श्रीकूर्म उवाच ।
अन्दके निगृहीते वै प्रह्लादस्य महात्मनः । विरोचनो नाम सुतो बभूव नृपतिः सुतः ॥ १७.१॥
andake nigṛhīte vai prahlādasya mahātmanaḥ | virocano nāma suto babhūva nṛpatiḥ sutaḥ || 17.1||
देवाञ्जित्वा सदेवेन्द्रान बहून् वर्षान् महासुरः । पालयामास धर्मेण त्रैलोक्यं सचराचरम् ॥ १७.२॥
devāñjitvā sadevendrāna bahūn varṣān mahāsuraḥ | pālayāmāsa dharmeṇa trailokyaṃ sacarācaram || 17.2||
तस्यैवं वर्तमानस्य कदाचिद् विष्णुचोदितः । सनत्कुमारो भगवान् पुरं प्राप महामुनिः ॥ १७.३॥
tasyaivaṃ vartamānasya kadācid viṣṇucoditaḥ | sanatkumāro bhagavān puraṃ prāpa mahāmuniḥ || 17.3||
दृष्ट्वा सिहासनगतो ब्रह्मपुत्रं महासुरः । ननामोत्थाय शिरसा प्राञ्जलिर्वाक्यमब्रवीत् ॥ १७.४॥
dṛṣṭvā sihāsanagato brahmaputraṃ mahāsuraḥ | nanāmotthāya śirasā prāñjalirvākyamabravīt || 17.4||
धन्योऽस्म्यनुगृहीतोऽस्मि संप्राप्तो मे पुरातनः । योगीश्वरोऽद्य भगवान् यतोऽसौ ब्रह्मवित् स्वयम् ॥ १७.५॥
dhanyo'smyanugṛhīto'smi saṃprāpto me purātanaḥ | yogīśvaro'dya bhagavān yato'sau brahmavit svayam || 17.5||
किमर्थमागतो ब्रह्मन् स्वयं देवः पितामहः । ब्रूहि मे ब्रह्मणः पुत्र किं कार्यं करवाण्यहम् ॥ १७.६॥
kimarthamāgato brahman svayaṃ devaḥ pitāmahaḥ | brūhi me brahmaṇaḥ putra kiṃ kāryaṃ karavāṇyaham || 17.6||
सोऽब्रवीद् भगवान् देवो धर्मयुक्तं महासुरम् । द्रष्टुमभ्यागतोऽहं वै भवन्तं भाग्यवानसि ॥ १७.७॥
so'bravīd bhagavān devo dharmayuktaṃ mahāsuram | draṣṭumabhyāgato'haṃ vai bhavantaṃ bhāgyavānasi || 17.7||
सुदुर्लभा नीतिरेषा दैत्यानां दैत्यसत्तम । त्रिलोके धार्मिको नूनं त्वादृशोऽन्यो न विद्यते ॥ १७.८॥
sudurlabhā nītireṣā daityānāṃ daityasattama | triloke dhārmiko nūnaṃ tvādṛśo'nyo na vidyate || 17.8||
इत्युक्तोऽसुरराजस्तु पुनः प्राह महामुनिम् । धर्माणां परमं धर्मं ब्रूहि मे ब्रह्मवित्तम ॥ १७.९॥
ityukto'surarājastu punaḥ prāha mahāmunim | dharmāṇāṃ paramaṃ dharmaṃ brūhi me brahmavittama || 17.9||
सोऽब्रवीद् भगवान् योगी दैत्येन्द्राय महात्मने । सर्वगुह्यतमं धर्ममात्मज्ञानमनुत्तमम् ॥ १७.१॥
so'bravīd bhagavān yogī daityendrāya mahātmane | sarvaguhyatamaṃ dharmamātmajñānamanuttamam || 17.1||
स लब्ध्वा परमं ज्ञानं दत्त्वा च गुरुदक्षिणाम् । निधाय पुत्रे तद्राज्यं योगाभ्यासरतोऽभवत् ॥ १७.११॥
