नि काव्या॑ वे॒धसः॒ शश्व॑तस्क॒र्हस्ते॒ दधा॑नो॒ नर्या॑ पु॒रूणि॑ । अ॒ग्निर्भु॑वद्रयि॒पती॑ रयी॒णां स॒त्रा च॑क्रा॒णो अ॒मृता॑नि॒ विश्वा॑ ॥ १.७२.०१ ॥
ni kāvyā̍ ve̱dhasa̱ḥ śaśva̍taska̱rhaste̱ dadhā̍no̱ naryā̍ pu̱rūṇi̍ | a̱gnirbhu̍vadrayi̱patī̍ rayī̱ṇāṁ sa̱trā ca̍krā̱ṇo a̱mṛtā̍ni̱ viśvā̍ || 1.072.01 ||
अ॒स्मे व॒त्सं परि॒ षन्तं॒ न वि॑न्दन्नि॒च्छन्तो॒ विश्वे॑ अ॒मृता॒ अमू॑राः । श्र॒म॒युवः॑ पद॒व्यो॑ धियं॒धास्त॒स्थुः प॒दे प॑र॒मे चार्व॒ग्नेः ॥ १.७२.०२ ॥
a̱sme va̱tsaṁ pari̱ ṣanta̱ṁ na vi̍ndanni̱cchanto̱ viśve̍ a̱mṛtā̱ amū̍rāḥ | śra̱ma̱yuva̍ḥ pada̱vyo̍ dhiya̱ṁdhāsta̱sthuḥ pa̱de pa̍ra̱me cārva̱gneḥ || 1.072.02 ||
ति॒स्रो यद॑ग्ने श॒रद॒स्त्वामिच्छुचिं॑ घृ॒तेन॒ शुच॑यः सप॒र्यान् । नामा॑नि चिद्दधिरे य॒ज्ञिया॒न्यसू॑दयन्त त॒न्व१॒ः॑ सुजा॑ताः ॥ १.७२.०३ ॥
ti̱sro yada̍gne śa̱rada̱stvāmicchuci̍ṁ ghṛ̱tena̱ śuca̍yaḥ sapa̱ryān | nāmā̍ni ciddadhire ya̱jñiyā̱nyasū̍dayanta ta̱nva1̱̍ḥ sujā̍tāḥ || 1.072.03 ||
आ रोद॑सी बृह॒ती वेवि॑दानाः॒ प्र रु॒द्रिया॑ जभ्रिरे य॒ज्ञिया॑सः । वि॒दन्मर्तो॑ ने॒मधि॑ता चिकि॒त्वान॒ग्निं प॒दे प॑र॒मे त॑स्थि॒वांस॑म् ॥ १.७२.०४ ॥
ā roda̍sī bṛha̱tī vevi̍dānā̱ḥ pra ru̱driyā̍ jabhrire ya̱jñiyā̍saḥ | vi̱danmarto̍ ne̱madhi̍tā ciki̱tvāna̱gniṁ pa̱de pa̍ra̱me ta̍sthi̱vāṁsa̍m || 1.072.04 ||
सं॒जा॒ना॒ना उप॑ सीदन्नभि॒ज्ञु पत्नी॑वन्तो नम॒स्यं॑ नमस्यन् । रि॒रि॒क्वांस॑स्त॒न्वः॑ कृण्वत॒ स्वाः सखा॒ सख्यु॑र्नि॒मिषि॒ रक्ष॑माणाः ॥ १.७२.०५ ॥
sa̱ṁjā̱nā̱nā upa̍ sīdannabhi̱jñu patnī̍vanto nama̱sya̍ṁ namasyan | ri̱ri̱kvāṁsa̍sta̱nva̍ḥ kṛṇvata̱ svāḥ sakhā̱ sakhyu̍rni̱miṣi̱ rakṣa̍māṇāḥ || 1.072.05 ||
