ती॒व्राः सोमा॑स॒ आ ग॑ह्या॒शीर्व॑न्तः सु॒ता इ॒मे । वायो॒ तान्प्रस्थि॑तान्पिब ॥ १.२३.०१ ॥
tī̱vrāḥ somā̍sa̱ ā ga̍hyā̱śīrva̍ntaḥ su̱tā i̱me | vāyo̱ tānprasthi̍tānpiba || 1.023.01 ||
उ॒भा दे॒वा दि॑वि॒स्पृशे॑न्द्रवा॒यू ह॑वामहे । अ॒स्य सोम॑स्य पी॒तये॑ ॥ १.२३.०२ ॥
u̱bhā de̱vā di̍vi̱spṛśe̍ndravā̱yū ha̍vāmahe | a̱sya soma̍sya pī̱taye̍ || 1.023.02 ||
इ॒न्द्र॒वा॒यू म॑नो॒जुवा॒ विप्रा॑ हवन्त ऊ॒तये॑ । स॒ह॒स्रा॒क्षा धि॒यस्पती॑ ॥ १.२३.०३ ॥
i̱ndra̱vā̱yū ma̍no̱juvā̱ viprā̍ havanta ū̱taye̍ | sa̱ha̱srā̱kṣā dhi̱yaspatī̍ || 1.023.03 ||
मि॒त्रं व॒यं ह॑वामहे॒ वरु॑णं॒ सोम॑पीतये । ज॒ज्ञा॒ना पू॒तद॑क्षसा ॥ १.२३.०४ ॥
mi̱traṁ va̱yaṁ ha̍vāmahe̱ varu̍ṇa̱ṁ soma̍pītaye | ja̱jñā̱nā pū̱tada̍kṣasā || 1.023.04 ||
ऋ॒तेन॒ यावृ॑ता॒वृधा॑वृ॒तस्य॒ ज्योति॑ष॒स्पती॑ । ता मि॒त्रावरु॑णा हुवे ॥ १.२३.०५ ॥
ṛ̱tena̱ yāvṛ̍tā̱vṛdhā̍vṛ̱tasya̱ jyoti̍ṣa̱spatī̍ | tā mi̱trāvaru̍ṇā huve || 1.023.05 ||
वरु॑णः प्रावि॒ता भु॑वन्मि॒त्रो विश्वा॑भिरू॒तिभिः॑ । कर॑तां नः सु॒राध॑सः ॥ १.२३.०६ ॥
varu̍ṇaḥ prāvi̱tā bhu̍vanmi̱tro viśvā̍bhirū̱tibhi̍ḥ | kara̍tāṁ naḥ su̱rādha̍saḥ || 1.023.06 ||
म॒रुत्व॑न्तं हवामह॒ इन्द्र॒मा सोम॑पीतये । स॒जूर्ग॒णेन॑ तृम्पतु ॥ १.२३.०७ ॥
ma̱rutva̍ntaṁ havāmaha̱ indra̱mā soma̍pītaye | sa̱jūrga̱ṇena̍ tṛmpatu || 1.023.07 ||
इन्द्र॑ज्येष्ठा॒ मरु॑द्गणा॒ देवा॑सः॒ पूष॑रातयः । विश्वे॒ मम॑ श्रुता॒ हव॑म् ॥ १.२३.०८ ॥
indra̍jyeṣṭhā̱ maru̍dgaṇā̱ devā̍sa̱ḥ pūṣa̍rātayaḥ | viśve̱ mama̍ śrutā̱ hava̍m || 1.023.08 ||
ह॒त वृ॒त्रं सु॑दानव॒ इन्द्रे॑ण॒ सह॑सा यु॒जा । मा नो॑ दुः॒शंस॑ ईशत ॥ १.२३.०९ ॥
ha̱ta vṛ̱traṁ su̍dānava̱ indre̍ṇa̱ saha̍sā yu̱jā | mā no̍ du̱ḥśaṁsa̍ īśata || 1.023.09 ||
विश्वा॑न्दे॒वान्ह॑वामहे म॒रुतः॒ सोम॑पीतये । उ॒ग्रा हि पृश्नि॑मातरः ॥ १.२३.१० ॥
viśvā̍nde̱vānha̍vāmahe ma̱ruta̱ḥ soma̍pītaye | u̱grā hi pṛśni̍mātaraḥ || 1.023.10 ||
जय॑तामिव तन्य॒तुर्म॒रुता॑मेति धृष्णु॒या । यच्छुभं॑ या॒थना॑ नरः ॥ १.२३.११ ॥
jaya̍tāmiva tanya̱turma̱rutā̍meti dhṛṣṇu̱yā | yacchubha̍ṁ yā̱thanā̍ naraḥ || 1.023.11 ||
ह॒स्का॒राद्वि॒द्युत॒स्पर्यतो॑ जा॒ता अ॑वन्तु नः । म॒रुतो॑ मृळयन्तु नः ॥ १.२३.१२ ॥
ha̱skā̱rādvi̱dyuta̱sparyato̍ jā̱tā a̍vantu naḥ | ma̱ruto̍ mṛḻayantu naḥ || 1.023.12 ||
आ पू॑षञ्चि॒त्रब॑र्हिष॒माघृ॑णे ध॒रुणं॑ दि॒वः । आजा॑ न॒ष्टं यथा॑ प॒शुम् ॥ १.२३.१३ ॥
ā pū̍ṣañci̱traba̍rhiṣa̱māghṛ̍ṇe dha̱ruṇa̍ṁ di̱vaḥ | ājā̍ na̱ṣṭaṁ yathā̍ pa̱śum || 1.023.13 ||
