Gyaandweep | Rig Veda Mandala , 1

प॒श्वा न ता॒युं गुहा॒ चत॑न्तं॒ नमो॑ युजा॒नं नमो॒ वह॑न्तम् ॥ १.६५.०१ ॥

pa̱śvā na tā̱yuṁ guhā̱ cata̍nta̱ṁ namo̍ yujā̱naṁ namo̱ vaha̍ntam || 1.065.01 ||

स॒जोषा॒ धीराः॑ प॒दैरनु॑ ग्म॒न्नुप॑ त्वा सीद॒न्विश्वे॒ यज॑त्राः ॥ १.६५.०२ ॥

sa̱joṣā̱ dhīrā̍ḥ pa̱dairanu̍ gma̱nnupa̍ tvā sīda̱nviśve̱ yaja̍trāḥ || 1.065.02 ||

ऋ॒तस्य॑ दे॒वा अनु॑ व्र॒ता गु॒र्भुव॒त्परि॑ष्टि॒र्द्यौर्न भूम॑ ॥ १.६५.०३ ॥

ṛ̱tasya̍ de̱vā anu̍ vra̱tā gu̱rbhuva̱tpari̍ṣṭi̱rdyaurna bhūma̍ || 1.065.03 ||

वर्ध॑न्ती॒मापः॑ प॒न्वा सुशि॑श्विमृ॒तस्य॒ योना॒ गर्भे॒ सुजा॑तम् ॥ १.६५.०४ ॥

vardha̍ntī̱māpa̍ḥ pa̱nvā suśi̍śvimṛ̱tasya̱ yonā̱ garbhe̱ sujā̍tam || 1.065.04 ||

पु॒ष्टिर्न र॒ण्वा क्षि॒तिर्न पृ॒थ्वी गि॒रिर्न भुज्म॒ क्षोदो॒ न श॒म्भु ॥ १.६५.०५ ॥

pu̱ṣṭirna ra̱ṇvā kṣi̱tirna pṛ̱thvī gi̱rirna bhujma̱ kṣodo̱ na śa̱mbhu || 1.065.05 ||

अत्यो॒ नाज्म॒न्सर्ग॑प्रतक्तः॒ सिन्धु॒र्न क्षोदः॒ क ईं॑ वराते ॥ १.६५.०६ ॥

atyo̱ nājma̱nsarga̍pratakta̱ḥ sindhu̱rna kṣoda̱ḥ ka ī̍ṁ varāte || 1.065.06 ||

जा॒मिः सिन्धू॑नां॒ भ्राते॑व॒ स्वस्रा॒मिभ्या॒न्न राजा॒ वना॑न्यत्ति ॥ १.६५.०७ ॥

jā̱miḥ sindhū̍nā̱ṁ bhrāte̍va̱ svasrā̱mibhyā̱nna rājā̱ vanā̍nyatti || 1.065.07 ||

यद्वात॑जूतो॒ वना॒ व्यस्था॑द॒ग्निर्ह॑ दाति॒ रोमा॑ पृथि॒व्याः ॥ १.६५.०८ ॥

yadvāta̍jūto̱ vanā̱ vyasthā̍da̱gnirha̍ dāti̱ romā̍ pṛthi̱vyāḥ || 1.065.08 ||

श्वसि॑त्य॒प्सु हं॒सो न सीद॒न्क्रत्वा॒ चेति॑ष्ठो वि॒शामु॑ष॒र्भुत् ॥ १.६५.०९ ॥

śvasi̍tya̱psu ha̱ṁso na sīda̱nkratvā̱ ceti̍ṣṭho vi̱śāmu̍ṣa̱rbhut || 1.065.09 ||

सोमो॒ न वे॒धा ऋ॒तप्र॑जातः प॒शुर्न शिश्वा॑ वि॒भुर्दू॒रेभाः॑ ॥ १.६५.१० ॥

somo̱ na ve̱dhā ṛ̱tapra̍jātaḥ pa̱śurna śiśvā̍ vi̱bhurdū̱rebhā̍ḥ || 1.065.10 ||

Languages