Gyaandweep | Rig Veda Mandala , 1

आ त्वा॑ वहन्तु॒ हर॑यो॒ वृष॑णं॒ सोम॑पीतये । इन्द्र॑ त्वा॒ सूर॑चक्षसः ॥ १.१६.०१ ॥

ā tvā̍ vahantu̱ hara̍yo̱ vṛṣa̍ṇa̱ṁ soma̍pītaye | indra̍ tvā̱ sūra̍cakṣasaḥ || 1.016.01 ||

इ॒मा धा॒ना घृ॑त॒स्नुवो॒ हरी॑ इ॒होप॑ वक्षतः । इन्द्रं॑ सु॒खत॑मे॒ रथे॑ ॥ १.१६.०२ ॥

i̱mā dhā̱nā ghṛ̍ta̱snuvo̱ harī̍ i̱hopa̍ vakṣataḥ | indra̍ṁ su̱khata̍me̱ rathe̍ || 1.016.02 ||

इन्द्रं॑ प्रा॒तर्ह॑वामह॒ इन्द्रं॑ प्रय॒त्य॑ध्व॒रे । इन्द्रं॒ सोम॑स्य पी॒तये॑ ॥ १.१६.०३ ॥

indra̍ṁ prā̱tarha̍vāmaha̱ indra̍ṁ praya̱tya̍dhva̱re | indra̱ṁ soma̍sya pī̱taye̍ || 1.016.03 ||

उप॑ नः सु॒तमा ग॑हि॒ हरि॑भिरिन्द्र के॒शिभिः॑ । सु॒ते हि त्वा॒ हवा॑महे ॥ १.१६.०४ ॥

upa̍ naḥ su̱tamā ga̍hi̱ hari̍bhirindra ke̱śibhi̍ḥ | su̱te hi tvā̱ havā̍mahe || 1.016.04 ||

सेमं नः॒ स्तोम॒मा ग॒ह्युपे॒दं सव॑नं सु॒तम् । गौ॒रो न तृ॑षि॒तः पि॑ब ॥ १.१६.०५ ॥

semaṁ na̱ḥ stoma̱mā ga̱hyupe̱daṁ sava̍naṁ su̱tam | gau̱ro na tṛ̍ṣi̱taḥ pi̍ba || 1.016.05 ||

इ॒मे सोमा॑स॒ इन्द॑वः सु॒तासो॒ अधि॑ ब॒र्हिषि॑ । ताँ इ॑न्द्र॒ सह॑से पिब ॥ १.१६.०६ ॥

i̱me somā̍sa̱ inda̍vaḥ su̱tāso̱ adhi̍ ba̱rhiṣi̍ | tā i̍ndra̱ saha̍se piba || 1.016.06 ||

अ॒यं ते॒ स्तोमो॑ अग्रि॒यो हृ॑दि॒स्पृग॑स्तु॒ शंत॑मः । अथा॒ सोमं॑ सु॒तं पि॑ब ॥ १.१६.०७ ॥

a̱yaṁ te̱ stomo̍ agri̱yo hṛ̍di̱spṛga̍stu̱ śaṁta̍maḥ | athā̱ soma̍ṁ su̱taṁ pi̍ba || 1.016.07 ||

विश्व॒मित्सव॑नं सु॒तमिन्द्रो॒ मदा॑य गच्छति । वृ॒त्र॒हा सोम॑पीतये ॥ १.१६.०८ ॥

viśva̱mitsava̍naṁ su̱tamindro̱ madā̍ya gacchati | vṛ̱tra̱hā soma̍pītaye || 1.016.08 ||

सेमं नः॒ काम॒मा पृ॑ण॒ गोभि॒रश्वैः॑ शतक्रतो । स्तवा॑म त्वा स्वा॒ध्यः॑ ॥ १.१६.०९ ॥

semaṁ na̱ḥ kāma̱mā pṛ̍ṇa̱ gobhi̱raśvai̍ḥ śatakrato | stavā̍ma tvā svā̱dhya̍ḥ || 1.016.09 ||

Languages