Gyaandweep | Rig Veda Mandala , 1

आ त्वेता॒ नि षी॑द॒तेन्द्र॑म॒भि प्र गा॑यत । सखा॑यः॒ स्तोम॑वाहसः ॥ १.५.०१ ॥

ā tvetā̱ ni ṣī̍da̱tendra̍ma̱bhi pra gā̍yata | sakhā̍ya̱ḥ stoma̍vāhasaḥ || 1.005.01 ||

पु॒रू॒तमं॑ पुरू॒णामीशा॑नं॒ वार्या॑णाम् । इन्द्रं॒ सोमे॒ सचा॑ सु॒ते ॥ १.५.०२ ॥

pu̱rū̱tama̍ṁ purū̱ṇāmīśā̍na̱ṁ vāryā̍ṇām | indra̱ṁ some̱ sacā̍ su̱te || 1.005.02 ||

स घा॑ नो॒ योग॒ आ भु॑व॒त्स रा॒ये स पुरं॑ध्याम् । गम॒द्वाजे॑भि॒रा स नः॑ ॥ १.५.०३ ॥

sa ghā̍ no̱ yoga̱ ā bhu̍va̱tsa rā̱ye sa pura̍ṁdhyām | gama̱dvāje̍bhi̱rā sa na̍ḥ || 1.005.03 ||

यस्य॑ सं॒स्थे न वृ॒ण्वते॒ हरी॑ स॒मत्सु॒ शत्र॑वः । तस्मा॒ इन्द्रा॑य गायत ॥ १.५.०४ ॥

yasya̍ sa̱ṁsthe na vṛ̱ṇvate̱ harī̍ sa̱matsu̱ śatra̍vaḥ | tasmā̱ indrā̍ya gāyata || 1.005.04 ||

सु॒त॒पाव्ने॑ सु॒ता इ॒मे शुच॑यो यन्ति वी॒तये॑ । सोमा॑सो॒ दध्या॑शिरः ॥ १.५.०५ ॥

su̱ta̱pāvne̍ su̱tā i̱me śuca̍yo yanti vī̱taye̍ | somā̍so̱ dadhyā̍śiraḥ || 1.005.05 ||

त्वं सु॒तस्य॑ पी॒तये॑ स॒द्यो वृ॒द्धो अ॑जायथाः । इन्द्र॒ ज्यैष्ठ्या॑य सुक्रतो ॥ १.५.०६ ॥

tvaṁ su̱tasya̍ pī̱taye̍ sa̱dyo vṛ̱ddho a̍jāyathāḥ | indra̱ jyaiṣṭhyā̍ya sukrato || 1.005.06 ||

आ त्वा॑ विशन्त्वा॒शवः॒ सोमा॑स इन्द्र गिर्वणः । शं ते॑ सन्तु॒ प्रचे॑तसे ॥ १.५.०७ ॥

ā tvā̍ viśantvā̱śava̱ḥ somā̍sa indra girvaṇaḥ | śaṁ te̍ santu̱ prace̍tase || 1.005.07 ||

त्वां स्तोमा॑ अवीवृध॒न्त्वामु॒क्था श॑तक्रतो । त्वां व॑र्धन्तु नो॒ गिरः॑ ॥ १.५.०८ ॥

tvāṁ stomā̍ avīvṛdha̱ntvāmu̱kthā śa̍takrato | tvāṁ va̍rdhantu no̱ gira̍ḥ || 1.005.08 ||

अक्षि॑तोतिः सनेदि॒मं वाज॒मिन्द्रः॑ सह॒स्रिण॑म् । यस्मि॒न्विश्वा॑नि॒ पौंस्या॑ ॥ १.५.०९ ॥

akṣi̍totiḥ sanedi̱maṁ vāja̱mindra̍ḥ saha̱sriṇa̍m | yasmi̱nviśvā̍ni̱ pauṁsyā̍ || 1.005.09 ||

मा नो॒ मर्ता॑ अ॒भि द्रु॑हन्त॒नूना॑मिन्द्र गिर्वणः । ईशा॑नो यवया व॒धम् ॥ १.५.१० ॥

mā no̱ martā̍ a̱bhi dru̍hanta̱nūnā̍mindra girvaṇaḥ | īśā̍no yavayā va̱dham || 1.005.10 ||

Languages