sa labdhvā paramaṃ jñānaṃ dattvā ca gurudakṣiṇām | nidhāya putre tadrājyaṃ yogābhyāsarato'bhavat || 17.11||
स तस्य पुत्रो मतिमान् बलिर्नाम महासुरः । ब्रह्मण्यो धार्मिकोऽत्यर्थं विजिग्येऽथ पुरंदरम् ॥ १७.१२॥
sa tasya putro matimān balirnāma mahāsuraḥ | brahmaṇyo dhārmiko'tyarthaṃ vijigye'tha puraṃdaram || 17.12||
कृत्वा तेन महद् युद्धं शक्रः सर्वामरैर्वृतः । जगाम निर्जितो विष्णुं देवं शरणमच्युतम् ॥ १७.१३॥
kṛtvā tena mahad yuddhaṃ śakraḥ sarvāmarairvṛtaḥ | jagāma nirjito viṣṇuṃ devaṃ śaraṇamacyutam || 17.13||
तदन्तरेऽदितिर्देवी देवमाता सुदुः खिता । दैत्येन्द्राणां वधार्थाय पुत्रो मे स्यादिति स्वयम् ॥ १७.१४॥
tadantare'ditirdevī devamātā suduḥ khitā | daityendrāṇāṃ vadhārthāya putro me syāditi svayam || 17.14||
तताप सुमहद् घोरं तपोराशिस्तपः परम् । प्रपन्ना विष्णुमव्यक्तं शरण्यं शरणं हरिम् ॥ १७.१५॥
tatāpa sumahad ghoraṃ taporāśistapaḥ param | prapannā viṣṇumavyaktaṃ śaraṇyaṃ śaraṇaṃ harim || 17.15||
कृत्वा हृत्पद्मकिञ्जल्के निष्कलं परमं पदम् । वासुदेवमनाद्यन्तमानन्दं व्योम केवलम् ॥ १७.१६॥
kṛtvā hṛtpadmakiñjalke niṣkalaṃ paramaṃ padam | vāsudevamanādyantamānandaṃ vyoma kevalam || 17.16||
प्रसन्नो भगवान् विष्णुः शङ्खचक्रगदाधरः । आविर्बभूव योगात्मा देवमातुः पुरो हरिः ॥ १७.१७॥
prasanno bhagavān viṣṇuḥ śaṅkhacakragadādharaḥ | āvirbabhūva yogātmā devamātuḥ puro hariḥ || 17.17||
दृष्ट्वा समागतं विष्णुमदितिर्भक्तिसंयुता । मेने कृतार्थमात्मानं तोषयामास केशवम् ॥ १७.१८॥
dṛṣṭvā samāgataṃ viṣṇumaditirbhaktisaṃyutā | mene kṛtārthamātmānaṃ toṣayāmāsa keśavam || 17.18||
अदितिरुवाच ।
जयाशेषदुःखौघनाशैकहेतो जयानन्तमाहात्म्ययोगाभियुक्त । जयानादिमध्यान्तविज्ञानमूर्त्ते जयाशेषकल्पामलानन्दरूप ॥ १७.१९॥
jayāśeṣaduḥkhaughanāśaikaheto jayānantamāhātmyayogābhiyukta | jayānādimadhyāntavijñānamūrtte jayāśeṣakalpāmalānandarūpa || 17.19||
नमो विष्णवे कालरूपाय तुभ्यं नमो नारसिंहाय शेषाय तुभ्यम् । नमः कालरुद्राय संहारकर्त्रे नमो वासुदेवाय तुभ्यं नमस्ते ॥ १७.२॥
namo viṣṇave kālarūpāya tubhyaṃ namo nārasiṃhāya śeṣāya tubhyam | namaḥ kālarudrāya saṃhārakartre namo vāsudevāya tubhyaṃ namaste || 17.2||
नमो विश्वमायाविधानाय तुभ्यं नमो योगगम्याय सत्याय तुभ्यम् । नमो धर्मविज्ञाननिष्ठाय तुभ्यं नमस्ते वराहाय भूयो नमस्ते ॥ १७.२१॥
