हिर॑ण्यकेशो॒ रज॑सो विसा॒रेऽहि॒र्धुनि॒र्वात॑ इव॒ ध्रजी॑मान् । शुचि॑भ्राजा उ॒षसो॒ नवे॑दा॒ यश॑स्वतीरप॒स्युवो॒ न स॒त्याः ॥ १.७९.०१ ॥
hira̍ṇyakeśo̱ raja̍so visā̱re'hi̱rdhuni̱rvāta̍ iva̱ dhrajī̍mān | śuci̍bhrājā u̱ṣaso̱ nave̍dā̱ yaśa̍svatīrapa̱syuvo̱ na sa̱tyāḥ || 1.079.01 ||
आ ते॑ सुप॒र्णा अ॑मिनन्त॒ँ एवैः॑ कृ॒ष्णो नो॑नाव वृष॒भो यदी॒दम् । शि॒वाभि॒र्न स्मय॑मानाभि॒रागा॒त्पत॑न्ति॒ मिहः॑ स्त॒नय॑न्त्य॒भ्रा ॥ १.७९.०२ ॥
ā te̍ supa̱rṇā a̍minanta̱ evai̍ḥ kṛ̱ṣṇo no̍nāva vṛṣa̱bho yadī̱dam | śi̱vābhi̱rna smaya̍mānābhi̱rāgā̱tpata̍nti̱ miha̍ḥ sta̱naya̍ntya̱bhrā || 1.079.02 ||
यदी॑मृ॒तस्य॒ पय॑सा॒ पिया॑नो॒ नय॑न्नृ॒तस्य॑ प॒थिभी॒ रजि॑ष्ठैः । अ॒र्य॒मा मि॒त्रो वरु॑णः॒ परि॑ज्मा॒ त्वचं॑ पृञ्च॒न्त्युप॑रस्य॒ योनौ॑ ॥ १.७९.०३ ॥
yadī̍mṛ̱tasya̱ paya̍sā̱ piyā̍no̱ naya̍nnṛ̱tasya̍ pa̱thibhī̱ raji̍ṣṭhaiḥ | a̱rya̱mā mi̱tro varu̍ṇa̱ḥ pari̍jmā̱ tvaca̍ṁ pṛñca̱ntyupa̍rasya̱ yonau̍ || 1.079.03 ||
अग्ने॒ वाज॑स्य॒ गोम॑त॒ ईशा॑नः सहसो यहो । अ॒स्मे धे॑हि जातवेदो॒ महि॒ श्रवः॑ ॥ १.७९.०४ ॥
agne̱ vāja̍sya̱ goma̍ta̱ īśā̍naḥ sahaso yaho | a̱sme dhe̍hi jātavedo̱ mahi̱ śrava̍ḥ || 1.079.04 ||
स इ॑धा॒नो वसु॑ष्क॒विर॒ग्निरी॒ळेन्यो॑ गि॒रा । रे॒वद॒स्मभ्यं॑ पुर्वणीक दीदिहि ॥ १.७९.०५ ॥
sa i̍dhā̱no vasu̍ṣka̱vira̱gnirī̱ḻenyo̍ gi̱rā | re̱vada̱smabhya̍ṁ purvaṇīka dīdihi || 1.079.05 ||
क्ष॒पो रा॑जन्नु॒त त्मनाग्ने॒ वस्तो॑रु॒तोषसः॑ । स ति॑ग्मजम्भ र॒क्षसो॑ दह॒ प्रति॑ ॥ १.७९.०६ ॥
kṣa̱po rā̍jannu̱ta tmanāgne̱ vasto̍ru̱toṣasa̍ḥ | sa ti̍gmajambha ra̱kṣaso̍ daha̱ prati̍ || 1.079.06 ||
अवा॑ नो अग्न ऊ॒तिभि॑र्गाय॒त्रस्य॒ प्रभ॑र्मणि । विश्वा॑सु धी॒षु व॑न्द्य ॥ १.७९.०७ ॥
avā̍ no agna ū̱tibhi̍rgāya̱trasya̱ prabha̍rmaṇi | viśvā̍su dhī̱ṣu va̍ndya || 1.079.07 ||
आ नो॑ अग्ने र॒यिं भ॑र सत्रा॒साहं॒ वरे॑ण्यम् । विश्वा॑सु पृ॒त्सु दु॒ष्टर॑म् ॥ १.७९.०८ ॥
ā no̍ agne ra̱yiṁ bha̍ra satrā̱sāha̱ṁ vare̍ṇyam | viśvā̍su pṛ̱tsu du̱ṣṭara̍m || 1.079.08 ||
आ नो॑ अग्ने सुचे॒तुना॑ र॒यिं वि॒श्वायु॑पोषसम् । मा॒र्डी॒कं धे॑हि जी॒वसे॑ ॥ १.७९.०९ ॥
ā no̍ agne suce̱tunā̍ ra̱yiṁ vi̱śvāyu̍poṣasam | mā̱rḍī̱kaṁ dhe̍hi jī̱vase̍ || 1.079.09 ||
प्र पू॒तास्ति॒ग्मशो॑चिषे॒ वाचो॑ गोतमा॒ग्नये॑ । भर॑स्व सुम्न॒युर्गिरः॑ ॥ १.७९.१० ॥
pra pū̱tāsti̱gmaśo̍ciṣe̱ vāco̍ gotamā̱gnaye̍ | bhara̍sva sumna̱yurgira̍ḥ || 1.079.10 ||
यो नो॑ अग्नेऽभि॒दास॒त्यन्ति॑ दू॒रे प॑दी॒ष्ट सः । अ॒स्माक॒मिद्वृ॒धे भ॑व ॥ १.७९.११ ॥
yo no̍ agne'bhi̱dāsa̱tyanti̍ dū̱re pa̍dī̱ṣṭa saḥ | a̱smāka̱midvṛ̱dhe bha̍va || 1.079.11 ||
स॒ह॒स्रा॒क्षो विच॑र्षणिर॒ग्नी रक्षां॑सि सेधति । होता॑ गृणीत उ॒क्थ्यः॑ ॥ १.७९.१२ ॥
sa̱ha̱srā̱kṣo vica̍rṣaṇira̱gnī rakṣā̍ṁsi sedhati | hotā̍ gṛṇīta u̱kthya̍ḥ || 1.079.12 ||
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
