असा॑वि॒ सोम॑ इन्द्र ते॒ शवि॑ष्ठ धृष्ण॒वा ग॑हि । आ त्वा॑ पृणक्त्विन्द्रि॒यं रजः॒ सूर्यो॒ न र॒श्मिभिः॑ ॥ १.८४.०१ ॥
asā̍vi̱ soma̍ indra te̱ śavi̍ṣṭha dhṛṣṇa̱vā ga̍hi | ā tvā̍ pṛṇaktvindri̱yaṁ raja̱ḥ sūryo̱ na ra̱śmibhi̍ḥ || 1.084.01 ||
इन्द्र॒मिद्धरी॑ वह॒तोऽप्र॑तिधृष्टशवसम् । ऋषी॑णां च स्तु॒तीरुप॑ य॒ज्ञं च॒ मानु॑षाणाम् ॥ १.८४.०२ ॥
indra̱middharī̍ vaha̱to'pra̍tidhṛṣṭaśavasam | ṛṣī̍ṇāṁ ca stu̱tīrupa̍ ya̱jñaṁ ca̱ mānu̍ṣāṇām || 1.084.02 ||
आ ति॑ष्ठ वृत्रह॒न्रथं॑ यु॒क्ता ते॒ ब्रह्म॑णा॒ हरी॑ । अ॒र्वा॒चीनं॒ सु ते॒ मनो॒ ग्रावा॑ कृणोतु व॒ग्नुना॑ ॥ १.८४.०३ ॥
ā ti̍ṣṭha vṛtraha̱nratha̍ṁ yu̱ktā te̱ brahma̍ṇā̱ harī̍ | a̱rvā̱cīna̱ṁ su te̱ mano̱ grāvā̍ kṛṇotu va̱gnunā̍ || 1.084.03 ||
इ॒ममि॑न्द्र सु॒तं पि॑ब॒ ज्येष्ठ॒मम॑र्त्यं॒ मद॑म् । शु॒क्रस्य॑ त्वा॒भ्य॑क्षर॒न्धारा॑ ऋ॒तस्य॒ साद॑ने ॥ १.८४.०४ ॥
i̱mami̍ndra su̱taṁ pi̍ba̱ jyeṣṭha̱mama̍rtya̱ṁ mada̍m | śu̱krasya̍ tvā̱bhya̍kṣara̱ndhārā̍ ṛ̱tasya̱ sāda̍ne || 1.084.04 ||
इन्द्रा॑य नू॒नम॑र्चतो॒क्थानि॑ च ब्रवीतन । सु॒ता अ॑मत्सु॒रिन्द॑वो॒ ज्येष्ठं॑ नमस्यता॒ सहः॑ ॥ १.८४.०५ ॥
indrā̍ya nū̱nama̍rcato̱kthāni̍ ca bravītana | su̱tā a̍matsu̱rinda̍vo̱ jyeṣṭha̍ṁ namasyatā̱ saha̍ḥ || 1.084.05 ||
नकि॒ष्ट्वद्र॒थीत॑रो॒ हरी॒ यदि॑न्द्र॒ यच्छ॑से । नकि॒ष्ट्वानु॑ म॒ज्मना॒ नकिः॒ स्वश्व॑ आनशे ॥ १.८४.०६ ॥
naki̱ṣṭvadra̱thīta̍ro̱ harī̱ yadi̍ndra̱ yaccha̍se | naki̱ṣṭvānu̍ ma̱jmanā̱ naki̱ḥ svaśva̍ ānaśe || 1.084.06 ||
य एक॒ इद्वि॒दय॑ते॒ वसु॒ मर्ता॑य दा॒शुषे॑ । ईशा॑नो॒ अप्र॑तिष्कुत॒ इन्द्रो॑ अ॒ङ्ग ॥ १.८४.०७ ॥
ya eka̱ idvi̱daya̍te̱ vasu̱ martā̍ya dā̱śuṣe̍ | īśā̍no̱ apra̍tiṣkuta̱ indro̍ a̱ṅga || 1.084.07 ||
क॒दा मर्त॑मरा॒धसं॑ प॒दा क्षुम्प॑मिव स्फुरत् । क॒दा नः॑ शुश्रव॒द्गिर॒ इन्द्रो॑ अ॒ङ्ग ॥ १.८४.०८ ॥
