Gyaandweep | Rig Veda Mandala , 1

सुस॑मिद्धो न॒ आ व॑ह दे॒वाँ अ॑ग्ने ह॒विष्म॑ते । होतः॑ पावक॒ यक्षि॑ च ॥ १.१३.०१ ॥

susa̍middho na̱ ā va̍ha de̱vā a̍gne ha̱viṣma̍te | hota̍ḥ pāvaka̱ yakṣi̍ ca || 1.013.01 ||

मधु॑मन्तं तनूनपाद्य॒ज्ञं दे॒वेषु॑ नः कवे । अ॒द्या कृ॑णुहि वी॒तये॑ ॥ १.१३.०२ ॥

madhu̍mantaṁ tanūnapādya̱jñaṁ de̱veṣu̍ naḥ kave | a̱dyā kṛ̍ṇuhi vī̱taye̍ || 1.013.02 ||

नरा॒शंस॑मि॒ह प्रि॒यम॒स्मिन्य॒ज्ञ उप॑ ह्वये । मधु॑जिह्वं हवि॒ष्कृत॑म् ॥ १.१३.०३ ॥

narā̱śaṁsa̍mi̱ha pri̱yama̱sminya̱jña upa̍ hvaye | madhu̍jihvaṁ havi̱ṣkṛta̍m || 1.013.03 ||

अग्ने॑ सु॒खत॑मे॒ रथे॑ दे॒वाँ ई॑ळि॒त आ व॑ह । असि॒ होता॒ मनु॑र्हितः ॥ १.१३.०४ ॥

agne̍ su̱khata̍me̱ rathe̍ de̱vā ī̍ḻi̱ta ā va̍ha | asi̱ hotā̱ manu̍rhitaḥ || 1.013.04 ||

स्तृ॒णी॒त ब॒र्हिरा॑नु॒षग्घृ॒तपृ॑ष्ठं मनीषिणः । यत्रा॒मृत॑स्य॒ चक्ष॑णम् ॥ १.१३.०५ ॥

stṛ̱ṇī̱ta ba̱rhirā̍nu̱ṣagghṛ̱tapṛ̍ṣṭhaṁ manīṣiṇaḥ | yatrā̱mṛta̍sya̱ cakṣa̍ṇam || 1.013.05 ||

वि श्र॑यन्तामृता॒वृधो॒ द्वारो॑ दे॒वीर॑स॒श्चतः॑ । अ॒द्या नू॒नं च॒ यष्ट॑वे ॥ १.१३.०६ ॥

vi śra̍yantāmṛtā̱vṛdho̱ dvāro̍ de̱vīra̍sa̱ścata̍ḥ | a̱dyā nū̱naṁ ca̱ yaṣṭa̍ve || 1.013.06 ||

नक्तो॒षासा॑ सु॒पेश॑सा॒स्मिन्य॒ज्ञ उप॑ ह्वये । इ॒दं नो॑ ब॒र्हिरा॒सदे॑ ॥ १.१३.०७ ॥

nakto̱ṣāsā̍ su̱peśa̍sā̱sminya̱jña upa̍ hvaye | i̱daṁ no̍ ba̱rhirā̱sade̍ || 1.013.07 ||

ता सु॑जि॒ह्वा उप॑ ह्वये॒ होता॑रा॒ दैव्या॑ क॒वी । य॒ज्ञं नो॑ यक्षतामि॒मम् ॥ १.१३.०८ ॥

tā su̍ji̱hvā upa̍ hvaye̱ hotā̍rā̱ daivyā̍ ka̱vī | ya̱jñaṁ no̍ yakṣatāmi̱mam || 1.013.08 ||

इळा॒ सर॑स्वती म॒ही ति॒स्रो दे॒वीर्म॑यो॒भुवः॑ । ब॒र्हिः सी॑दन्त्व॒स्रिधः॑ ॥ १.१३.०९ ॥

iḻā̱ sara̍svatī ma̱hī ti̱sro de̱vīrma̍yo̱bhuva̍ḥ | ba̱rhiḥ sī̍dantva̱sridha̍ḥ || 1.013.09 ||

इ॒ह त्वष्टा॑रमग्रि॒यं वि॒श्वरू॑प॒मुप॑ ह्वये । अ॒स्माक॑मस्तु॒ केव॑लः ॥ १.१३.१० ॥

i̱ha tvaṣṭā̍ramagri̱yaṁ vi̱śvarū̍pa̱mupa̍ hvaye | a̱smāka̍mastu̱ keva̍laḥ || 1.013.10 ||

अव॑ सृजा वनस्पते॒ देव॑ दे॒वेभ्यो॑ ह॒विः । प्र दा॒तुर॑स्तु॒ चेत॑नम् ॥ १.१३.११ ॥

ava̍ sṛjā vanaspate̱ deva̍ de̱vebhyo̍ ha̱viḥ | pra dā̱tura̍stu̱ ceta̍nam || 1.013.11 ||

स्वाहा॑ य॒ज्ञं कृ॑णोत॒नेन्द्रा॑य॒ यज्व॑नो गृ॒हे । तत्र॑ दे॒वाँ उप॑ ह्वये ॥ १.१३.१२ ॥

svāhā̍ ya̱jñaṁ kṛ̍ṇota̱nendrā̍ya̱ yajva̍no gṛ̱he | tatra̍ de̱vā upa̍ hvaye || 1.013.12 ||

Languages