namo viśvamāyāvidhānāya tubhyaṃ namo yogagamyāya satyāya tubhyam | namo dharmavijñānaniṣṭhāya tubhyaṃ namaste varāhāya bhūyo namaste || 17.21||
नमस्ते सहस्त्रार्कचन्द्राभमूर्त्ते नमो वेदविज्ञानधर्माभिगम्य । नमो देवदेवादिदेवाय तुभ्यं प्रभो विश्वयोनेऽथ भूयो नमस्ते ॥ १७.२२॥
namaste sahastrārkacandrābhamūrtte namo vedavijñānadharmābhigamya | namo devadevādidevāya tubhyaṃ prabho viśvayone'tha bhūyo namaste || 17.22||
नमः शंभवे सत्यनिष्ठाय तुभ्यं नमो हेतवे विश्वरूपाय तुभ्यम् । नमो योगपीठान्तरस्थाय तुभ्यं शिवायैकरूपाय भूयो नमस्ते ॥ १७.२३॥
namaḥ śaṃbhave satyaniṣṭhāya tubhyaṃ namo hetave viśvarūpāya tubhyam | namo yogapīṭhāntarasthāya tubhyaṃ śivāyaikarūpāya bhūyo namaste || 17.23||
एवं स भगवान् कृष्णो देवमात्रा जगन्मयः । तोषितश्छंदयामास वरेण प्रहसन्निव ॥ १७.२४॥
evaṃ sa bhagavān kṛṣṇo devamātrā jaganmayaḥ | toṣitaśchaṃdayāmāsa vareṇa prahasanniva || 17.24||
प्रणम्य शिरसा भूमौ सा वब्रे वरमुत्तमम् । त्वामेव पुत्रं देवानां हिताय वरये वरम् ॥ १७.२५॥
praṇamya śirasā bhūmau sā vabre varamuttamam | tvāmeva putraṃ devānāṃ hitāya varaye varam || 17.25||
तथास्त्वित्याह भगवान् प्रपन्नजनवत्सलः । दत्त्वा वरानप्रमेयस्तत्रैवान्तरधीयत ॥ १७.२६॥
tathāstvityāha bhagavān prapannajanavatsalaḥ | dattvā varānaprameyastatraivāntaradhīyata || 17.26||
ततो बहुतिथे काले भगवन्तं जनार्दनम् । दधार गर्भं देवानां माता नारायणं स्वयम् ॥ १७.२७॥
tato bahutithe kāle bhagavantaṃ janārdanam | dadhāra garbhaṃ devānāṃ mātā nārāyaṇaṃ svayam || 17.27||
समाविष्टे हृषीकेशे देवमातुरथोदरम् । उत्पाता जज्ञिरे घोरा बलेर्वैरोचनेः पुरे ॥ १७.२८॥
samāviṣṭe hṛṣīkeśe devamāturathodaram | utpātā jajñire ghorā balervairocaneḥ pure || 17.28||
निरीक्ष्य सर्वानुत्पातान् दैत्येन्द्रो भयविह्वलः । प्रह्लादमसुरं वृद्धं प्रणम्याह पितामहम् ॥ १७.२९॥
nirīkṣya sarvānutpātān daityendro bhayavihvalaḥ | prahlādamasuraṃ vṛddhaṃ praṇamyāha pitāmaham || 17.29||
बलिरुवाच ।
पितामह महाप्राज्ञ जायन्तेऽस्मत्पुरेऽधुना । किमुत्पातो भवेत् कार्यमस्माकं किंनिमित्तकाः ॥ १७.३॥
pitāmaha mahāprājña jāyante'smatpure'dhunā | kimutpāto bhavet kāryamasmākaṃ kiṃnimittakāḥ || 17.3||
निशम्य तस्य वचनं चिरं ध्यात्वा महासुरः । नमस्कृत्य हृषीकेशमिदं वचनमब्रवीत् ॥ १७.३१॥