त्रिः स॒प्त यद्गुह्या॑नि॒ त्वे इत्प॒दावि॑द॒न्निहि॑ता य॒ज्ञिया॑सः । तेभी॑ रक्षन्ते अ॒मृतं॑ स॒जोषाः॑ प॒शूञ्च॑ स्था॒तॄञ्च॒रथं॑ च पाहि ॥ १.७२.०६ ॥
triḥ sa̱pta yadguhyā̍ni̱ tve itpa̱dāvi̍da̱nnihi̍tā ya̱jñiyā̍saḥ | tebhī̍ rakṣante a̱mṛta̍ṁ sa̱joṣā̍ḥ pa̱śūñca̍ sthā̱tṝñca̱ratha̍ṁ ca pāhi || 1.072.06 ||
वि॒द्वाँ अ॑ग्ने व॒युना॑नि क्षिती॒नां व्या॑नु॒षक्छु॒रुधो॑ जी॒वसे॑ धाः । अ॒न्त॒र्वि॒द्वाँ अध्व॑नो देव॒याना॒नत॑न्द्रो दू॒तो अ॑भवो हवि॒र्वाट् ॥ १.७२.०७ ॥
vi̱dvā a̍gne va̱yunā̍ni kṣitī̱nāṁ vyā̍nu̱ṣakchu̱rudho̍ jī̱vase̍ dhāḥ | a̱nta̱rvi̱dvā adhva̍no deva̱yānā̱nata̍ndro dū̱to a̍bhavo havi̱rvāṭ || 1.072.07 ||
स्वा॒ध्यो॑ दि॒व आ स॒प्त य॒ह्वी रा॒यो दुरो॒ व्यृ॑त॒ज्ञा अ॑जानन् । वि॒दद्गव्यं॑ स॒रमा॑ दृ॒lहमू॒र्वं येना॒ नु कं॒ मानु॑षी॒ भोज॑ते॒ विट् ॥ १.७२.०८ ॥
svā̱dhyo̍ di̱va ā sa̱pta ya̱hvī rā̱yo duro̱ vyṛ̍ta̱jñā a̍jānan | vi̱dadgavya̍ṁ sa̱ramā̍ dṛ̱ḻhamū̱rvaṁ yenā̱ nu ka̱ṁ mānu̍ṣī̱ bhoja̍te̱ viṭ || 1.072.08 ||
आ ये विश्वा॑ स्वप॒त्यानि॑ त॒स्थुः कृ॑ण्वा॒नासो॑ अमृत॒त्वाय॑ गा॒तुम् । म॒ह्ना म॒हद्भिः॑ पृथि॒वी वि त॑स्थे मा॒ता पु॒त्रैरदि॑ति॒र्धाय॑से॒ वेः ॥ १.७२.०९ ॥
ā ye viśvā̍ svapa̱tyāni̍ ta̱sthuḥ kṛ̍ṇvā̱nāso̍ amṛta̱tvāya̍ gā̱tum | ma̱hnā ma̱hadbhi̍ḥ pṛthi̱vī vi ta̍sthe mā̱tā pu̱trairadi̍ti̱rdhāya̍se̱ veḥ || 1.072.09 ||
अधि॒ श्रियं॒ नि द॑धु॒श्चारु॑मस्मिन्दि॒वो यद॒क्षी अ॒मृता॒ अकृ॑ण्वन् । अध॑ क्षरन्ति॒ सिन्ध॑वो॒ न सृ॒ष्टाः प्र नीची॑रग्ने॒ अरु॑षीरजानन् ॥ १.७२.१० ॥
adhi̱ śriya̱ṁ ni da̍dhu̱ścāru̍masmindi̱vo yada̱kṣī a̱mṛtā̱ akṛ̍ṇvan | adha̍ kṣaranti̱ sindha̍vo̱ na sṛ̱ṣṭāḥ pra nīcī̍ragne̱ aru̍ṣīrajānan || 1.072.10 ||
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
