एताया॒मोप॑ ग॒व्यन्त॒ इन्द्र॑म॒स्माकं॒ सु प्रम॑तिं वावृधाति । अ॒ना॒मृ॒णः कु॒विदाद॒स्य रा॒यो गवां॒ केतं॒ पर॑मा॒वर्ज॑ते नः ॥ १.३३.०१ ॥
etāyā̱mopa̍ ga̱vyanta̱ indra̍ma̱smāka̱ṁ su prama̍tiṁ vāvṛdhāti | a̱nā̱mṛ̱ṇaḥ ku̱vidāda̱sya rā̱yo gavā̱ṁ keta̱ṁ para̍mā̱varja̍te naḥ || 1.033.01 ||
उपेद॒हं ध॑न॒दामप्र॑तीतं॒ जुष्टां॒ न श्ये॒नो व॑स॒तिं प॑तामि । इन्द्रं॑ नम॒स्यन्नु॑प॒मेभि॑र॒र्कैर्यः स्तो॒तृभ्यो॒ हव्यो॒ अस्ति॒ याम॑न् ॥ १.३३.०२ ॥
upeda̱haṁ dha̍na̱dāmapra̍tīta̱ṁ juṣṭā̱ṁ na śye̱no va̍sa̱tiṁ pa̍tāmi | indra̍ṁ nama̱syannu̍pa̱mebhi̍ra̱rkairyaḥ sto̱tṛbhyo̱ havyo̱ asti̱ yāma̍n || 1.033.02 ||
नि सर्व॑सेन इषु॒धीँर॑सक्त॒ सम॒र्यो गा अ॑जति॒ यस्य॒ वष्टि॑ । चो॒ष्कू॒यमा॑ण इन्द्र॒ भूरि॑ वा॒मं मा प॒णिर्भू॑र॒स्मदधि॑ प्रवृद्ध ॥ १.३३.०३ ॥
ni sarva̍sena iṣu̱dhīra̍sakta̱ sama̱ryo gā a̍jati̱ yasya̱ vaṣṭi̍ | co̱ṣkū̱yamā̍ṇa indra̱ bhūri̍ vā̱maṁ mā pa̱ṇirbhū̍ra̱smadadhi̍ pravṛddha || 1.033.03 ||
वधी॒र्हि दस्युं॑ ध॒निनं॑ घ॒नेन॒ँ एक॒श्चर॑न्नुपशा॒केभि॑रिन्द्र । धनो॒रधि॑ विषु॒णक्ते व्या॑य॒न्नय॑ज्वानः सन॒काः प्रेति॑मीयुः ॥ १.३३.०४ ॥
vadhī̱rhi dasyu̍ṁ dha̱nina̍ṁ gha̱nena̱ eka̱ścara̍nnupaśā̱kebhi̍rindra | dhano̱radhi̍ viṣu̱ṇakte vyā̍ya̱nnaya̍jvānaḥ sana̱kāḥ preti̍mīyuḥ || 1.033.04 ||
परा॑ चिच्छी॒र्षा व॑वृजु॒स्त इ॒न्द्राय॑ज्वानो॒ यज्व॑भिः॒ स्पर्ध॑मानाः । प्र यद्दि॒वो ह॑रिवः स्थातरुग्र॒ निर॑व्र॒ताँ अ॑धमो॒ रोद॑स्योः ॥ १.३३.०५ ॥
parā̍ cicchī̱rṣā va̍vṛju̱sta i̱ndrāya̍jvāno̱ yajva̍bhi̱ḥ spardha̍mānāḥ | pra yaddi̱vo ha̍rivaḥ sthātarugra̱ nira̍vra̱tā a̍dhamo̱ roda̍syoḥ || 1.033.05 ||
अयु॑युत्सन्ननव॒द्यस्य॒ सेना॒मया॑तयन्त क्षि॒तयो॒ नव॑ग्वाः । वृ॒षा॒युधो॒ न वध्र॑यो॒ निर॑ष्टाः प्र॒वद्भि॒रिन्द्रा॑च्चि॒तय॑न्त आयन् ॥ १.३३.०६ ॥
ayu̍yutsannanava̱dyasya̱ senā̱mayā̍tayanta kṣi̱tayo̱ nava̍gvāḥ | vṛ̱ṣā̱yudho̱ na vadhra̍yo̱ nira̍ṣṭāḥ pra̱vadbhi̱rindrā̍cci̱taya̍nta āyan || 1.033.06 ||
त्वमे॒तान्रु॑द॒तो जक्ष॑त॒श्चायो॑धयो॒ रज॑स इन्द्र पा॒रे । अवा॑दहो दि॒व आ दस्यु॑मु॒च्चा प्र सु॑न्व॒तः स्तु॑व॒तः शंस॑मावः ॥ १.३३.०७ ॥
tvame̱tānru̍da̱to jakṣa̍ta̱ścāyo̍dhayo̱ raja̍sa indra pā̱re | avā̍daho di̱va ā dasyu̍mu̱ccā pra su̍nva̱taḥ stu̍va̱taḥ śaṁsa̍māvaḥ || 1.033.07 ||
च॒क्रा॒णासः॑ परी॒णहं॑ पृथि॒व्या हिर॑ण्येन म॒णिना॒ शुम्भ॑मानाः । न हि॑न्वा॒नास॑स्तितिरु॒स्त इन्द्रं॒ परि॒ स्पशो॑ अदधा॒त्सूर्ये॑ण ॥ १.३३.०८ ॥