niśamya tasya vacanaṃ ciraṃ dhyātvā mahāsuraḥ | namaskṛtya hṛṣīkeśamidaṃ vacanamabravīt || 17.31||
प्रह्लाद उवाच ।
यो यज्ञैरिज्यते विष्णुर्यस्य सर्वमिदं जगत् । दधारासुरनाशार्थं माता तं त्रिदिवौकसाम् ॥ १७.३२॥
yo yajñairijyate viṣṇuryasya sarvamidaṃ jagat | dadhārāsuranāśārthaṃ mātā taṃ tridivaukasām || 17.32||
यस्मादभिन्नं सकलं भिद्यते योऽखिलादपि । स वासुदेवो देवानां मातुर्देहं समाविशत् ॥ १७.३३॥
yasmādabhinnaṃ sakalaṃ bhidyate yo'khilādapi | sa vāsudevo devānāṃ māturdehaṃ samāviśat || 17.33||
न यस्य देवा जानन्ति स्वरूपं परमार्थतः । स विष्णुरदितेर्देहं स्वेच्छयाऽद्य समाविशत् ॥ १७.३४॥
na yasya devā jānanti svarūpaṃ paramārthataḥ | sa viṣṇuraditerdehaṃ svecchayā'dya samāviśat || 17.34||
यस्माद् भवन्ति भूतानि यत्र संयान्ति संक्षयम् । सोऽवतीर्णो महायोगी पुराणपुरुषो हरिः ॥ १७.३५॥
yasmād bhavanti bhūtāni yatra saṃyānti saṃkṣayam | so'vatīrṇo mahāyogī purāṇapuruṣo hariḥ || 17.35||
न यत्र विद्यते नामजात्यादिपरिकल्पना । सत्तामात्रात्मरूपोऽसौ विष्णुरंशेन जायते ॥ १७.३६॥
na yatra vidyate nāmajātyādiparikalpanā | sattāmātrātmarūpo'sau viṣṇuraṃśena jāyate || 17.36||
यस्य सा जगतां माता शक्तिस्तद्धर्मधारिणी । माया भगवती लक्ष्मीः सोऽवतीर्णो जनार्दनः ॥ १७.३७॥
yasya sā jagatāṃ mātā śaktistaddharmadhāriṇī | māyā bhagavatī lakṣmīḥ so'vatīrṇo janārdanaḥ || 17.37||
यस्य सा तामसी मूर्त्तिः शंकरो राजसी तनुः । ब्रह्मा संजायते विष्णुरंशेनैकेन सत्त्वभृत् ॥ १७.३८॥
yasya sā tāmasī mūrttiḥ śaṃkaro rājasī tanuḥ | brahmā saṃjāyate viṣṇuraṃśenaikena sattvabhṛt || 17.38||
इत्थं विचिन्त्य गोविन्दं भक्तिनम्रेण चेतसा । तमेव गच्छ शरणं ततो यास्यसि निर्वृतिम् ॥ १७.३९॥
itthaṃ vicintya govindaṃ bhaktinamreṇa cetasā | tameva gaccha śaraṇaṃ tato yāsyasi nirvṛtim || 17.39||
ततः प्रह्लादवचनाद् बलिर्वैरोचनिर्हरिम् । जगाम शरणं विश्वं पालयामास धर्मतः ॥ १७.४॥
tataḥ prahlādavacanād balirvairocanirharim | jagāma śaraṇaṃ viśvaṃ pālayāmāsa dharmataḥ || 17.4||
काले प्राप्ते महाविष्णुं देवानां हर्षवर्द्धनम् । असूत कश्यपाच्चैनं देवमाताऽदितिः स्वयम् ॥ १७.४१॥
kāle prāpte mahāviṣṇuṃ devānāṃ harṣavarddhanam | asūta kaśyapāccainaṃ devamātā'ditiḥ svayam || 17.41||
