Gyaandweep | Rig Veda Mandala , 1

वाय॒वा या॑हि दर्शते॒मे सोमा॒ अरं॑कृताः । तेषां॑ पाहि श्रु॒धी हव॑म् ॥ १.२.०१ ॥

vāya̱vā yā̍hi darśate̱me somā̱ ara̍ṁkṛtāḥ | teṣā̍ṁ pāhi śru̱dhī hava̍m || 1.002.01 ||

वाय॑ उ॒क्थेभि॑र्जरन्ते॒ त्वामच्छा॑ जरि॒तारः॑ । सु॒तसो॑मा अह॒र्विदः॑ ॥ १.२.०२ ॥

vāya̍ u̱kthebhi̍rjarante̱ tvāmacchā̍ jari̱tāra̍ḥ | su̱taso̍mā aha̱rvida̍ḥ || 1.002.02 ||

वायो॒ तव॑ प्रपृञ्च॒ती धेना॑ जिगाति दा॒शुषे॑ । उ॒रू॒ची सोम॑पीतये ॥ १.२.०३ ॥

vāyo̱ tava̍ prapṛñca̱tī dhenā̍ jigāti dā̱śuṣe̍ | u̱rū̱cī soma̍pītaye || 1.002.03 ||

इन्द्र॑वायू इ॒मे सु॒ता उप॒ प्रयो॑भि॒रा ग॑तम् । इन्द॑वो वामु॒शन्ति॒ हि ॥ १.२.०४ ॥

indra̍vāyū i̱me su̱tā upa̱ prayo̍bhi̱rā ga̍tam | inda̍vo vāmu̱śanti̱ hi || 1.002.04 ||

वाय॒विन्द्र॑श्च चेतथः सु॒तानां॑ वाजिनीवसू । तावा या॑त॒मुप॑ द्र॒वत् ॥ १.२.०५ ॥

vāya̱vindra̍śca cetathaḥ su̱tānā̍ṁ vājinīvasū | tāvā yā̍ta̱mupa̍ dra̱vat || 1.002.05 ||

वाय॒विन्द्र॑श्च सुन्व॒त आ या॑त॒मुप॑ निष्कृ॒तम् । म॒क्ष्वि॑त्था धि॒या न॑रा ॥ १.२.०६ ॥

vāya̱vindra̍śca sunva̱ta ā yā̍ta̱mupa̍ niṣkṛ̱tam | ma̱kṣvi1̱̍tthā dhi̱yā na̍rā || 1.002.06 ||

मि॒त्रं हु॑वे पू॒तद॑क्षं॒ वरु॑णं च रि॒शाद॑सम् । धियं॑ घृ॒ताचीं॒ साध॑न्ता ॥ १.२.०७ ॥

mi̱traṁ hu̍ve pū̱tada̍kṣa̱ṁ varu̍ṇaṁ ca ri̱śāda̍sam | dhiya̍ṁ ghṛ̱tācī̱ṁ sādha̍ntā || 1.002.07 ||

ऋ॒तेन॑ मित्रावरुणावृतावृधावृतस्पृशा । क्रतुं॑ बृ॒हन्त॑माशाथे ॥ १.२.०८ ॥

ṛ̱tena̍ mitrāvaruṇāvṛtāvṛdhāvṛtaspṛśā | kratu̍ṁ bṛ̱hanta̍māśāthe || 1.002.08 ||

क॒वी नो॑ मि॒त्रावरु॑णा तुविजा॒ता उ॑रु॒क्षया॑ । दक्षं॑ दधाते अ॒पस॑म् ॥ १.२.०९ ॥

ka̱vī no̍ mi̱trāvaru̍ṇā tuvijā̱tā u̍ru̱kṣayā̍ | dakṣa̍ṁ dadhāte a̱pasa̍m || 1.002.09 ||

Languages