Gyaandweep | Rig Veda Mandala , 1

वसि॑ष्वा॒ हि मि॑येध्य॒ वस्त्रा॑ण्यूर्जां पते । सेमं नो॑ अध्व॒रं य॑ज ॥ १.२६.०१ ॥

vasi̍ṣvā̱ hi mi̍yedhya̱ vastrā̍ṇyūrjāṁ pate | semaṁ no̍ adhva̱raṁ ya̍ja || 1.026.01 ||

नि नो॒ होता॒ वरे॑ण्यः॒ सदा॑ यविष्ठ॒ मन्म॑भिः । अग्ने॑ दि॒वित्म॑ता॒ वचः॑ ॥ १.२६.०२ ॥

ni no̱ hotā̱ vare̍ṇya̱ḥ sadā̍ yaviṣṭha̱ manma̍bhiḥ | agne̍ di̱vitma̍tā̱ vaca̍ḥ || 1.026.02 ||

आ हि ष्मा॑ सू॒नवे॑ पि॒तापिर्यज॑त्या॒पये॑ । सखा॒ सख्ये॒ वरे॑ण्यः ॥ १.२६.०३ ॥

ā hi ṣmā̍ sū̱nave̍ pi̱tāpiryaja̍tyā̱paye̍ | sakhā̱ sakhye̱ vare̍ṇyaḥ || 1.026.03 ||

आ नो॑ ब॒र्ही रि॒शाद॑सो॒ वरु॑णो मि॒त्रो अ॑र्य॒मा । सीद॑न्तु॒ मनु॑षो यथा ॥ १.२६.०४ ॥

ā no̍ ba̱rhī ri̱śāda̍so̱ varu̍ṇo mi̱tro a̍rya̱mā | sīda̍ntu̱ manu̍ṣo yathā || 1.026.04 ||

पूर्व्य॑ होतर॒स्य नो॒ मन्द॑स्व स॒ख्यस्य॑ च । इ॒मा उ॒ षु श्रु॑धी॒ गिरः॑ ॥ १.२६.०५ ॥

pūrvya̍ hotara̱sya no̱ manda̍sva sa̱khyasya̍ ca | i̱mā u̱ ṣu śru̍dhī̱ gira̍ḥ || 1.026.05 ||

यच्चि॒द्धि शश्व॑ता॒ तना॑ दे॒वंदे॑वं॒ यजा॑महे । त्वे इद्धू॑यते ह॒विः ॥ १.२६.०६ ॥

yacci̱ddhi śaśva̍tā̱ tanā̍ de̱vaṁde̍va̱ṁ yajā̍mahe | tve iddhū̍yate ha̱viḥ || 1.026.06 ||

प्रि॒यो नो॑ अस्तु वि॒श्पति॒र्होता॑ म॒न्द्रो वरे॑ण्यः । प्रि॒याः स्व॒ग्नयो॑ व॒यम् ॥ १.२६.०७ ॥

pri̱yo no̍ astu vi̱śpati̱rhotā̍ ma̱ndro vare̍ṇyaḥ | pri̱yāḥ sva̱gnayo̍ va̱yam || 1.026.07 ||

स्व॒ग्नयो॒ हि वार्यं॑ दे॒वासो॑ दधि॒रे च॑ नः । स्व॒ग्नयो॑ मनामहे ॥ १.२६.०८ ॥

sva̱gnayo̱ hi vārya̍ṁ de̱vāso̍ dadhi̱re ca̍ naḥ | sva̱gnayo̍ manāmahe || 1.026.08 ||

अथा॑ न उ॒भये॑षा॒ममृ॑त॒ मर्त्या॑नाम् । मि॒थः स॑न्तु॒ प्रश॑स्तयः ॥ १.२६.०९ ॥

athā̍ na u̱bhaye̍ṣā̱mamṛ̍ta̱ martyā̍nām | mi̱thaḥ sa̍ntu̱ praśa̍stayaḥ || 1.026.09 ||

विश्वे॑भिरग्ने अ॒ग्निभि॑रि॒मं य॒ज्ञमि॒दं वचः॑ । चनो॑ धाः सहसो यहो ॥ १.२६.१० ॥

viśve̍bhiragne a̱gnibhi̍ri̱maṁ ya̱jñami̱daṁ vaca̍ḥ | cano̍ dhāḥ sahaso yaho || 1.026.10 ||

Languages