Gyaandweep | Rig Veda Mandala , 1

उ॒प॒प्र॒यन्तो॑ अध्व॒रं मन्त्रं॑ वोचेमा॒ग्नये॑ । आ॒रे अ॒स्मे च॑ श‍ृण्व॒ते ॥ १.७४.०१ ॥

u̱pa̱pra̱yanto̍ adhva̱raṁ mantra̍ṁ vocemā̱gnaye̍ | ā̱re a̱sme ca̍ śṛṇva̱te || 1.074.01 ||

यः स्नीहि॑तीषु पू॒र्व्यः सं॑जग्मा॒नासु॑ कृ॒ष्टिषु॑ । अर॑क्षद्दा॒शुषे॒ गय॑म् ॥ १.७४.०२ ॥

yaḥ snīhi̍tīṣu pū̱rvyaḥ sa̍ṁjagmā̱nāsu̍ kṛ̱ṣṭiṣu̍ | ara̍kṣaddā̱śuṣe̱ gaya̍m || 1.074.02 ||

उ॒त ब्रु॑वन्तु ज॒न्तव॒ उद॒ग्निर्वृ॑त्र॒हाज॑नि । ध॒नं॒ज॒यो रणे॑रणे ॥ १.७४.०३ ॥

u̱ta bru̍vantu ja̱ntava̱ uda̱gnirvṛ̍tra̱hāja̍ni | dha̱na̱ṁja̱yo raṇe̍raṇe || 1.074.03 ||

यस्य॑ दू॒तो असि॒ क्षये॒ वेषि॑ ह॒व्यानि॑ वी॒तये॑ । द॒स्मत्कृ॒णोष्य॑ध्व॒रम् ॥ १.७४.०४ ॥

yasya̍ dū̱to asi̱ kṣaye̱ veṣi̍ ha̱vyāni̍ vī̱taye̍ | da̱smatkṛ̱ṇoṣya̍dhva̱ram || 1.074.04 ||

तमित्सु॑ह॒व्यम॑ङ्गिरः सुदे॒वं स॑हसो यहो । जना॑ आहुः सुब॒र्हिष॑म् ॥ १.७४.०५ ॥

tamitsu̍ha̱vyama̍ṅgiraḥ sude̱vaṁ sa̍haso yaho | janā̍ āhuḥ suba̱rhiṣa̍m || 1.074.05 ||

आ च॒ वहा॑सि॒ ताँ इ॒ह दे॒वाँ उप॒ प्रश॑स्तये । ह॒व्या सु॑श्चन्द्र वी॒तये॑ ॥ १.७४.०६ ॥

ā ca̱ vahā̍si̱ tā i̱ha de̱vā upa̱ praśa̍staye | ha̱vyā su̍ścandra vī̱taye̍ || 1.074.06 ||

न योरु॑प॒ब्दिरश्व्यः॑ श‍ृ॒ण्वे रथ॑स्य॒ कच्च॒न । यद॑ग्ने॒ यासि॑ दू॒त्य॑म् ॥ १.७४.०७ ॥

na yoru̍pa̱bdiraśvya̍ḥ śṛ̱ṇve ratha̍sya̱ kacca̱na | yada̍gne̱ yāsi̍ dū̱tya̍m || 1.074.07 ||

त्वोतो॑ वा॒ज्यह्र॑यो॒ऽभि पूर्व॑स्मा॒दप॑रः । प्र दा॒श्वाँ अ॑ग्ने अस्थात् ॥ १.७४.०८ ॥

tvoto̍ vā̱jyahra̍yo̱'bhi pūrva̍smā̱dapa̍raḥ | pra dā̱śvā a̍gne asthāt || 1.074.08 ||

उ॒त द्यु॒मत्सु॒वीर्यं॑ बृ॒हद॑ग्ने विवाससि । दे॒वेभ्यो॑ देव दा॒शुषे॑ ॥ १.७४.०९ ॥

u̱ta dyu̱matsu̱vīrya̍ṁ bṛ̱hada̍gne vivāsasi | de̱vebhyo̍ deva dā̱śuṣe̍ || 1.074.09 ||

Languages