Gyaandweep | Rig Veda Mandala , 1

ए॒षो उ॒षा अपू॑र्व्या॒ व्यु॑च्छति प्रि॒या दि॒वः । स्तु॒षे वा॑मश्विना बृ॒हत् ॥ १.४६.०१ ॥

e̱ṣo u̱ṣā apū̍rvyā̱ vyu̍cchati pri̱yā di̱vaḥ | stu̱ṣe vā̍maśvinā bṛ̱hat || 1.046.01 ||

या द॒स्रा सिन्धु॑मातरा मनो॒तरा॑ रयी॒णाम् । धि॒या दे॒वा व॑सु॒विदा॑ ॥ १.४६.०२ ॥

yā da̱srā sindhu̍mātarā mano̱tarā̍ rayī̱ṇām | dhi̱yā de̱vā va̍su̱vidā̍ || 1.046.02 ||

व॒च्यन्ते॑ वां ककु॒हासो॑ जू॒र्णाया॒मधि॑ वि॒ष्टपि॑ । यद्वां॒ रथो॒ विभि॒ष्पता॑त् ॥ १.४६.०३ ॥

va̱cyante̍ vāṁ kaku̱hāso̍ jū̱rṇāyā̱madhi̍ vi̱ṣṭapi̍ | yadvā̱ṁ ratho̱ vibhi̱ṣpatā̍t || 1.046.03 ||

ह॒विषा॑ जा॒रो अ॒पां पिप॑र्ति॒ पपु॑रिर्नरा । पि॒ता कुट॑स्य चर्ष॒णिः ॥ १.४६.०४ ॥

ha̱viṣā̍ jā̱ro a̱pāṁ pipa̍rti̱ papu̍rirnarā | pi̱tā kuṭa̍sya carṣa̱ṇiḥ || 1.046.04 ||

आ॒दा॒रो वां॑ मती॒नां नास॑त्या मतवचसा । पा॒तं सोम॑स्य धृष्णु॒या ॥ १.४६.०५ ॥

ā̱dā̱ro vā̍ṁ matī̱nāṁ nāsa̍tyā matavacasā | pā̱taṁ soma̍sya dhṛṣṇu̱yā || 1.046.05 ||

या नः॒ पीप॑रदश्विना॒ ज्योति॑ष्मती॒ तम॑स्ति॒रः । ताम॒स्मे रा॑साथा॒मिष॑म् ॥ १.४६.०६ ॥

yā na̱ḥ pīpa̍radaśvinā̱ jyoti̍ṣmatī̱ tama̍sti̱raḥ | tāma̱sme rā̍sāthā̱miṣa̍m || 1.046.06 ||

आ नो॑ ना॒वा म॑ती॒नां या॒तं पा॒राय॒ गन्त॑वे । यु॒ञ्जाथा॑मश्विना॒ रथ॑म् ॥ १.४६.०७ ॥

ā no̍ nā̱vā ma̍tī̱nāṁ yā̱taṁ pā̱rāya̱ ganta̍ve | yu̱ñjāthā̍maśvinā̱ ratha̍m || 1.046.07 ||

अ॒रित्रं॑ वां दि॒वस्पृ॒थु ती॒र्थे सिन्धू॑नां॒ रथः॑ । धि॒या यु॑युज्र॒ इन्द॑वः ॥ १.४६.०८ ॥

a̱ritra̍ṁ vāṁ di̱vaspṛ̱thu tī̱rthe sindhū̍nā̱ṁ ratha̍ḥ | dhi̱yā yu̍yujra̱ inda̍vaḥ || 1.046.08 ||

दि॒वस्क॑ण्वास॒ इन्द॑वो॒ वसु॒ सिन्धू॑नां प॒दे । स्वं व॒व्रिं कुह॑ धित्सथः ॥ १.४६.०९ ॥

di̱vaska̍ṇvāsa̱ inda̍vo̱ vasu̱ sindhū̍nāṁ pa̱de | svaṁ va̱vriṁ kuha̍ dhitsathaḥ || 1.046.09 ||

अभू॑दु॒ भा उ॑ अं॒शवे॒ हिर॑ण्यं॒ प्रति॒ सूर्यः॑ । व्य॑ख्यज्जि॒ह्वयासि॑तः ॥ १.४६.१० ॥

abhū̍du̱ bhā u̍ a̱ṁśave̱ hira̍ṇya̱ṁ prati̱ sūrya̍ḥ | vya̍khyajji̱hvayāsi̍taḥ || 1.046.10 ||

अभू॑दु पा॒रमेत॑वे॒ पन्था॑ ऋ॒तस्य॑ साधु॒या । अद॑र्शि॒ वि स्रु॒तिर्दि॒वः ॥ १.४६.११ ॥

abhū̍du pā̱rameta̍ve̱ panthā̍ ṛ̱tasya̍ sādhu̱yā | ada̍rśi̱ vi sru̱tirdi̱vaḥ || 1.046.11 ||

तत्त॒दिद॒श्विनो॒रवो॑ जरि॒ता प्रति॑ भूषति । मदे॒ सोम॑स्य॒ पिप्र॑तोः ॥ १.४६.१२ ॥

tatta̱dida̱śvino̱ravo̍ jari̱tā prati̍ bhūṣati | made̱ soma̍sya̱ pipra̍toḥ || 1.046.12 ||

वा॒व॒सा॒ना वि॒वस्व॑ति॒ सोम॑स्य पी॒त्या गि॒रा । म॒नु॒ष्वच्छ॑म्भू॒ आ ग॑तम् ॥ १.४६.१३ ॥

vā̱va̱sā̱nā vi̱vasva̍ti̱ soma̍sya pī̱tyā gi̱rā | ma̱nu̱ṣvaccha̍mbhū̱ ā ga̍tam || 1.046.13 ||

यु॒वोरु॒षा अनु॒ श्रियं॒ परि॑ज्मनोरु॒पाच॑रत् । ऋ॒ता व॑नथो अ॒क्तुभिः॑ ॥ १.४६.१४ ॥

yu̱voru̱ṣā anu̱ śriya̱ṁ pari̍jmanoru̱pāca̍rat | ṛ̱tā va̍natho a̱ktubhi̍ḥ || 1.046.14 ||

उ॒भा पि॑बतमश्विनो॒भा नः॒ शर्म॑ यच्छतम् । अ॒वि॒द्रि॒याभि॑रू॒तिभिः॑ ॥ १.४६.१५ ॥

u̱bhā pi̍batamaśvino̱bhā na̱ḥ śarma̍ yacchatam | a̱vi̱dri̱yābhi̍rū̱tibhi̍ḥ || 1.046.15 ||

Languages