Gyaandweep | Rig Veda Mandala , 1

अ॒ग्निमी॑ळे पु॒रोहि॑तं य॒ज्ञस्य॑ दे॒वमृ॒त्विज॑म् । होता॑रं रत्न॒धात॑मम् ॥ १.१.१ ॥

a̱gnimī̍ḻe pu̱rohi̍taṁ ya̱jñasya̍ de̱vamṛ̱tvija̍m | hotā̍raṁ ratna̱dhāta̍mam || 1.001.01 ||

अ॒ग्निः पूर्वे॑भि॒रृषि॑भि॒रीड्यो॒ नूत॑नैरु॒त । स दे॒वाँ एह व॑क्षति ॥ १.१.२ ॥

a̱gniḥ pūrve̍bhi̱rṛṣi̍bhi̱rīḍyo̱ nūta̍nairu̱ta | sa de̱vā eha va̍kṣati || 1.001.02 ||

अ॒ग्निना॑ र॒यिम॑श्नव॒त्पोष॑मे॒व दि॒वेदि॑वे । य॒शसं॑ वी॒रव॑त्तमम् ॥ १.१.३ ॥

a̱gninā̍ ra̱yima̍śnava̱tpoṣa̍me̱va di̱vedi̍ve | ya̱śasa̍ṁ vī̱rava̍ttamam || 1.001.03 ||

अग्ने॒ यं य॒ज्ञम॑ध्व॒रं वि॒श्वतः॑ परि॒भूरसि॑ । स इद्दे॒वेषु॑ गच्छति ॥ १.१.४ ॥

agne̱ yaṁ ya̱jñama̍dhva̱raṁ vi̱śvata̍ḥ pari̱bhūrasi̍ | sa idde̱veṣu̍ gacchati || 1.001.04 ||

अ॒ग्निर्होता॑ क॒विक्र॑तुः स॒त्यश्चि॒त्रश्र॑वस्तमः । दे॒वो दे॒वेभि॒रा ग॑मत् ॥ १.१.५ ॥

a̱gnirhotā̍ ka̱vikra̍tuḥ sa̱tyaści̱traśra̍vastamaḥ | de̱vo de̱vebhi̱rā ga̍mat || 1.001.05 ||

यद॒ङ्ग दा॒शुषे॒ त्वमग्ने॑ भ॒द्रं क॑रि॒ष्यसि॑ । तवेत्तत्स॒त्यम॑ङ्गिरः ॥ १.१.६ ॥

yada̱ṅga dā̱śuṣe̱ tvamagne̍ bha̱draṁ ka̍ri̱ṣyasi̍ | tavettatsa̱tyama̍ṅgiraḥ || 1.001.06 ||

उप॑ त्वाग्ने दि॒वेदि॑वे॒ दोषा॑वस्तर्धि॒या व॒यम् । नमो॒ भर॑न्त॒ एम॑सि ॥ १.१.७ ॥

upa̍ tvāgne di̱vedi̍ve̱ doṣā̍vastardhi̱yā va̱yam | namo̱ bhara̍nta̱ ema̍si || 1.001.07 ||

राज॑न्तमध्व॒राणां॑ गो॒पामृ॒तस्य॒ दीदि॑विम् । वर्ध॑मानं॒ स्वे दमे॑ ॥ १.१.८ ॥

rāja̍ntamadhva̱rāṇā̍ṁ go̱pāmṛ̱tasya̱ dīdi̍vim | vardha̍māna̱ṁ sve dame̍ || 1.001.08 ||

स नः॑ पि॒तेव॑ सू॒नवेऽग्ने॑ सूपाय॒नो भ॑व । सच॑स्वा नः स्व॒स्तये॑ ॥ १.१.९ ॥

sa na̍ḥ pi̱teva̍ sū̱nave'gne̍ sūpāya̱no bha̍va | saca̍svā naḥ sva̱staye̍ || 1.001.09 ||

Languages