Gyaandweep | Rig Veda Mandala , 1

अश्वि॑ना॒ यज्व॑री॒रिषो॒ द्रव॑त्पाणी॒ शुभ॑स्पती । पुरु॑भुजा चन॒स्यत॑म् ॥ १.३.०१ ॥

aśvi̍nā̱ yajva̍rī̱riṣo̱ drava̍tpāṇī̱ śubha̍spatī | puru̍bhujā cana̱syata̍m || 1.003.01 ||

अश्वि॑ना॒ पुरु॑दंससा॒ नरा॒ शवी॑रया धि॒या । धिष्ण्या॒ वन॑तं॒ गिरः॑ ॥ १.३.०२ ॥

aśvi̍nā̱ puru̍daṁsasā̱ narā̱ śavī̍rayā dhi̱yā | dhiṣṇyā̱ vana̍ta̱ṁ gira̍ḥ || 1.003.02 ||

दस्रा॑ यु॒वाक॑वः सु॒ता नास॑त्या वृ॒क्तब॑र्हिषः । आ या॑तं रुद्रवर्तनी ॥ १.३.०३ ॥

dasrā̍ yu̱vāka̍vaḥ su̱tā nāsa̍tyā vṛ̱ktaba̍rhiṣaḥ | ā yā̍taṁ rudravartanī || 1.003.03 ||

इन्द्रा या॑हि चित्रभानो सु॒ता इ॒मे त्वा॒यवः॑ । अण्वी॑भि॒स्तना॑ पू॒तासः॑ ॥ १.३.०४ ॥

indrā yā̍hi citrabhāno su̱tā i̱me tvā̱yava̍ḥ | aṇvī̍bhi̱stanā̍ pū̱tāsa̍ḥ || 1.003.04 ||

इन्द्रा या॑हि धि॒येषि॒तो विप्र॑जूतः सु॒ताव॑तः । उप॒ ब्रह्मा॑णि वा॒घतः॑ ॥ १.३.०५ ॥

indrā yā̍hi dhi̱yeṣi̱to vipra̍jūtaḥ su̱tāva̍taḥ | upa̱ brahmā̍ṇi vā̱ghata̍ḥ || 1.003.05 ||

इन्द्रा या॑हि॒ तूतु॑जान॒ उप॒ ब्रह्मा॑णि हरिवः । सु॒ते द॑धिष्व न॒श्चनः॑ ॥ १.३.०६ ॥

indrā yā̍hi̱ tūtu̍jāna̱ upa̱ brahmā̍ṇi harivaḥ | su̱te da̍dhiṣva na̱ścana̍ḥ || 1.003.06 ||

ओमा॑सश्चर्षणीधृतो॒ विश्वे॑ देवास॒ आ ग॑त । दा॒श्वांसो॑ दा॒शुषः॑ सु॒तम् ॥ १.३.०७ ॥

omā̍saścarṣaṇīdhṛto̱ viśve̍ devāsa̱ ā ga̍ta | dā̱śvāṁso̍ dā̱śuṣa̍ḥ su̱tam || 1.003.07 ||

विश्वे॑ दे॒वासो॑ अ॒प्तुरः॑ सु॒तमा ग॑न्त॒ तूर्ण॑यः । उ॒स्रा इ॑व॒ स्वस॑राणि ॥ १.३.०८ ॥

viśve̍ de̱vāso̍ a̱ptura̍ḥ su̱tamā ga̍nta̱ tūrṇa̍yaḥ | u̱srā i̍va̱ svasa̍rāṇi || 1.003.08 ||

विश्वे॑ दे॒वासो॑ अ॒स्रिध॒ एहि॑मायासो अ॒द्रुहः॑ । मेधं॑ जुषन्त॒ वह्न॑यः ॥ १.३.०९ ॥

viśve̍ de̱vāso̍ a̱sridha̱ ehi̍māyāso a̱druha̍ḥ | medha̍ṁ juṣanta̱ vahna̍yaḥ || 1.003.09 ||

पा॒व॒का नः॒ सर॑स्वती॒ वाजे॑भिर्वा॒जिनी॑वती । य॒ज्ञं व॑ष्टु धि॒याव॑सुः ॥ १.३.१० ॥

pā̱va̱kā na̱ḥ sara̍svatī̱ vāje̍bhirvā̱jinī̍vatī | ya̱jñaṁ va̍ṣṭu dhi̱yāva̍suḥ || 1.003.10 ||

चो॒द॒यि॒त्री सू॒नृता॑नां॒ चेत॑न्ती सुमती॒नाम् । य॒ज्ञं द॑धे॒ सर॑स्वती ॥ १.३.११ ॥

co̱da̱yi̱trī sū̱nṛtā̍nā̱ṁ ceta̍ntī sumatī̱nām | ya̱jñaṁ da̍dhe̱ sara̍svatī || 1.003.11 ||

म॒हो अर्णः॒ सर॑स्वती॒ प्र चे॑तयति के॒तुना॑ । धियो॒ विश्वा॒ वि रा॑जति ॥ १.३.१२ ॥

ma̱ho arṇa̱ḥ sara̍svatī̱ pra ce̍tayati ke̱tunā̍ | dhiyo̱ viśvā̱ vi rā̍jati || 1.003.12 ||

Languages