ka̱dā marta̍marā̱dhasa̍ṁ pa̱dā kṣumpa̍miva sphurat | ka̱dā na̍ḥ śuśrava̱dgira̱ indro̍ a̱ṅga || 1.084.08 ||
यश्चि॒द्धि त्वा॑ ब॒हुभ्य॒ आ सु॒तावा॑ँ आ॒विवा॑सति । उ॒ग्रं तत्प॑त्यते॒ शव॒ इन्द्रो॑ अ॒ङ्ग ॥ १.८४.०९ ॥
yaści̱ddhi tvā̍ ba̱hubhya̱ ā su̱tāvā̍ ā̱vivā̍sati | u̱graṁ tatpa̍tyate̱ śava̱ indro̍ a̱ṅga || 1.084.09 ||
स्वा॒दोरि॒त्था वि॑षू॒वतो॒ मध्वः॑ पिबन्ति गौ॒र्यः॑ । या इन्द्रे॑ण स॒याव॑री॒र्वृष्णा॒ मद॑न्ति शो॒भसे॒ वस्वी॒रनु॑ स्व॒राज्य॑म् ॥ १.८४.१० ॥
svā̱dori̱tthā vi̍ṣū̱vato̱ madhva̍ḥ pibanti gau̱rya̍ḥ | yā indre̍ṇa sa̱yāva̍rī̱rvṛṣṇā̱ mada̍nti śo̱bhase̱ vasvī̱ranu̍ sva̱rājya̍m || 1.084.10 ||
ता अ॑स्य पृशना॒युवः॒ सोमं॑ श्रीणन्ति॒ पृश्न॑यः । प्रि॒या इन्द्र॑स्य धे॒नवो॒ वज्रं॑ हिन्वन्ति॒ साय॑कं॒ वस्वी॒रनु॑ स्व॒राज्य॑म् ॥ १.८४.११ ॥
tā a̍sya pṛśanā̱yuva̱ḥ soma̍ṁ śrīṇanti̱ pṛśna̍yaḥ | pri̱yā indra̍sya dhe̱navo̱ vajra̍ṁ hinvanti̱ sāya̍ka̱ṁ vasvī̱ranu̍ sva̱rājya̍m || 1.084.11 ||
ता अ॑स्य॒ नम॑सा॒ सहः॑ सप॒र्यन्ति॒ प्रचे॑तसः । व्र॒तान्य॑स्य सश्चिरे पु॒रूणि॑ पू॒र्वचि॑त्तये॒ वस्वी॒रनु॑ स्व॒राज्य॑म् ॥ १.८४.१२ ॥
tā a̍sya̱ nama̍sā̱ saha̍ḥ sapa̱ryanti̱ prace̍tasaḥ | vra̱tānya̍sya saścire pu̱rūṇi̍ pū̱rvaci̍ttaye̱ vasvī̱ranu̍ sva̱rājya̍m || 1.084.12 ||
इन्द्रो॑ दधी॒चो अ॒स्थभि॑र्वृ॒त्राण्यप्र॑तिष्कुतः । ज॒घान॑ नव॒तीर्नव॑ ॥ १.०८४.१३ ॥
indro̍ dadhī̱co a̱sthabhi̍rvṛ̱trāṇyapra̍tiṣkutaḥ | ja̱ghāna̍ nava̱tīrnava̍ || 1.084.13 ||
इ॒च्छन्नश्व॑स्य॒ यच्छिरः॒ पर्व॑ते॒ष्वप॑श्रितम् । तद्वि॑दच्छर्य॒णाव॑ति ॥ १.८४.१४ ॥
i̱cchannaśva̍sya̱ yacchira̱ḥ parva̍te̱ṣvapa̍śritam | tadvi̍daccharya̱ṇāva̍ti || 1.084.14 ||
