Gyaandweep | Rig Veda Mandala , 1

श्री॒णन्नुप॑ स्था॒द्दिवं॑ भुर॒ण्युः स्था॒तुश्च॒रथ॑म॒क्तून्व्यू॑र्णोत् ॥ १.६८.०१ ॥

śrī̱ṇannupa̍ sthā̱ddiva̍ṁ bhura̱ṇyuḥ sthā̱tuśca̱ratha̍ma̱ktūnvyū̍rṇot || 1.068.01 ||

परि॒ यदे॑षा॒मेको॒ विश्वे॑षां॒ भुव॑द्दे॒वो दे॒वानां॑ महि॒त्वा ॥ १.६८.०२ ॥

pari̱ yade̍ṣā̱meko̱ viśve̍ṣā̱ṁ bhuva̍dde̱vo de̱vānā̍ṁ mahi̱tvā || 1.068.02 ||

आदित्ते॒ विश्वे॒ क्रतुं॑ जुषन्त॒ शुष्का॒द्यद्दे॑व जी॒वो जनि॑ष्ठाः ॥ १.६८.०३ ॥

āditte̱ viśve̱ kratu̍ṁ juṣanta̱ śuṣkā̱dyadde̍va jī̱vo jani̍ṣṭhāḥ || 1.068.03 ||

भज॑न्त॒ विश्वे॑ देव॒त्वं नाम॑ ऋ॒तं सप॑न्तो अ॒मृत॒मेवैः॑ ॥ १.६८.०४ ॥

bhaja̍nta̱ viśve̍ deva̱tvaṁ nāma̍ ṛ̱taṁ sapa̍nto a̱mṛta̱mevai̍ḥ || 1.068.04 ||

ऋ॒तस्य॒ प्रेषा॑ ऋ॒तस्य॑ धी॒तिर्वि॒श्वायु॒र्विश्वे॒ अपां॑सि चक्रुः ॥ १.६८.०५ ॥

ṛ̱tasya̱ preṣā̍ ṛ̱tasya̍ dhī̱tirvi̱śvāyu̱rviśve̱ apā̍ṁsi cakruḥ || 1.068.05 ||

यस्तुभ्यं॒ दाशा॒द्यो वा॑ ते॒ शिक्षा॒त्तस्मै॑ चिकि॒त्वान्र॒यिं द॑यस्व ॥ १.६८.०६ ॥

yastubhya̱ṁ dāśā̱dyo vā̍ te̱ śikṣā̱ttasmai̍ ciki̱tvānra̱yiṁ da̍yasva || 1.068.06 ||

होता॒ निष॑त्तो॒ मनो॒रप॑त्ये॒ स चि॒न्न्वा॑सां॒ पती॑ रयी॒णाम् ॥ १.६८.०७ ॥

hotā̱ niṣa̍tto̱ mano̱rapa̍tye̱ sa ci̱nnvā̍sā̱ṁ patī̍ rayī̱ṇām || 1.068.07 ||

इ॒च्छन्त॒ रेतो॑ मि॒थस्त॒नूषु॒ सं जा॑नत॒ स्वैर्दक्षै॒रमू॑राः ॥ १.६८.०८ ॥

i̱cchanta̱ reto̍ mi̱thasta̱nūṣu̱ saṁ jā̍nata̱ svairdakṣai̱ramū̍rāḥ || 1.068.08 ||

पि॒तुर्न पु॒त्राः क्रतुं॑ जुषन्त॒ श्रोष॒न्ये अ॑स्य॒ शासं॑ तु॒रासः॑ ॥ १.६८.०९ ॥

pi̱turna pu̱trāḥ kratu̍ṁ juṣanta̱ śroṣa̱nye a̍sya̱ śāsa̍ṁ tu̱rāsa̍ḥ || 1.068.09 ||

वि राय॑ और्णो॒द्दुरः॑ पुरु॒क्षुः पि॒पेश॒ नाकं॒ स्तृभि॒र्दमू॑नाः ॥ १.६८.१० ॥

vi rāya̍ aurṇo̱ddura̍ḥ puru̱kṣuḥ pi̱peśa̱ nāka̱ṁ stṛbhi̱rdamū̍nāḥ || 1.068.10 ||

Languages