasya naro'cyuta |abhyaṅgaṃ vidhivacchaktyā kṛtvā brāhmaṇabhojanam | | 5

शङ्खतूर्यनिनादैश्च ब्रह्मघोषैश्च पुष्कलैः । स दिव्यं यानमारूढो लोकमायाति हेलिनः ।। ६।।

śaṅkhatūryaninādaiśca brahmaghoṣaiśca puṣkalaiḥ |sa divyaṃ yānamārūḍho lokamāyāti helinaḥ | | 6

अनेनैव विधानेन मासान्द्वादश वै क्रमात् । उपोष्य पारणे पूर्णे दद्याद्विप्राय दक्षिणाम् ।। ७।।

anenaiva vidhānena māsāndvādaśa vai kramāt |upoṣya pāraṇe pūrṇe dadyādviprāya dakṣiṇām | | 7

व्रतं यः पुरुषः कुर्यादादित्याराधनं शुचिः । स गच्छेत्परमं लोकं दिव्यं वै वनमालिनः ।। ८।।

vrataṃ yaḥ puruṣaḥ kuryādādityārādhanaṃ śuciḥ |sa gacchetparamaṃ lokaṃ divyaṃ vai vanamālinaḥ | | 8

इति श्रीभविष्ये महापुराणे ब्राह्मे पर्वणि सप्तमीकल्पेऽभ्यङ्गसप्तमीवर्णनम् नामैकादशाधिकशततमोऽध्यायः । १११ । ।।

iti śrībhaviṣye mahāpurāṇe brāhme parvaṇi saptamīkalpe'bhyaṅgasaptamīvarṇanam nāmaikādaśādhikaśatatamo'dhyāyaḥ | 111 |

Languages