चतुर्भुजं विशालाक्षं श्रीवत्साङ्कितवक्षसम् । नीलमेघप्रतीकाशं भ्राजमानं श्रियावृतम् ॥ १७.४२॥
caturbhujaṃ viśālākṣaṃ śrīvatsāṅkitavakṣasam | nīlameghapratīkāśaṃ bhrājamānaṃ śriyāvṛtam || 17.42||
उपतस्थुः सुराः सर्वे सिद्धाः साध्याश्च चारणाः । उपेन्द्र इन्द्रप्रमुखा ब्रह्मा चर्षिगणैर्वृतः ॥ १७.४३॥
upatasthuḥ surāḥ sarve siddhāḥ sādhyāśca cāraṇāḥ | upendra indrapramukhā brahmā carṣigaṇairvṛtaḥ || 17.43||
कृतोपनयनो वेदानध्यैष्ट भगवान् हरिः । समाचारं भरद्वाजात् त्रिलोकाय प्रदर्शयन् ॥ १७.४४॥
kṛtopanayano vedānadhyaiṣṭa bhagavān hariḥ | samācāraṃ bharadvājāt trilokāya pradarśayan || 17.44||
एवं हि लौकिकं मार्गं प्रदर्शयति स प्रभुः । स यत् प्रमाणं कुरुते लोकस्तदनुवर्तते ॥ १७.४५॥
evaṃ hi laukikaṃ mārgaṃ pradarśayati sa prabhuḥ | sa yat pramāṇaṃ kurute lokastadanuvartate || 17.45||
ततः कालेन मतिमान् बलिर्वैरोचनिः स्वयम् । यज्ञैर्यज्ञेश्वरं विष्णुमर्चयामास सर्वगम् ॥ १७.४६॥
tataḥ kālena matimān balirvairocaniḥ svayam | yajñairyajñeśvaraṃ viṣṇumarcayāmāsa sarvagam || 17.46||
ब्राह्मणान् पूजयामास दत्त्वा बहुतरं धनम् । ब्रह्मर्षयः समाजग्मुर्यज्ञवाटं महात्मनः ॥ १७.४७॥
brāhmaṇān pūjayāmāsa dattvā bahutaraṃ dhanam | brahmarṣayaḥ samājagmuryajñavāṭaṃ mahātmanaḥ || 17.47||
विज्ञाय विष्णुर्भगवान् भरद्वाजप्रचोदितः । आस्थाय वामनं रूपं यज्ञदेशमथागमत् ॥ १७.४८॥
vijñāya viṣṇurbhagavān bharadvājapracoditaḥ | āsthāya vāmanaṃ rūpaṃ yajñadeśamathāgamat || 17.48||
कृष्णाजिनोपवीताङ्ग आषाढेन विराजितः । ब्राह्मणो जटिलो वेदानुद्गिरन् भस्ममण्डितः ॥ १७.४९॥
kṛṣṇājinopavītāṅga āṣāḍhena virājitaḥ | brāhmaṇo jaṭilo vedānudgiran bhasmamaṇḍitaḥ || 17.49||
संप्राप्यासुरराजस्य समीपं भिक्षुको हरिः । स्वपद्भ्यां क्रमितं देशमयाचत बलिं त्रिभिः ॥ १७.५॥
saṃprāpyāsurarājasya samīpaṃ bhikṣuko hariḥ | svapadbhyāṃ kramitaṃ deśamayācata baliṃ tribhiḥ || 17.5||
प्रक्षाल्य चरणौ विष्णोर्बलिर्भावसमन्वितः । आचामयित्वा भृङ्गारमादाय स्वर्णनिर्मितम् ॥ १७.५१॥
prakṣālya caraṇau viṣṇorbalirbhāvasamanvitaḥ | ācāmayitvā bhṛṅgāramādāya svarṇanirmitam || 17.51||
दास्ये तवेदं भवते पदत्रयं प्रीणातु देवो हरिरव्ययाकृतिः । विचिन्त्य देवस्य कराग्रपल्लवे निपातयामास जलं सुशीतलम् ॥ १७.५२॥
dāsye tavedaṃ bhavate padatrayaṃ prīṇātu devo hariravyayākṛtiḥ | vicintya devasya karāgrapallave nipātayāmāsa jalaṃ suśītalam || 17.52||
