आ व॒ इन्द्रं॒ क्रिविं॑ यथा वाज॒यन्तः॑ श॒तक्र॑तुम् । मंहि॑ष्ठं सिञ्च॒ इन्दु॑भिः ॥ १.०३०.०१ ॥
ā va̱ indra̱ṁ krivi̍ṁ yathā vāja̱yanta̍ḥ śa̱takra̍tum | maṁhi̍ṣṭhaṁ siñca̱ indu̍bhiḥ || 1.030.01 ||
श॒तं वा॒ यः शुची॑नां स॒हस्रं॑ वा॒ समा॑शिराम् । एदु॑ नि॒म्नं न री॑यते ॥ १.०३०.०२ ॥
śa̱taṁ vā̱ yaḥ śucī̍nāṁ sa̱hasra̍ṁ vā̱ samā̍śirām | edu̍ ni̱mnaṁ na rī̍yate || 1.030.02 ||
सं यन्मदा॑य शु॒ष्मिण॑ ए॒ना ह्य॑स्यो॒दरे॑ । स॒मु॒द्रो न व्यचो॑ द॒धे ॥ १.०३०.०३ ॥
saṁ yanmadā̍ya śu̱ṣmiṇa̍ e̱nā hya̍syo̱dare̍ | sa̱mu̱dro na vyaco̍ da̱dhe || 1.030.03 ||
अ॒यमु॑ ते॒ सम॑तसि क॒पोत॑ इव गर्भ॒धिम् । वच॒स्तच्चि॑न्न ओहसे ॥ १.०३०.०४ ॥
a̱yamu̍ te̱ sama̍tasi ka̱pota̍ iva garbha̱dhim | vaca̱stacci̍nna ohase || 1.030.04 ||
स्तो॒त्रं रा॑धानां पते॒ गिर्वा॑हो वीर॒ यस्य॑ ते । विभू॑तिरस्तु सू॒नृता॑ ॥ १.०३०.०५ ॥
sto̱traṁ rā̍dhānāṁ pate̱ girvā̍ho vīra̱ yasya̍ te | vibhū̍tirastu sū̱nṛtā̍ || 1.030.05 ||
ऊ॒र्ध्वस्ति॑ष्ठा न ऊ॒तये॒ऽस्मिन्वाजे॑ शतक्रतो । सम॒न्येषु॑ ब्रवावहै ॥ १.०३०.०६ ॥
ū̱rdhvasti̍ṣṭhā na ū̱taye̱'sminvāje̍ śatakrato | sama̱nyeṣu̍ bravāvahai || 1.030.06 ||
योगे॑योगे त॒वस्त॑रं॒ वाजे॑वाजे हवामहे । सखा॑य॒ इन्द्र॑मू॒तये॑ ॥ १.०३०.०७ ॥
yoge̍yoge ta̱vasta̍ra̱ṁ vāje̍vāje havāmahe | sakhā̍ya̱ indra̍mū̱taye̍ || 1.030.07 ||
आ घा॑ गम॒द्यदि॒ श्रव॑त्सह॒स्रिणी॑भिरू॒तिभिः॑ । वाजे॑भि॒रुप॑ नो॒ हव॑म् ॥ १.०३०.०८ ॥
ā ghā̍ gama̱dyadi̱ śrava̍tsaha̱sriṇī̍bhirū̱tibhi̍ḥ | vāje̍bhi̱rupa̍ no̱ hava̍m || 1.030.08 ||
अनु॑ प्र॒त्नस्यौक॑सो हु॒वे तु॑विप्र॒तिं नर॑म् । यं ते॒ पूर्वं॑ पि॒ता हु॒वे ॥ १.०३०.०९ ॥
anu̍ pra̱tnasyauka̍so hu̱ve tu̍vipra̱tiṁ nara̍m | yaṁ te̱ pūrva̍ṁ pi̱tā hu̱ve || 1.030.09 ||
तं त्वा॑ व॒यं वि॑श्ववा॒रा शा॑स्महे पुरुहूत । सखे॑ वसो जरि॒तृभ्यः॑ ॥ १.०३०.१० ॥
taṁ tvā̍ va̱yaṁ vi̍śvavā̱rā śā̍smahe puruhūta | sakhe̍ vaso jari̱tṛbhya̍ḥ || 1.030.10 ||
अ॒स्माकं॑ शि॒प्रिणी॑नां॒ सोम॑पाः सोम॒पाव्ना॑म् । सखे॑ वज्रि॒न्सखी॑नाम् ॥ १.०३०.११ ॥
a̱smāka̍ṁ śi̱priṇī̍nā̱ṁ soma̍pāḥ soma̱pāvnā̍m | sakhe̍ vajri̱nsakhī̍nām || 1.030.11 ||
तथा॒ तद॑स्तु सोमपाः॒ सखे॑ वज्रि॒न्तथा॑ कृणु । यथा॑ त उ॒श्मसी॒ष्टये॑ ॥ १.०३०.१२ ॥
