Gyaandweep | Rig Veda Mandala , 1

इन्द्र॒मिद्गा॒थिनो॑ बृ॒हदिन्द्र॑म॒र्केभि॑र॒र्किणः॑ । इन्द्रं॒ वाणी॑रनूषत ॥ १.७.०१ ॥

indra̱midgā̱thino̍ bṛ̱hadindra̍ma̱rkebhi̍ra̱rkiṇa̍ḥ | indra̱ṁ vāṇī̍ranūṣata || 1.007.01 ||

इन्द्र॒ इद्धर्योः॒ सचा॒ सम्मि॑श्ल॒ आ व॑चो॒युजा॑ । इन्द्रो॑ व॒ज्री हि॑र॒ण्ययः॑ ॥ १.७.०२ ॥

indra̱ iddharyo̱ḥ sacā̱ sammi̍śla̱ ā va̍co̱yujā̍ | indro̍ va̱jrī hi̍ra̱ṇyaya̍ḥ || 1.007.02 ||

इन्द्रो॑ दी॒र्घाय॒ चक्ष॑स॒ आ सूर्यं॑ रोहयद्दि॒वि । वि गोभि॒रद्रि॑मैरयत् ॥ १.७.०३ ॥

indro̍ dī̱rghāya̱ cakṣa̍sa̱ ā sūrya̍ṁ rohayaddi̱vi | vi gobhi̱radri̍mairayat || 1.007.03 ||

इन्द्र॒ वाजे॑षु नोऽव स॒हस्र॑प्रधनेषु च । उ॒ग्र उ॒ग्राभि॑रू॒तिभिः॑ ॥ १.७.०४ ॥

indra̱ vāje̍ṣu no'va sa̱hasra̍pradhaneṣu ca | u̱gra u̱grābhi̍rū̱tibhi̍ḥ || 1.007.04 ||

इन्द्रं॑ व॒यं म॑हाध॒न इन्द्र॒मर्भे॑ हवामहे । युजं॑ वृ॒त्रेषु॑ व॒ज्रिण॑म् ॥ १.७.०५ ॥

indra̍ṁ va̱yaṁ ma̍hādha̱na indra̱marbhe̍ havāmahe | yuja̍ṁ vṛ̱treṣu̍ va̱jriṇa̍m || 1.007.05 ||

स नो॑ वृषन्न॒मुं च॒रुं सत्रा॑दाव॒न्नपा॑ वृधि । अ॒स्मभ्य॒मप्र॑तिष्कुतः ॥ १.७.०६ ॥

sa no̍ vṛṣanna̱muṁ ca̱ruṁ satrā̍dāva̱nnapā̍ vṛdhi | a̱smabhya̱mapra̍tiṣkutaḥ || 1.007.06 ||

तु॒ञ्जेतु॑ञ्जे॒ य उत्त॑रे॒ स्तोमा॒ इन्द्र॑स्य व॒ज्रिणः॑ । न वि॑न्धे अस्य सुष्टु॒तिम् ॥ १.७.०७ ॥

tu̱ñjetu̍ñje̱ ya utta̍re̱ stomā̱ indra̍sya va̱jriṇa̍ḥ | na vi̍ndhe asya suṣṭu̱tim || 1.007.07 ||

वृषा॑ यू॒थेव॒ वंस॑गः कृ॒ष्टीरि॑य॒र्त्योज॑सा । ईशा॑नो॒ अप्र॑तिष्कुतः ॥ १.७.०८ ॥

vṛṣā̍ yū̱theva̱ vaṁsa̍gaḥ kṛ̱ṣṭīri̍ya̱rtyoja̍sā | īśā̍no̱ apra̍tiṣkutaḥ || 1.007.08 ||

य एक॑श्चर्षणी॒नां वसू॑नामिर॒ज्यति॑ । इन्द्रः॒ पञ्च॑ क्षिती॒नाम् ॥ १.७.०९ ॥

ya eka̍ścarṣaṇī̱nāṁ vasū̍nāmira̱jyati̍ | indra̱ḥ pañca̍ kṣitī̱nām || 1.007.09 ||

इन्द्रं॑ वो वि॒श्वत॒स्परि॒ हवा॑महे॒ जने॑भ्यः । अ॒स्माक॑मस्तु॒ केव॑लः ॥ १.७.१० ॥

indra̍ṁ vo vi̱śvata̱spari̱ havā̍mahe̱ jane̍bhyaḥ | a̱smāka̍mastu̱ keva̍laḥ || 1.007.10 ||

Languages