विचक्रमे पृथिवीमेष चैता- मथान्तरिक्षं दिवमादिदेवः । व्यपेतरागं दितिजेश्वरं तं प्रकर्तुकामः शरणं प्रपन्नम् ॥ १७.५३॥
vicakrame pṛthivīmeṣa caitā- mathāntarikṣaṃ divamādidevaḥ | vyapetarāgaṃ ditijeśvaraṃ taṃ prakartukāmaḥ śaraṇaṃ prapannam || 17.53||
आक्रम्य लोकत्रयमीशपादः प्राजापत्याद् ब्रह्मलोकं जगाम । प्रणेमुरादित्यसहस्त्रकल्पं ये तत्र लोके निवसन्ति सिद्धाः ॥ १७.५४॥
ākramya lokatrayamīśapādaḥ prājāpatyād brahmalokaṃ jagāma | praṇemurādityasahastrakalpaṃ ye tatra loke nivasanti siddhāḥ || 17.54||
अथोपतस्थे भगवाननादिः पितामहास्तोषयामास विष्णुम् । भित्त्वा तदण्डस्य कपालमूर्ध्वं जगाम दिव्याभरणानि भूयः ॥ १७.५५॥
athopatasthe bhagavānanādiḥ pitāmahāstoṣayāmāsa viṣṇum | bhittvā tadaṇḍasya kapālamūrdhvaṃ jagāma divyābharaṇāni bhūyaḥ || 17.55||
अथाण्डभेदान्निपपात शीतलं महाजलं तत् पुण्यकृद्भिश्चजुष्टम् । प्रवर्तते चापि सरिद्वरा तदा गङ्गेत्युक्त्वा ब्रह्मणा व्योमसंस्था ॥ १७.५६॥
athāṇḍabhedānnipapāta śītalaṃ mahājalaṃ tat puṇyakṛdbhiścajuṣṭam | pravartate cāpi saridvarā tadā gaṅgetyuktvā brahmaṇā vyomasaṃsthā || 17.56||
गत्वा महान्तं प्रकृतिं प्रधानं ब्रह्माणमेकं पुरुषं स्वबीजम् । अतिष्ठदीशस्य पदं तदव्ययं दृष्ट्वा देवास्तत्र तत्र स्तुवन्ति ॥ १७.५७॥
gatvā mahāntaṃ prakṛtiṃ pradhānaṃ brahmāṇamekaṃ puruṣaṃ svabījam | atiṣṭhadīśasya padaṃ tadavyayaṃ dṛṣṭvā devāstatra tatra stuvanti || 17.57||
आलोक्य तं पुरुषं विश्वकायं महान् बलिर्भक्तियोगेन विष्णुम् । ननाम नारायणमेकमव्ययं स्वचेतसा यं प्रणमन्ति वेदाः ॥ १७.५८॥
ālokya taṃ puruṣaṃ viśvakāyaṃ mahān balirbhaktiyogena viṣṇum | nanāma nārāyaṇamekamavyayaṃ svacetasā yaṃ praṇamanti vedāḥ || 17.58||
तमब्रवीद् भगवानादिकर्त्ता भूत्वा पुनर्वामनो वासुदेवः । ममैव दैत्याधिपतेऽधुनेदं लोकत्रयं भवता भावदत्तम् ॥ १७.५९॥
tamabravīd bhagavānādikarttā bhūtvā punarvāmano vāsudevaḥ | mamaiva daityādhipate'dhunedaṃ lokatrayaṃ bhavatā bhāvadattam || 17.59||
प्रणम्य मूर्ध्ना पुनरेव दैत्यो निपातयामास जलं कराग्रे । दास्ये तवात्मानमनन्तधाम्ने त्रिविक्रमायामितविक्रमाय ॥ १७.६॥
praṇamya mūrdhnā punareva daityo nipātayāmāsa jalaṃ karāgre | dāsye tavātmānamanantadhāmne trivikramāyāmitavikramāya || 17.6||
