Gyaandweep | Rig Veda Mandala , 1

व॒नेम॑ पू॒र्वीर॒र्यो म॑नी॒षा अ॒ग्निः सु॒शोको॒ विश्वा॑न्यश्याः ॥ १.७०.०१ ॥

va̱nema̍ pū̱rvīra̱ryo ma̍nī̱ṣā a̱gniḥ su̱śoko̱ viśvā̍nyaśyāḥ || 1.070.01 ||

आ दैव्या॑नि व्र॒ता चि॑कि॒त्वाना मानु॑षस्य॒ जन॑स्य॒ जन्म॑ ॥ १.७०.०२ ॥

ā daivyā̍ni vra̱tā ci̍ki̱tvānā mānu̍ṣasya̱ jana̍sya̱ janma̍ || 1.070.02 ||

गर्भो॒ यो अ॒पां गर्भो॒ वना॑नां॒ गर्भ॑श्च स्था॒तां गर्भ॑श्च॒रथा॑म् ॥ १.७०.०३ ॥

garbho̱ yo a̱pāṁ garbho̱ vanā̍nā̱ṁ garbha̍śca sthā̱tāṁ garbha̍śca̱rathā̍m || 1.070.03 ||

अद्रौ॑ चिदस्मा अ॒न्तर्दु॑रो॒णे वि॒शां न विश्वो॑ अ॒मृतः॑ स्वा॒धीः ॥ १.७०.०४ ॥

adrau̍ cidasmā a̱ntardu̍ro̱ṇe vi̱śāṁ na viśvo̍ a̱mṛta̍ḥ svā̱dhīḥ || 1.070.04 ||

स हि क्ष॒पावा॑ँ अ॒ग्नी र॑यी॒णां दाश॒द्यो अ॑स्मा॒ अरं॑ सू॒क्तैः ॥ १.७०.०५ ॥

sa hi kṣa̱pāvā̍ a̱gnī ra̍yī̱ṇāṁ dāśa̱dyo a̍smā̱ ara̍ṁ sū̱ktaiḥ || 1.070.05 ||

ए॒ता चि॑कित्वो॒ भूमा॒ नि पा॑हि दे॒वानां॒ जन्म॒ मर्ता॑ँश्च वि॒द्वान् ॥ १.७०.०६ ॥

e̱tā ci̍kitvo̱ bhūmā̱ ni pā̍hi de̱vānā̱ṁ janma̱ martā̍śca vi̱dvān || 1.070.06 ||

वर्धा॒न्यं पू॒र्वीः क्ष॒पो विरू॑पाः स्था॒तुश्च॒ रथ॑मृ॒तप्र॑वीतम् ॥ १.७०.०७ ॥

vardhā̱nyaṁ pū̱rvīḥ kṣa̱po virū̍pāḥ sthā̱tuśca̱ ratha̍mṛ̱tapra̍vītam || 1.070.07 ||

अरा॑धि॒ होता॒ स्व॑र्निष॑त्तः कृ॒ण्वन्विश्वा॒न्यपां॑सि स॒त्या ॥ १.७०.०८ ॥

arā̍dhi̱ hotā̱ sva1̱̍rniṣa̍ttaḥ kṛ̱ṇvanviśvā̱nyapā̍ṁsi sa̱tyā || 1.070.08 ||

गोषु॒ प्रश॑स्तिं॒ वने॑षु धिषे॒ भर॑न्त॒ विश्वे॑ ब॒लिं स्व॑र्णः ॥ १.७०.०९ ॥

goṣu̱ praśa̍sti̱ṁ vane̍ṣu dhiṣe̱ bhara̍nta̱ viśve̍ ba̱liṁ sva̍rṇaḥ || 1.070.09 ||

वि त्वा॒ नरः॑ पुरु॒त्रा स॑पर्यन्पि॒तुर्न जिव्रे॒र्वि वेदो॑ भरन्त ॥ १.७०.१० ॥

vi tvā̱ nara̍ḥ puru̱trā sa̍paryanpi̱turna jivre̱rvi vedo̍ bharanta || 1.070.10 ||

सा॒धुर्न गृ॒ध्नुरस्ते॑व॒ शूरो॒ याते॑व भी॒मस्त्वे॒षः स॒मत्सु॑ ॥ १.७०.११ ॥

sā̱dhurna gṛ̱dhnuraste̍va̱ śūro̱ yāte̍va bhī̱mastve̱ṣaḥ sa̱matsu̍ || 1.070.11 ||

Languages