पू॒षा राजा॑न॒माघृ॑णि॒रप॑गूlहं॒ गुहा॑ हि॒तम् । अवि॑न्दच्चि॒त्रब॑र्हिषम् ॥ १.२३.१४ ॥
pū̱ṣā rājā̍na̱māghṛ̍ṇi̱rapa̍gūḻha̱ṁ guhā̍ hi̱tam | avi̍ndacci̱traba̍rhiṣam || 1.023.14 ||
उ॒तो स मह्य॒मिन्दु॑भिः॒ षड्यु॒क्ताँ अ॑नु॒सेषि॑धत् । गोभि॒र्यवं॒ न च॑र्कृषत् ॥ १.२३.१५ ॥
u̱to sa mahya̱mindu̍bhi̱ḥ ṣaḍyu̱ktā a̍nu̱seṣi̍dhat | gobhi̱ryava̱ṁ na ca̍rkṛṣat || 1.023.15 ||
अ॒म्बयो॑ य॒न्त्यध्व॑भिर्जा॒मयो॑ अध्वरीय॒ताम् । पृ॒ञ्च॒तीर्मधु॑ना॒ पयः॑ ॥ १.२३.१६ ॥
a̱mbayo̍ ya̱ntyadhva̍bhirjā̱mayo̍ adhvarīya̱tām | pṛ̱ñca̱tīrmadhu̍nā̱ paya̍ḥ || 1.023.16 ||
अ॒मूर्या उप॒ सूर्ये॒ याभि॑र्वा॒ सूर्यः॑ स॒ह । ता नो॑ हिन्वन्त्वध्व॒रम् ॥ १.२३.१७ ॥
a̱mūryā upa̱ sūrye̱ yābhi̍rvā̱ sūrya̍ḥ sa̱ha | tā no̍ hinvantvadhva̱ram || 1.023.17 ||
अ॒पो दे॒वीरुप॑ ह्वये॒ यत्र॒ गावः॒ पिब॑न्ति नः । सिन्धु॑भ्यः॒ कर्त्वं॑ ह॒विः ॥ १.२३.१८ ॥
a̱po de̱vīrupa̍ hvaye̱ yatra̱ gāva̱ḥ piba̍nti naḥ | sindhu̍bhya̱ḥ kartva̍ṁ ha̱viḥ || 1.023.18 ||
अ॒प्स्व॑न्तर॒मृत॑म॒प्सु भे॑ष॒जम॒पामु॒त प्रश॑स्तये । देवा॒ भव॑त वा॒जिनः॑ ॥ १.२३.१९ ॥
a̱psva1̱̍ntara̱mṛta̍ma̱psu bhe̍ṣa̱jama̱pāmu̱ta praśa̍staye | devā̱ bhava̍ta vā̱jina̍ḥ || 1.023.19 ||
अ॒प्सु मे॒ सोमो॑ अब्रवीद॒न्तर्विश्वा॑नि भेष॒जा । अ॒ग्निं च॑ वि॒श्वश॑म्भुव॒माप॑श्च वि॒श्वभे॑षजीः ॥ १.२३.२० ॥
a̱psu me̱ somo̍ abravīda̱ntarviśvā̍ni bheṣa̱jā | a̱gniṁ ca̍ vi̱śvaśa̍mbhuva̱māpa̍śca vi̱śvabhe̍ṣajīḥ || 1.023.20 ||
आपः॑ पृणी॒त भे॑ष॒जं वरू॑थं त॒न्वे॒॑ मम॑ । ज्योक्च॒ सूर्यं॑ दृ॒शे ॥ १.२३.२१ ॥
āpa̍ḥ pṛṇī̱ta bhe̍ṣa̱jaṁ varū̍thaṁ ta̱nve̱3̱̍ mama̍ | jyokca̱ sūrya̍ṁ dṛ̱śe || 1.023.21 ||
इ॒दमा॑पः॒ प्र व॑हत॒ यत्किं च॑ दुरि॒तं मयि॑ । यद्वा॒हम॑भिदु॒द्रोह॒ यद्वा॑ शे॒प उ॒तानृ॑तम् ॥ १.२३.२२ ॥
i̱damā̍pa̱ḥ pra va̍hata̱ yatkiṁ ca̍ duri̱taṁ mayi̍ | yadvā̱hama̍bhidu̱droha̱ yadvā̍ śe̱pa u̱tānṛ̍tam || 1.023.22 ||
आपो॑ अ॒द्यान्व॑चारिषं॒ रसे॑न॒ सम॑गस्महि । पय॑स्वानग्न॒ आ ग॑हि॒ तं मा॒ सं सृ॑ज॒ वर्च॑सा ॥ १.२३.२३ ॥
āpo̍ a̱dyānva̍cāriṣa̱ṁ rase̍na̱ sama̍gasmahi | paya̍svānagna̱ ā ga̍hi̱ taṁ mā̱ saṁ sṛ̍ja̱ varca̍sā || 1.023.23 ||
सं मा॑ग्ने॒ वर्च॑सा सृज॒ सं प्र॒जया॒ समायु॑षा । वि॒द्युर्मे॑ अस्य दे॒वा इन्द्रो॑ विद्यात्स॒ह ऋषि॑भिः ॥ १.२३.२४ ॥
saṁ mā̍gne̱ varca̍sā sṛja̱ saṁ pra̱jayā̱ samāyu̍ṣā | vi̱dyurme̍ asya de̱vā indro̍ vidyātsa̱ha ṛṣi̍bhiḥ || 1.023.24 ||
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