प्रगृह्य सूनोरपि संप्रदत्तं प्रह्लादसूनोरथ शङ्खपाणिः । जगाद दैत्यं जगदन्तरात्मा पातालमूलं प्रविशेति भूयः ॥ १७.६१॥
pragṛhya sūnorapi saṃpradattaṃ prahlādasūnoratha śaṅkhapāṇiḥ | jagāda daityaṃ jagadantarātmā pātālamūlaṃ praviśeti bhūyaḥ || 17.61||
समास्यतां भवता तत्र नित्यं भुक्त्वा भोगान् देवतानामलभ्यान् । ध्यायस्व मां सततं भक्तियोगात् प्रवेक्ष्यसे कल्पदाहे पुनर्माम् ॥ १७.६२॥
samāsyatāṃ bhavatā tatra nityaṃ bhuktvā bhogān devatānāmalabhyān | dhyāyasva māṃ satataṃ bhaktiyogāt pravekṣyase kalpadāhe punarmām || 17.62||
उक्त्वैवं दैत्यसिंहं तं विष्णुः सत्यपराक्रमः । पुरंदराय त्रैलोक्यं ददौ विष्णुरुरुक्रमः ॥ १७.६३॥
uktvaivaṃ daityasiṃhaṃ taṃ viṣṇuḥ satyaparākramaḥ | puraṃdarāya trailokyaṃ dadau viṣṇururukramaḥ || 17.63||
संस्तुवन्ति महायोगं सिद्धा देवर्षिकिन्नराः । ब्रह्मा शक्रोऽथ भगवान् रुद्रादित्यमरुद्गणाः ॥ १७.६४॥
saṃstuvanti mahāyogaṃ siddhā devarṣikinnarāḥ | brahmā śakro'tha bhagavān rudrādityamarudgaṇāḥ || 17.64||
कृत्वैतदद्भुतं कर्म विष्णुर्वामनरूपधृक् । पश्यतामेव सर्वेषां तत्रैवान्तरधीयत ॥ १७.६५॥
kṛtvaitadadbhutaṃ karma viṣṇurvāmanarūpadhṛk | paśyatāmeva sarveṣāṃ tatraivāntaradhīyata || 17.65||
सोऽपि दैत्यवरः श्रीमान् पातालं प्राप चोदितः । प्रह्लादेनासुरवरैर्विष्णु भक्तस्तुतत्परः ॥ १७.६६॥
so'pi daityavaraḥ śrīmān pātālaṃ prāpa coditaḥ | prahlādenāsuravarairviṣṇu bhaktastutatparaḥ || 17.66||
अपृच्छद् विष्णुमाहात्मयं भक्तियोगमनुत्तमम् । पूजाविधानं प्रह्लादं तदाहासौ चकार सः ॥ १७.६७॥
apṛcchad viṣṇumāhātmayaṃ bhaktiyogamanuttamam | pūjāvidhānaṃ prahlādaṃ tadāhāsau cakāra saḥ || 17.67||
अथ रथचरणंसशङ्खपाणिं सरसिजोलचनमीशमप्रमेयम् । शरणमुपपयौ स भावयोगात् प्रणयगतिं प्रणिधाय कर्मयोगम् ॥ १७.६८॥
atha rathacaraṇaṃsaśaṅkhapāṇiṃ sarasijolacanamīśamaprameyam | śaraṇamupapayau sa bhāvayogāt praṇayagatiṃ praṇidhāya karmayogam || 17.68||
एष वः कथितो विप्रा वामनस्य पराक्रमः । स देवकार्याणि सदा करोति पुरुषोत्तमः ॥ १७.६९॥
eṣa vaḥ kathito viprā vāmanasya parākramaḥ | sa devakāryāṇi sadā karoti puruṣottamaḥ || 17.69||
इति श्रीकूर्मपुराणे षट्साहस्त्र्यां संहितायां पूर्वविभागे सप्तदशोऽध्याय॥ ॥
iti śrīkūrmapurāṇe ṣaṭsāhastryāṃ saṃhitāyāṃ pūrvavibhāge saptadaśo'dhyāya|| ||
ॐ श्री परमात्मने नमः