Gyaandweep | Rig Veda Mandala , 1

अ॒ग्निं दू॒तं वृ॑णीमहे॒ होता॑रं वि॒श्ववे॑दसम् । अ॒स्य य॒ज्ञस्य॑ सु॒क्रतु॑म् ॥ १.१२.०१ ॥

a̱gniṁ dū̱taṁ vṛ̍ṇīmahe̱ hotā̍raṁ vi̱śvave̍dasam | a̱sya ya̱jñasya̍ su̱kratu̍m || 1.012.01 ||

अ॒ग्निम॑ग्निं॒ हवी॑मभिः॒ सदा॑ हवन्त वि॒श्पति॑म् । ह॒व्य॒वाहं॑ पुरुप्रि॒यम् ॥ १.१२.०२ ॥

a̱gnima̍gni̱ṁ havī̍mabhi̱ḥ sadā̍ havanta vi̱śpati̍m | ha̱vya̱vāha̍ṁ purupri̱yam || 1.012.02 ||

अग्ने॑ दे॒वाँ इ॒हा व॑ह जज्ञा॒नो वृ॒क्तब॑र्हिषे । असि॒ होता॑ न॒ ईड्यः॑ ॥ १.१२.०३ ॥

agne̍ de̱vā i̱hā va̍ha jajñā̱no vṛ̱ktaba̍rhiṣe | asi̱ hotā̍ na̱ īḍya̍ḥ || 1.012.03 ||

ताँ उ॑श॒तो वि बो॑धय॒ यद॑ग्ने॒ यासि॑ दू॒त्य॑म् । दे॒वैरा स॑त्सि ब॒र्हिषि॑ ॥ १.१२.०४ ॥

tā u̍śa̱to vi bo̍dhaya̱ yada̍gne̱ yāsi̍ dū̱tya̍m | de̱vairā sa̍tsi ba̱rhiṣi̍ || 1.012.04 ||

घृता॑हवन दीदिवः॒ प्रति॑ ष्म॒ रिष॑तो दह । अग्ने॒ त्वं र॑क्ष॒स्विनः॑ ॥ १.१२.०५ ॥

ghṛtā̍havana dīdiva̱ḥ prati̍ ṣma̱ riṣa̍to daha | agne̱ tvaṁ ra̍kṣa̱svina̍ḥ || 1.012.05 ||

अ॒ग्निना॒ग्निः समि॑ध्यते क॒विर्गृ॒हप॑ति॒र्युवा॑ । ह॒व्य॒वाड्जु॒ह्वा॑स्यः ॥ १.१२.०६ ॥

a̱gninā̱gniḥ sami̍dhyate ka̱virgṛ̱hapa̍ti̱ryuvā̍ | ha̱vya̱vāḍju̱hvā̍syaḥ || 1.012.06 ||

क॒विम॒ग्निमुप॑ स्तुहि स॒त्यध॑र्माणमध्व॒रे । दे॒वम॑मीव॒चात॑नम् ॥ १.१२.०७ ॥

ka̱vima̱gnimupa̍ stuhi sa̱tyadha̍rmāṇamadhva̱re | de̱vama̍mīva̱cāta̍nam || 1.012.07 ||

यस्त्वाम॑ग्ने ह॒विष्प॑तिर्दू॒तं दे॑व सप॒र्यति॑ । तस्य॑ स्म प्रावि॒ता भ॑व ॥ १.१२.०८ ॥

yastvāma̍gne ha̱viṣpa̍tirdū̱taṁ de̍va sapa̱ryati̍ | tasya̍ sma prāvi̱tā bha̍va || 1.012.08 ||

यो अ॒ग्निं दे॒ववी॑तये ह॒विष्मा॑ँ आ॒विवा॑सति । तस्मै॑ पावक मृळय ॥ १.१२.०९ ॥

yo a̱gniṁ de̱vavī̍taye ha̱viṣmā̍ ā̱vivā̍sati | tasmai̍ pāvaka mṛḻaya || 1.012.09 ||

स नः॑ पावक दीदि॒वोऽग्ने॑ दे॒वाँ इ॒हा व॑ह । उप॑ य॒ज्ञं ह॒विश्च॑ नः ॥ १.१२.१० ॥

sa na̍ḥ pāvaka dīdi̱vo'gne̍ de̱vā i̱hā va̍ha | upa̍ ya̱jñaṁ ha̱viśca̍ naḥ || 1.012.10 ||

स नः॒ स्तवा॑न॒ आ भ॑र गाय॒त्रेण॒ नवी॑यसा । र॒यिं वी॒रव॑ती॒मिष॑म् ॥ १.१२.११ ॥

sa na̱ḥ stavā̍na̱ ā bha̍ra gāya̱treṇa̱ navī̍yasā | ra̱yiṁ vī̱rava̍tī̱miṣa̍m || 1.012.11 ||

अग्ने॑ शु॒क्रेण॑ शो॒चिषा॒ विश्वा॑भिर्दे॒वहू॑तिभिः । इ॒मं स्तोमं॑ जुषस्व नः ॥ १.१२.१२ ॥

agne̍ śu̱kreṇa̍ śo̱ciṣā̱ viśvā̍bhirde̱vahū̍tibhiḥ | i̱maṁ stoma̍ṁ juṣasva naḥ || 1.012.12 ||

Languages