Gyaandweep | Rig Veda Mandala , 1

इन्द्रा॒वरु॑णयोर॒हं स॒म्राजो॒रव॒ आ वृ॑णे । ता नो॑ मृळात ई॒दृशे॑ ॥ १.१७.०१ ॥

indrā̱varu̍ṇayora̱haṁ sa̱mrājo̱rava̱ ā vṛ̍ṇe | tā no̍ mṛḻāta ī̱dṛśe̍ || 1.017.01 ||

गन्ता॑रा॒ हि स्थोऽव॑से॒ हवं॒ विप्र॑स्य॒ माव॑तः । ध॒र्तारा॑ चर्षणी॒नाम् ॥ १.१७.०२ ॥

gantā̍rā̱ hi stho'va̍se̱ hava̱ṁ vipra̍sya̱ māva̍taḥ | dha̱rtārā̍ carṣaṇī̱nām || 1.017.02 ||

अ॒नु॒का॒मं त॑र्पयेथा॒मिन्द्रा॑वरुण रा॒य आ । ता वां॒ नेदि॑ष्ठमीमहे ॥ १.१७.०३ ॥

a̱nu̱kā̱maṁ ta̍rpayethā̱mindrā̍varuṇa rā̱ya ā | tā vā̱ṁ nedi̍ṣṭhamīmahe || 1.017.03 ||

यु॒वाकु॒ हि शची॑नां यु॒वाकु॑ सुमती॒नाम् । भू॒याम॑ वाज॒दाव्ना॑म् ॥ १.१७.०४ ॥

yu̱vāku̱ hi śacī̍nāṁ yu̱vāku̍ sumatī̱nām | bhū̱yāma̍ vāja̱dāvnā̍m || 1.017.04 ||

इन्द्रः॑ सहस्र॒दाव्नां॒ वरु॑णः॒ शंस्या॑नाम् । क्रतु॑र्भवत्यु॒क्थ्यः॑ ॥ १.१७.०५ ॥

indra̍ḥ sahasra̱dāvnā̱ṁ varu̍ṇa̱ḥ śaṁsyā̍nām | kratu̍rbhavatyu̱kthya̍ḥ || 1.017.05 ||

तयो॒रिदव॑सा व॒यं स॒नेम॒ नि च॑ धीमहि । स्यादु॒त प्र॒रेच॑नम् ॥ १.१७.०६ ॥

tayo̱ridava̍sā va̱yaṁ sa̱nema̱ ni ca̍ dhīmahi | syādu̱ta pra̱reca̍nam || 1.017.06 ||

इन्द्रा॑वरुण वाम॒हं हु॒वे चि॒त्राय॒ राध॑से । अ॒स्मान्सु जि॒ग्युष॑स्कृतम् ॥ १.१७.०७ ॥

indrā̍varuṇa vāma̱haṁ hu̱ve ci̱trāya̱ rādha̍se | a̱smānsu ji̱gyuṣa̍skṛtam || 1.017.07 ||

इन्द्रा॑वरुण॒ नू नु वां॒ सिषा॑सन्तीषु धी॒ष्वा । अ॒स्मभ्यं॒ शर्म॑ यच्छतम् ॥ १.१७.०८ ॥

indrā̍varuṇa̱ nū nu vā̱ṁ siṣā̍santīṣu dhī̱ṣvā | a̱smabhya̱ṁ śarma̍ yacchatam || 1.017.08 ||

प्र वा॑मश्नोतु सुष्टु॒तिरिन्द्रा॑वरुण॒ यां हु॒वे । यामृ॒धाथे॑ स॒धस्तु॑तिम् ॥ १.१७.०९ ॥

pra vā̍maśnotu suṣṭu̱tirindrā̍varuṇa̱ yāṁ hu̱ve | yāmṛ̱dhāthe̍ sa̱dhastu̍tim || 1.017.09 ||

Languages