Gyaandweep | Rig Veda Mandala , 1

सो॒मानं॒ स्वर॑णं कृणु॒हि ब्र॑ह्मणस्पते । क॒क्षीव॑न्तं॒ य औ॑शि॒जः ॥ १.१८.०१ ॥

so̱māna̱ṁ svara̍ṇaṁ kṛṇu̱hi bra̍hmaṇaspate | ka̱kṣīva̍nta̱ṁ ya au̍śi̱jaḥ || 1.018.01 ||

यो रे॒वान्यो अ॑मीव॒हा व॑सु॒वित्पु॑ष्टि॒वर्ध॑नः । स नः॑ सिषक्तु॒ यस्तु॒रः ॥ १.१८.०२ ॥

yo re̱vānyo a̍mīva̱hā va̍su̱vitpu̍ṣṭi̱vardha̍naḥ | sa na̍ḥ siṣaktu̱ yastu̱raḥ || 1.018.02 ||

मा नः॒ शंसो॒ अर॑रुषो धू॒र्तिः प्रण॒ङ्मर्त्य॑स्य । रक्षा॑ णो ब्रह्मणस्पते ॥ १.१८.०३ ॥

mā na̱ḥ śaṁso̱ ara̍ruṣo dhū̱rtiḥ praṇa̱ṅmartya̍sya | rakṣā̍ ṇo brahmaṇaspate || 1.018.03 ||

स घा॑ वी॒रो न रि॑ष्यति॒ यमिन्द्रो॒ ब्रह्म॑ण॒स्पतिः॑ । सोमो॑ हि॒नोति॒ मर्त्य॑म् ॥ १.१८.०४ ॥

sa ghā̍ vī̱ro na ri̍ṣyati̱ yamindro̱ brahma̍ṇa̱spati̍ḥ | somo̍ hi̱noti̱ martya̍m || 1.018.04 ||

त्वं तं ब्र॑ह्मणस्पते॒ सोम॒ इन्द्र॑श्च॒ मर्त्य॑म् । दक्षि॑णा पा॒त्वंह॑सः ॥ १.१८.०५ ॥

tvaṁ taṁ bra̍hmaṇaspate̱ soma̱ indra̍śca̱ martya̍m | dakṣi̍ṇā pā̱tvaṁha̍saḥ || 1.018.05 ||

सद॑स॒स्पति॒मद्भु॑तं प्रि॒यमिन्द्र॑स्य॒ काम्य॑म् । स॒निं मे॒धाम॑यासिषम् ॥ १.१८.०६ ॥

sada̍sa̱spati̱madbhu̍taṁ pri̱yamindra̍sya̱ kāmya̍m | sa̱niṁ me̱dhāma̍yāsiṣam || 1.018.06 ||

यस्मा॑दृ॒ते न सिध्य॑ति य॒ज्ञो वि॑प॒श्चित॑श्च॒न । स धी॒नां योग॑मिन्वति ॥ १.१८.०७ ॥

yasmā̍dṛ̱te na sidhya̍ti ya̱jño vi̍pa̱ścita̍śca̱na | sa dhī̱nāṁ yoga̍minvati || 1.018.07 ||

आदृ॑ध्नोति ह॒विष्कृ॑तिं॒ प्राञ्चं॑ कृणोत्यध्व॒रम् । होत्रा॑ दे॒वेषु॑ गच्छति ॥ १.१८.०८ ॥

ādṛ̍dhnoti ha̱viṣkṛ̍ti̱ṁ prāñca̍ṁ kṛṇotyadhva̱ram | hotrā̍ de̱veṣu̍ gacchati || 1.018.08 ||

नरा॒शंसं॑ सु॒धृष्ट॑म॒मप॑श्यं स॒प्रथ॑स्तमम् । दि॒वो न सद्म॑मखसम् ॥ १.१८.०९ ॥

narā̱śaṁsa̍ṁ su̱dhṛṣṭa̍ma̱mapa̍śyaṁ sa̱pratha̍stamam | di̱vo na sadma̍makhasam || 1.018.09 ||

Languages