योनि॑ष्ट इन्द्र नि॒षदे॑ अकारि॒ तमा नि षी॑द स्वा॒नो नार्वा॑ । वि॒मुच्या॒ वयो॑ऽव॒सायाश्वा॑न्दो॒षा वस्तो॒र्वही॑यसः प्रपि॒त्वे ॥ १.१०४.०१ ॥
yoni̍ṣṭa indra ni̱ṣade̍ akāri̱ tamā ni ṣī̍da svā̱no nārvā̍ | vi̱mucyā̱ vayo̍'va̱sāyāśvā̍ndo̱ṣā vasto̱rvahī̍yasaḥ prapi̱tve || 1.104.01 ||
ओ त्ये नर॒ इन्द्र॑मू॒तये॑ गु॒र्नू चि॒त्तान्स॒द्यो अध्व॑नो जगम्यात् । दे॒वासो॑ म॒न्युं दास॑स्य श्चम्न॒न्ते न॒ आ व॑क्षन्सुवि॒ताय॒ वर्ण॑म् ॥ १.१०४.०२ ॥
o tye nara̱ indra̍mū̱taye̍ gu̱rnū ci̱ttānsa̱dyo adhva̍no jagamyāt | de̱vāso̍ ma̱nyuṁ dāsa̍sya ścamna̱nte na̱ ā va̍kṣansuvi̱tāya̱ varṇa̍m || 1.104.02 ||
अव॒ त्मना॑ भरते॒ केत॑वेदा॒ अव॒ त्मना॑ भरते॒ फेन॑मु॒दन् । क्षी॒रेण॑ स्नातः॒ कुय॑वस्य॒ योषे॑ ह॒ते ते स्या॑तां प्रव॒णे शिफा॑याः ॥ १.१०४.०३ ॥
ava̱ tmanā̍ bharate̱ keta̍vedā̱ ava̱ tmanā̍ bharate̱ phena̍mu̱dan | kṣī̱reṇa̍ snāta̱ḥ kuya̍vasya̱ yoṣe̍ ha̱te te syā̍tāṁ prava̱ṇe śiphā̍yāḥ || 1.104.03 ||
यु॒योप॒ नाभि॒रुप॑रस्या॒योः प्र पूर्वा॑भिस्तिरते॒ राष्टि॒ शूरः॑ । अ॒ञ्ज॒सी कु॑लि॒शी वी॒रप॑त्नी॒ पयो॑ हिन्वा॒ना उ॒दभि॑र्भरन्ते ॥ १.१०४.०४ ॥
yu̱yopa̱ nābhi̱rupa̍rasyā̱yoḥ pra pūrvā̍bhistirate̱ rāṣṭi̱ śūra̍ḥ | a̱ñja̱sī ku̍li̱śī vī̱rapa̍tnī̱ payo̍ hinvā̱nā u̱dabhi̍rbharante || 1.104.04 ||
प्रति॒ यत्स्या नीथाद॑र्शि॒ दस्यो॒रोको॒ नाच्छा॒ सद॑नं जान॒ती गा॑त् । अध॑ स्मा नो मघवञ्चर्कृ॒तादिन्मा नो॑ म॒घेव॑ निष्ष॒पी परा॑ दाः ॥ १.१०४.०५ ॥
prati̱ yatsyā nīthāda̍rśi̱ dasyo̱roko̱ nācchā̱ sada̍naṁ jāna̱tī gā̍t | adha̍ smā no maghavañcarkṛ̱tādinmā no̍ ma̱gheva̍ niṣṣa̱pī parā̍ dāḥ || 1.104.05 ||
स त्वं न॑ इन्द्र॒ सूर्ये॒ सो अ॒प्स्व॑नागा॒स्त्व आ भ॑ज जीवशं॒से । मान्त॑रां॒ भुज॒मा री॑रिषो नः॒ श्रद्धि॑तं ते मह॒त इ॑न्द्रि॒याय॑ ॥ १.१०४.०६ ॥
sa tvaṁ na̍ indra̱ sūrye̱ so a̱psva̍nāgā̱stva ā bha̍ja jīvaśa̱ṁse | mānta̍rā̱ṁ bhuja̱mā rī̍riṣo na̱ḥ śraddhi̍taṁ te maha̱ta i̍ndri̱yāya̍ || 1.104.06 ||
अधा॑ मन्ये॒ श्रत्ते॑ अस्मा अधायि॒ वृषा॑ चोदस्व मह॒ते धना॑य । मा नो॒ अकृ॑ते पुरुहूत॒ योना॒विन्द्र॒ क्षुध्य॑द्भ्यो॒ वय॑ आसु॒तिं दाः॑ ॥ १.१०४.०७ ॥
adhā̍ manye̱ śratte̍ asmā adhāyi̱ vṛṣā̍ codasva maha̱te dhanā̍ya | mā no̱ akṛ̍te puruhūta̱ yonā̱vindra̱ kṣudhya̍dbhyo̱ vaya̍ āsu̱tiṁ dā̍ḥ || 1.104.07 ||
मा नो॑ वधीरिन्द्र॒ मा परा॑ दा॒ मा नः॑ प्रि॒या भोज॑नानि॒ प्र मो॑षीः । आ॒ण्डा मा नो॑ मघवञ्छक्र॒ निर्भे॒न्मा नः॒ पात्रा॑ भेत्स॒हजा॑नुषाणि ॥ १.१०४.०८ ॥
mā no̍ vadhīrindra̱ mā parā̍ dā̱ mā na̍ḥ pri̱yā bhoja̍nāni̱ pra mo̍ṣīḥ | ā̱ṇḍā mā no̍ maghavañchakra̱ nirbhe̱nmā na̱ḥ pātrā̍ bhetsa̱hajā̍nuṣāṇi || 1.104.08 ||
अ॒र्वाङेहि॒ सोम॑कामं त्वाहुर॒यं सु॒तस्तस्य॑ पिबा॒ मदा॑य । उ॒रु॒व्यचा॑ ज॒ठर॒ आ वृ॑षस्व पि॒तेव॑ नः शृणुहि हू॒यमा॑नः ॥ १.१०४.०९ ॥
a̱rvāṅehi̱ soma̍kāmaṁ tvāhura̱yaṁ su̱tastasya̍ pibā̱ madā̍ya | u̱ru̱vyacā̍ ja̱ṭhara̱ ā vṛ̍ṣasva pi̱teva̍ naḥ śṛṇuhi hū̱yamā̍naḥ || 1.104.09 ||
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
