Gyaandweep | Rig Veda Mandala , 1

एन्द्र॑ सान॒सिं र॒यिं स॒जित्वा॑नं सदा॒सह॑म् । वर्षि॑ष्ठमू॒तये॑ भर ॥ १.८.०१ ॥

endra̍ sāna̱siṁ ra̱yiṁ sa̱jitvā̍naṁ sadā̱saha̍m | varṣi̍ṣṭhamū̱taye̍ bhara || 1.008.01 ||

नि येन॑ मुष्टिह॒त्यया॒ नि वृ॒त्रा रु॒णधा॑महै । त्वोता॑सो॒ न्यर्व॑ता ॥ १.८.०२ ॥

ni yena̍ muṣṭiha̱tyayā̱ ni vṛ̱trā ru̱ṇadhā̍mahai | tvotā̍so̱ nyarva̍tā || 1.008.02 ||

इन्द्र॒ त्वोता॑स॒ आ व॒यं वज्रं॑ घ॒ना द॑दीमहि । जये॑म॒ सं यु॒धि स्पृधः॑ ॥ १.८.०३ ॥

indra̱ tvotā̍sa̱ ā va̱yaṁ vajra̍ṁ gha̱nā da̍dīmahi | jaye̍ma̱ saṁ yu̱dhi spṛdha̍ḥ || 1.008.03 ||

व॒यं शूरे॑भि॒रस्तृ॑भि॒रिन्द्र॒ त्वया॑ यु॒जा व॒यम् । सा॒स॒ह्याम॑ पृतन्य॒तः ॥ १.८.०४ ॥

va̱yaṁ śūre̍bhi̱rastṛ̍bhi̱rindra̱ tvayā̍ yu̱jā va̱yam | sā̱sa̱hyāma̍ pṛtanya̱taḥ || 1.008.04 ||

म॒हाँ इन्द्रः॑ प॒रश्च॒ नु म॑हि॒त्वम॑स्तु व॒ज्रिणे॑ । द्यौर्न प्र॑थि॒ना शवः॑ ॥ १.८.०५ ॥

ma̱hā indra̍ḥ pa̱raśca̱ nu ma̍hi̱tvama̍stu va̱jriṇe̍ | dyaurna pra̍thi̱nā śava̍ḥ || 1.008.05 ||

स॒मो॒हे वा॒ य आश॑त॒ नर॑स्तो॒कस्य॒ सनि॑तौ । विप्रा॑सो वा धिया॒यवः॑ ॥ १.८.०६ ॥

sa̱mo̱he vā̱ ya āśa̍ta̱ nara̍sto̱kasya̱ sani̍tau | viprā̍so vā dhiyā̱yava̍ḥ || 1.008.06 ||

यः कु॒क्षिः सो॑म॒पात॑मः समु॒द्र इ॑व॒ पिन्व॑ते । उ॒र्वीरापो॒ न का॒कुदः॑ ॥ १.८.०७ ॥

yaḥ ku̱kṣiḥ so̍ma̱pāta̍maḥ samu̱dra i̍va̱ pinva̍te | u̱rvīrāpo̱ na kā̱kuda̍ḥ || 1.008.07 ||

ए॒वा ह्य॑स्य सू॒नृता॑ विर॒प्शी गोम॑ती म॒ही । प॒क्वा शाखा॒ न दा॒शुषे॑ ॥ १.८.०८ ॥

e̱vā hya̍sya sū̱nṛtā̍ vira̱pśī goma̍tī ma̱hī | pa̱kvā śākhā̱ na dā̱śuṣe̍ || 1.008.08 ||

ए॒वा हि ते॒ विभू॑तय ऊ॒तय॑ इन्द्र॒ माव॑ते । स॒द्यश्चि॒त्सन्ति॑ दा॒शुषे॑ ॥ १.८.०९ ॥

e̱vā hi te̱ vibhū̍taya ū̱taya̍ indra̱ māva̍te | sa̱dyaści̱tsanti̍ dā̱śuṣe̍ || 1.008.09 ||

ए॒वा ह्य॑स्य॒ काम्या॒ स्तोम॑ उ॒क्थं च॒ शंस्या॑ । इन्द्रा॑य॒ सोम॑पीतये ॥ १.८.१० ॥

e̱vā hya̍sya̱ kāmyā̱ stoma̍ u̱kthaṁ ca̱ śaṁsyā̍ | indrā̍ya̱ soma̍pītaye || 1.008.10 ||

Languages