Gyaandweep | Rig Veda Mandala , 1

कद्रु॒द्राय॒ प्रचे॑तसे मी॒lहुष्ट॑माय॒ तव्य॑से । वो॒चेम॒ शंत॑मं हृ॒दे ॥ १.४३.०१ ॥

kadru̱drāya̱ prace̍tase mī̱ḻhuṣṭa̍māya̱ tavya̍se | vo̱cema̱ śaṁta̍maṁ hṛ̱de || 1.043.01 ||

यथा॑ नो॒ अदि॑तिः॒ कर॒त्पश्वे॒ नृभ्यो॒ यथा॒ गवे॑ । यथा॑ तो॒काय॑ रु॒द्रिय॑म् ॥ १.४३.०२ ॥

yathā̍ no̱ adi̍ti̱ḥ kara̱tpaśve̱ nṛbhyo̱ yathā̱ gave̍ | yathā̍ to̱kāya̍ ru̱driya̍m || 1.043.02 ||

यथा॑ नो मि॒त्रो वरु॑णो॒ यथा॑ रु॒द्रश्चिके॑तति । यथा॒ विश्वे॑ स॒जोष॑सः ॥ १.४३.०३ ॥

yathā̍ no mi̱tro varu̍ṇo̱ yathā̍ ru̱draścike̍tati | yathā̱ viśve̍ sa̱joṣa̍saḥ || 1.043.03 ||

गा॒थप॑तिं मे॒धप॑तिं रु॒द्रं जला॑षभेषजम् । तच्छं॒योः सु॒म्नमी॑महे ॥ १.४३.०४ ॥

gā̱thapa̍tiṁ me̱dhapa̍tiṁ ru̱draṁ jalā̍ṣabheṣajam | taccha̱ṁyoḥ su̱mnamī̍mahe || 1.043.04 ||

यः शु॒क्र इ॑व॒ सूर्यो॒ हिर॑ण्यमिव॒ रोच॑ते । श्रेष्ठो॑ दे॒वानां॒ वसुः॑ ॥ १.४३.०५ ॥

yaḥ śu̱kra i̍va̱ sūryo̱ hira̍ṇyamiva̱ roca̍te | śreṣṭho̍ de̱vānā̱ṁ vasu̍ḥ || 1.043.05 ||

शं नः॑ कर॒त्यर्व॑ते सु॒गं मे॒षाय॑ मे॒ष्ये॑ । नृभ्यो॒ नारि॑भ्यो॒ गवे॑ ॥ १.४३.०६ ॥

śaṁ na̍ḥ kara̱tyarva̍te su̱gaṁ me̱ṣāya̍ me̱ṣye̍ | nṛbhyo̱ nāri̍bhyo̱ gave̍ || 1.043.06 ||

अ॒स्मे सो॑म॒ श्रिय॒मधि॒ नि धे॑हि श॒तस्य॑ नृ॒णाम् । महि॒ श्रव॑स्तुविनृ॒म्णम् ॥ १.४३.०७ ॥

a̱sme so̍ma̱ śriya̱madhi̱ ni dhe̍hi śa̱tasya̍ nṛ̱ṇām | mahi̱ śrava̍stuvinṛ̱mṇam || 1.043.07 ||

मा नः॑ सोमपरि॒बाधो॒ मारा॑तयो जुहुरन्त । आ न॑ इन्दो॒ वाजे॑ भज ॥ १.४३.०८ ॥

mā na̍ḥ somapari̱bādho̱ mārā̍tayo juhuranta | ā na̍ indo̱ vāje̍ bhaja || 1.043.08 ||

यास्ते॑ प्र॒जा अ॒मृत॑स्य॒ पर॑स्मि॒न्धाम॑न्नृ॒तस्य॑ । मू॒र्धा नाभा॑ सोम वेन आ॒भूष॑न्तीः सोम वेदः ॥ १.४३.०९ ॥

yāste̍ pra̱jā a̱mṛta̍sya̱ para̍smi̱ndhāma̍nnṛ̱tasya̍ | mū̱rdhā nābhā̍ soma vena ā̱bhūṣa̍ntīḥ soma vedaḥ || 1.043.09 ||

Languages