Gyaandweep | Rig Veda Mandala , 1

गाय॑न्ति त्वा गाय॒त्रिणोऽर्च॑न्त्य॒र्कम॒र्किणः॑ । ब्र॒ह्माण॑स्त्वा शतक्रत॒ उद्वं॒शमि॑व येमिरे ॥ १.१०.०१ ॥

gāya̍nti tvā gāya̱triṇo'rca̍ntya̱rkama̱rkiṇa̍ḥ | bra̱hmāṇa̍stvā śatakrata̱ udva̱ṁśami̍va yemire || 1.010.01 ||

यत्सानोः॒ सानु॒मारु॑ह॒द्भूर्यस्प॑ष्ट॒ कर्त्व॑म् । तदिन्द्रो॒ अर्थं॑ चेतति यू॒थेन॑ वृ॒ष्णिरे॑जति ॥ १.१०.०२ ॥

yatsāno̱ḥ sānu̱māru̍ha̱dbhūryaspa̍ṣṭa̱ kartva̍m | tadindro̱ artha̍ṁ cetati yū̱thena̍ vṛ̱ṣṇire̍jati || 1.010.02 ||

यु॒क्ष्वा हि के॒शिना॒ हरी॒ वृष॑णा कक्ष्य॒प्रा । अथा॑ न इन्द्र सोमपा गि॒रामुप॑श्रुतिं चर ॥ १.१०.०३ ॥

yu̱kṣvā hi ke̱śinā̱ harī̱ vṛṣa̍ṇā kakṣya̱prā | athā̍ na indra somapā gi̱rāmupa̍śrutiṁ cara || 1.010.03 ||

एहि॒ स्तोमा॑ँ अ॒भि स्व॑रा॒भि गृ॑णी॒ह्या रु॑व । ब्रह्म॑ च नो वसो॒ सचेन्द्र॑ य॒ज्ञं च॑ वर्धय ॥ १.१०.०४ ॥

ehi̱ stomā̍ a̱bhi sva̍rā̱bhi gṛ̍ṇī̱hyā ru̍va | brahma̍ ca no vaso̱ sacendra̍ ya̱jñaṁ ca̍ vardhaya || 1.010.04 ||

उ॒क्थमिन्द्रा॑य॒ शंस्यं॒ वर्ध॑नं पुरुनि॒ष्षिधे॑ । श॒क्रो यथा॑ सु॒तेषु॑ णो रा॒रण॑त्स॒ख्येषु॑ च ॥ १.१०.०५ ॥

u̱kthamindrā̍ya̱ śaṁsya̱ṁ vardha̍naṁ puruni̱ṣṣidhe̍ | śa̱kro yathā̍ su̱teṣu̍ ṇo rā̱raṇa̍tsa̱khyeṣu̍ ca || 1.010.05 ||

तमित्स॑खि॒त्व ई॑महे॒ तं रा॒ये तं सु॒वीर्ये॑ । स श॒क्र उ॒त नः॑ शक॒दिन्द्रो॒ वसु॒ दय॑मानः ॥ १.१०.०६ ॥

tamitsa̍khi̱tva ī̍mahe̱ taṁ rā̱ye taṁ su̱vīrye̍ | sa śa̱kra u̱ta na̍ḥ śaka̱dindro̱ vasu̱ daya̍mānaḥ || 1.010.06 ||

सु॒वि॒वृतं॑ सुनि॒रज॒मिन्द्र॒ त्वादा॑त॒मिद्यशः॑ । गवा॒मप॑ व्र॒जं वृ॑धि कृणु॒ष्व राधो॑ अद्रिवः ॥ १.१०.०७ ॥

su̱vi̱vṛta̍ṁ suni̱raja̱mindra̱ tvādā̍ta̱midyaśa̍ḥ | gavā̱mapa̍ vra̱jaṁ vṛ̍dhi kṛṇu̱ṣva rādho̍ adrivaḥ || 1.010.07 ||

न॒हि त्वा॒ रोद॑सी उ॒भे ऋ॑घा॒यमा॑ण॒मिन्व॑तः । जेषः॒ स्व॑र्वतीर॒पः सं गा अ॒स्मभ्यं॑ धूनुहि ॥ १.१०.०८ ॥

na̱hi tvā̱ roda̍sī u̱bhe ṛ̍ghā̱yamā̍ṇa̱minva̍taḥ | jeṣa̱ḥ sva̍rvatīra̱paḥ saṁ gā a̱smabhya̍ṁ dhūnuhi || 1.010.08 ||

आश्रु॑त्कर्ण श्रु॒धी हवं॒ नू चि॑द्दधिष्व मे॒ गिरः॑ । इन्द्र॒ स्तोम॑मि॒मं मम॑ कृ॒ष्वा यु॒जश्चि॒दन्त॑रम् ॥ १.१०.०९ ॥

āśru̍tkarṇa śru̱dhī hava̱ṁ nū ci̍ddadhiṣva me̱ gira̍ḥ | indra̱ stoma̍mi̱maṁ mama̍ kṛ̱ṣvā yu̱jaści̱danta̍ram || 1.010.09 ||

वि॒द्मा हि त्वा॒ वृष॑न्तमं॒ वाजे॑षु हवन॒श्रुत॑म् । वृष॑न्तमस्य हूमह ऊ॒तिं स॑हस्र॒सात॑माम् ॥ १.१०.१० ॥

vi̱dmā hi tvā̱ vṛṣa̍ntama̱ṁ vāje̍ṣu havana̱śruta̍m | vṛṣa̍ntamasya hūmaha ū̱tiṁ sa̍hasra̱sāta̍mām || 1.010.10 ||

आ तू न॑ इन्द्र कौशिक मन्दसा॒नः सु॒तं पि॑ब । नव्य॒मायुः॒ प्र सू ति॑र कृ॒धी स॑हस्र॒सामृषि॑म् ॥ १.१०.११ ॥

ā tū na̍ indra kauśika mandasā̱naḥ su̱taṁ pi̍ba | navya̱māyu̱ḥ pra sū ti̍ra kṛ̱dhī sa̍hasra̱sāmṛṣi̍m || 1.010.11 ||

परि॑ त्वा गिर्वणो॒ गिर॑ इ॒मा भ॑वन्तु वि॒श्वतः॑ । वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑यः ॥ १.१०.१२ ॥

pari̍ tvā girvaṇo̱ gira̍ i̱mā bha̍vantu vi̱śvata̍ḥ | vṛ̱ddhāyu̱manu̱ vṛddha̍yo̱ juṣṭā̍ bhavantu̱ juṣṭa̍yaḥ || 1.010.12 ||

Languages