ca̱krā̱ṇāsa̍ḥ parī̱ṇaha̍ṁ pṛthi̱vyā hira̍ṇyena ma̱ṇinā̱ śumbha̍mānāḥ | na hi̍nvā̱nāsa̍stitiru̱sta indra̱ṁ pari̱ spaśo̍ adadhā̱tsūrye̍ṇa || 1.033.08 ||
परि॒ यदि॑न्द्र॒ रोद॑सी उ॒भे अबु॑भोजीर्महि॒ना वि॒श्वतः॑ सीम् । अम॑न्यमानाँ अ॒भि मन्य॑मानै॒र्निर्ब्र॒ह्मभि॑रधमो॒ दस्यु॑मिन्द्र ॥ १.३३.०९ ॥
pari̱ yadi̍ndra̱ roda̍sī u̱bhe abu̍bhojīrmahi̱nā vi̱śvata̍ḥ sīm | ama̍nyamānā a̱bhi manya̍mānai̱rnirbra̱hmabhi̍radhamo̱ dasyu̍mindra || 1.033.09 ||
न ये दि॒वः पृ॑थि॒व्या अन्त॑मा॒पुर्न मा॒याभि॑र्धन॒दां प॒र्यभू॑वन् । युजं॒ वज्रं॑ वृष॒भश्च॑क्र॒ इन्द्रो॒ निर्ज्योति॑षा॒ तम॑सो॒ गा अ॑दुक्षत् ॥ १.३३.१० ॥
na ye di̱vaḥ pṛ̍thi̱vyā anta̍mā̱purna mā̱yābhi̍rdhana̱dāṁ pa̱ryabhū̍van | yuja̱ṁ vajra̍ṁ vṛṣa̱bhaśca̍kra̱ indro̱ nirjyoti̍ṣā̱ tama̍so̱ gā a̍dukṣat || 1.033.10 ||
अनु॑ स्व॒धाम॑क्षर॒न्नापो॑ अ॒स्याव॑र्धत॒ मध्य॒ आ ना॒व्या॑नाम् । स॒ध्री॒चीने॑न॒ मन॑सा॒ तमिन्द्र॒ ओजि॑ष्ठेन॒ हन्म॑नाहन्न॒भि द्यून् ॥ १.३३.११ ॥
anu̍ sva̱dhāma̍kṣara̱nnāpo̍ a̱syāva̍rdhata̱ madhya̱ ā nā̱vyā̍nām | sa̱dhrī̱cīne̍na̱ mana̍sā̱ tamindra̱ oji̍ṣṭhena̱ hanma̍nāhanna̱bhi dyūn || 1.033.11 ||
न्या॑विध्यदिली॒बिश॑स्य दृ॒lहा वि शृ॒ङ्गिण॑मभिन॒च्छुष्ण॒मिन्द्रः॑ । याव॒त्तरो॑ मघव॒न्याव॒दोजो॒ वज्रे॑ण॒ शत्रु॑मवधीः पृत॒न्युम् ॥ १.३३.१२ ॥
nyā̍vidhyadilī̱biśa̍sya dṛ̱ḻhā vi śṛ̱ṅgiṇa̍mabhina̱cchuṣṇa̱mindra̍ḥ | yāva̱ttaro̍ maghava̱nyāva̱dojo̱ vajre̍ṇa̱ śatru̍mavadhīḥ pṛta̱nyum || 1.033.12 ||
अ॒भि सि॒ध्मो अ॑जिगादस्य॒ शत्रू॒न्वि ति॒ग्मेन॑ वृष॒भेणा॒ पुरो॑ऽभेत् । सं वज्रे॑णासृजद्वृ॒त्रमिन्द्रः॒ प्र स्वां म॒तिम॑तिर॒च्छाश॑दानः ॥ १.३३.१३ ॥
a̱bhi si̱dhmo a̍jigādasya̱ śatrū̱nvi ti̱gmena̍ vṛṣa̱bheṇā̱ puro̍'bhet | saṁ vajre̍ṇāsṛjadvṛ̱tramindra̱ḥ pra svāṁ ma̱tima̍tira̱cchāśa̍dānaḥ || 1.033.13 ||
आवः॒ कुत्स॑मिन्द्र॒ यस्मि॑ञ्चा॒कन्प्रावो॒ युध्य॑न्तं वृष॒भं दश॑द्युम् । श॒फच्यु॑तो रे॒णुर्न॑क्षत॒ द्यामुच्छ्वै॑त्रे॒यो नृ॒षाह्या॑य तस्थौ ॥ १.३३.१४ ॥
āva̱ḥ kutsa̍mindra̱ yasmi̍ñcā̱kanprāvo̱ yudhya̍ntaṁ vṛṣa̱bhaṁ daśa̍dyum | śa̱phacyu̍to re̱ṇurna̍kṣata̱ dyāmucchvai̍tre̱yo nṛ̱ṣāhyā̍ya tasthau || 1.033.14 ||
आवः॒ शमं॑ वृष॒भं तुग्र्या॑सु क्षेत्रजे॒षे म॑घव॒ञ्छ्वित्र्यं॒ गाम् । ज्योक्चि॒दत्र॑ तस्थि॒वांसो॑ अक्रञ्छत्रूय॒तामध॑रा॒ वेद॑नाकः ॥ १.३३.१५ ॥
āva̱ḥ śama̍ṁ vṛṣa̱bhaṁ tugryā̍su kṣetraje̱ṣe ma̍ghava̱ñchvitrya̱ṁ gām | jyokci̱datra̍ tasthi̱vāṁso̍ akrañchatrūya̱tāmadha̍rā̱ veda̍nākaḥ || 1.033.15 ||
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