अत्राह॒ गोर॑मन्वत॒ नाम॒ त्वष्टु॑रपी॒च्य॑म् । इ॒त्था च॒न्द्रम॑सो गृ॒हे ॥ १.८४.१५ ॥
atrāha̱ gora̍manvata̱ nāma̱ tvaṣṭu̍rapī̱cya̍m | i̱tthā ca̱ndrama̍so gṛ̱he || 1.084.15 ||
को अ॒द्य यु॑ङ्क्ते धु॒रि गा ऋ॒तस्य॒ शिमी॑वतो भा॒मिनो॑ दुर्हृणा॒यून् । आ॒सन्नि॑षून्हृ॒त्स्वसो॑ मयो॒भून्य ए॑षां भृ॒त्यामृ॒णध॒त्स जी॑वात् ॥ १.८४.१६ ॥
ko a̱dya yu̍ṅkte dhu̱ri gā ṛ̱tasya̱ śimī̍vato bhā̱mino̍ durhṛṇā̱yūn | ā̱sanni̍ṣūnhṛ̱tsvaso̍ mayo̱bhūnya e̍ṣāṁ bhṛ̱tyāmṛ̱ṇadha̱tsa jī̍vāt || 1.084.16 ||
क ई॑षते तु॒ज्यते॒ को बि॑भाय॒ को मं॑सते॒ सन्त॒मिन्द्रं॒ को अन्ति॑ । कस्तो॒काय॒ क इभा॑यो॒त रा॒येऽधि॑ ब्रवत्त॒न्वे॒॑ को जना॑य ॥ १.८४.१७ ॥
ka ī̍ṣate tu̱jyate̱ ko bi̍bhāya̱ ko ma̍ṁsate̱ santa̱mindra̱ṁ ko anti̍ | kasto̱kāya̱ ka ibhā̍yo̱ta rā̱ye'dhi̍ bravatta̱nve̱3̱̍ ko janā̍ya || 1.084.17 ||
को अ॒ग्निमी॑ट्टे ह॒विषा॑ घृ॒तेन॑ स्रु॒चा य॑जाता ऋ॒तुभि॑र्ध्रु॒वेभिः॑ । कस्मै॑ दे॒वा आ व॑हाना॒शु होम॒ को मं॑सते वी॒तिहो॑त्रः सुदे॒वः ॥ १.८४.१८ ॥
ko a̱gnimī̍ṭṭe ha̱viṣā̍ ghṛ̱tena̍ sru̱cā ya̍jātā ṛ̱tubhi̍rdhru̱vebhi̍ḥ | kasmai̍ de̱vā ā va̍hānā̱śu homa̱ ko ma̍ṁsate vī̱tiho̍traḥ sude̱vaḥ || 1.084.18 ||
त्वम॒ङ्ग प्र शं॑सिषो दे॒वः श॑विष्ठ॒ मर्त्य॑म् । न त्वद॒न्यो म॑घवन्नस्ति मर्डि॒तेन्द्र॒ ब्रवी॑मि ते॒ वचः॑ ॥ १.८४.१९ ॥
tvama̱ṅga pra śa̍ṁsiṣo de̱vaḥ śa̍viṣṭha̱ martya̍m | na tvada̱nyo ma̍ghavannasti marḍi̱tendra̱ bravī̍mi te̱ vaca̍ḥ || 1.084.19 ||
मा ते॒ राधां॑सि॒ मा त॑ ऊ॒तयो॑ वसो॒ऽस्मान्कदा॑ च॒ना द॑भन् । विश्वा॑ च न उपमिमी॒हि मा॑नुष॒ वसू॑नि चर्ष॒णिभ्य॒ आ ॥ १.८४.२० ॥
mā te̱ rādhā̍ṁsi̱ mā ta̍ ū̱tayo̍ vaso̱'smānkadā̍ ca̱nā da̍bhan | viśvā̍ ca na upamimī̱hi mā̍nuṣa̱ vasū̍ni carṣa̱ṇibhya̱ ā || 1.084.20 ||
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