tathā̱ tada̍stu somapā̱ḥ sakhe̍ vajri̱ntathā̍ kṛṇu | yathā̍ ta u̱śmasī̱ṣṭaye̍ || 1.030.12 ||
रे॒वती॑र्नः सध॒माद॒ इन्द्रे॑ सन्तु तु॒विवा॑जाः । क्षु॒मन्तो॒ याभि॒र्मदे॑म ॥ १.०३०.१३ ॥
re̱vatī̍rnaḥ sadha̱māda̱ indre̍ santu tu̱vivā̍jāḥ | kṣu̱manto̱ yābhi̱rmade̍ma || 1.030.13 ||
आ घ॒ त्वावा॒न्त्मना॒प्तः स्तो॒तृभ्यो॑ धृष्णविया॒नः । ऋ॒णोरक्षं॒ न च॒क्र्योः॑ ॥ १.०३०.१४ ॥
ā gha̱ tvāvā̱ntmanā̱ptaḥ sto̱tṛbhyo̍ dhṛṣṇaviyā̱naḥ | ṛ̱ṇorakṣa̱ṁ na ca̱kryo̍ḥ || 1.030.14 ||
आ यद्दुवः॑ शतक्रत॒वा कामं॑ जरितॄ॒णाम् । ऋ॒णोरक्षं॒ न शची॑भिः ॥ १.०३०.१५ ॥
ā yadduva̍ḥ śatakrata̱vā kāma̍ṁ jaritṝ̱ṇām | ṛ̱ṇorakṣa̱ṁ na śacī̍bhiḥ || 1.030.15 ||
शश्व॒दिन्द्रः॒ पोप्रु॑थद्भिर्जिगाय॒ नान॑दद्भिः॒ शाश्व॑सद्भि॒र्धना॑नि । स नो॑ हिरण्यर॒थं दं॒सना॑वा॒न्स नः॑ सनि॒ता स॒नये॒ स नो॑ऽदात् ॥ १.०३०.१६ ॥
śaśva̱dindra̱ḥ popru̍thadbhirjigāya̱ nāna̍dadbhi̱ḥ śāśva̍sadbhi̱rdhanā̍ni | sa no̍ hiraṇyara̱thaṁ da̱ṁsanā̍vā̱nsa na̍ḥ sani̱tā sa̱naye̱ sa no̍'dāt || 1.030.16 ||
आश्वि॑ना॒वश्वा॑वत्ये॒षा या॑तं॒ शवी॑रया । गोम॑द्दस्रा॒ हिर॑ण्यवत् ॥ १.०३०.१७ ॥
āśvi̍nā̱vaśvā̍vatye̱ṣā yā̍ta̱ṁ śavī̍rayā | goma̍ddasrā̱ hira̍ṇyavat || 1.030.17 ||
स॒मा॒नयो॑जनो॒ हि वां॒ रथो॑ दस्रा॒वम॑र्त्यः । स॒मु॒द्रे अ॑श्वि॒नेय॑ते ॥ १.०३०.१८ ॥
sa̱mā̱nayo̍jano̱ hi vā̱ṁ ratho̍ dasrā̱vama̍rtyaḥ | sa̱mu̱dre a̍śvi̱neya̍te || 1.030.18 ||
न्य॒॑घ्न्यस्य॑ मू॒र्धनि॑ च॒क्रं रथ॑स्य येमथुः । परि॒ द्याम॒न्यदी॑यते ॥ १.०३०.१९ ॥
nya1̱̍ghnyasya̍ mū̱rdhani̍ ca̱kraṁ ratha̍sya yemathuḥ | pari̱ dyāma̱nyadī̍yate || 1.030.19 ||
कस्त॑ उषः कधप्रिये भु॒जे मर्तो॑ अमर्त्ये । कं न॑क्षसे विभावरि ॥ १.०३०.२० ॥
kasta̍ uṣaḥ kadhapriye bhu̱je marto̍ amartye | kaṁ na̍kṣase vibhāvari || 1.030.20 ||
व॒यं हि ते॒ अम॑न्म॒ह्यान्ता॒दा प॑रा॒कात् । अश्वे॒ न चि॑त्रे अरुषि ॥ १.०३०.२१ ॥
va̱yaṁ hi te̱ ama̍nma̱hyāntā̱dā pa̍rā̱kāt | aśve̱ na ci̍tre aruṣi || 1.030.21 ||
त्वं त्येभि॒रा ग॑हि॒ वाजे॑भिर्दुहितर्दिवः । अ॒स्मे र॒यिं नि धा॑रय ॥ १.०३०.२२ ॥
tvaṁ tyebhi̱rā ga̍hi̱ vāje̍bhirduhitardivaḥ | a̱sme ra̱yiṁ ni dhā̍raya || 1.030.22 ||
AnonymousUser
150
5 Days
Learn
Teach
Discuss
Panchanga
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
