Gyaandweep | Rig Veda Mandala , 1

इन्द्रेहि॒ मत्स्यन्ध॑सो॒ विश्वे॑भिः सोम॒पर्व॑भिः । म॒हाँ अ॑भि॒ष्टिरोज॑सा ॥ १.९.०१ ॥

indrehi̱ matsyandha̍so̱ viśve̍bhiḥ soma̱parva̍bhiḥ | ma̱hā a̍bhi̱ṣṭiroja̍sā || 1.009.01 ||

एमे॑नं सृजता सु॒ते म॒न्दिमिन्द्रा॑य म॒न्दिने॑ । चक्रिं॒ विश्वा॑नि॒ चक्र॑ये ॥ १.९.०२ ॥

eme̍naṁ sṛjatā su̱te ma̱ndimindrā̍ya ma̱ndine̍ | cakri̱ṁ viśvā̍ni̱ cakra̍ye || 1.009.02 ||

मत्स्वा॑ सुशिप्र म॒न्दिभिः॒ स्तोमे॑भिर्विश्वचर्षणे । सचै॒षु सव॑ने॒ष्वा ॥ १.९.०३ ॥

matsvā̍ suśipra ma̱ndibhi̱ḥ stome̍bhirviśvacarṣaṇe | sacai̱ṣu sava̍ne̱ṣvā || 1.009.03 ||

असृ॑ग्रमिन्द्र ते॒ गिरः॒ प्रति॒ त्वामुद॑हासत । अजो॑षा वृष॒भं पति॑म् ॥ १.९.०४ ॥

asṛ̍gramindra te̱ gira̱ḥ prati̱ tvāmuda̍hāsata | ajo̍ṣā vṛṣa̱bhaṁ pati̍m || 1.009.04 ||

सं चो॑दय चि॒त्रम॒र्वाग्राध॑ इन्द्र॒ वरे॑ण्यम् । अस॒दित्ते॑ वि॒भु प्र॒भु ॥ १.९.०५ ॥

saṁ co̍daya ci̱trama̱rvāgrādha̍ indra̱ vare̍ṇyam | asa̱ditte̍ vi̱bhu pra̱bhu || 1.009.05 ||

अ॒स्मान्सु तत्र॑ चोद॒येन्द्र॑ रा॒ये रभ॑स्वतः । तुवि॑द्युम्न॒ यश॑स्वतः ॥ १.९.०६ ॥

a̱smānsu tatra̍ coda̱yendra̍ rā̱ye rabha̍svataḥ | tuvi̍dyumna̱ yaśa̍svataḥ || 1.009.06 ||

सं गोम॑दिन्द्र॒ वाज॑वद॒स्मे पृ॒थु श्रवो॑ बृ॒हत् । वि॒श्वायु॑र्धे॒ह्यक्षि॑तम् ॥ १.९.०७ ॥

saṁ goma̍dindra̱ vāja̍vada̱sme pṛ̱thu śravo̍ bṛ̱hat | vi̱śvāyu̍rdhe̱hyakṣi̍tam || 1.009.07 ||

अ॒स्मे धे॑हि॒ श्रवो॑ बृ॒हद्द्यु॒म्नं स॑हस्र॒सात॑मम् । इन्द्र॒ ता र॒थिनी॒रिषः॑ ॥ १.९.०८ ॥

a̱sme dhe̍hi̱ śravo̍ bṛ̱haddyu̱mnaṁ sa̍hasra̱sāta̍mam | indra̱ tā ra̱thinī̱riṣa̍ḥ || 1.009.08 ||

वसो॒रिन्द्रं॒ वसु॑पतिं गी॒र्भिर्गृ॒णन्त॑ ऋ॒ग्मिय॑म् । होम॒ गन्ता॑रमू॒तये॑ ॥ १.९.०९ ॥

vaso̱rindra̱ṁ vasu̍patiṁ gī̱rbhirgṛ̱ṇanta̍ ṛ̱gmiya̍m | homa̱ gantā̍ramū̱taye̍ || 1.009.09 ||

सु॒तेसु॑ते॒ न्यो॑कसे बृ॒हद्बृ॑ह॒त एद॒रिः । इन्द्रा॑य शू॒षम॑र्चति ॥ १.९.१० ॥

su̱tesu̍te̱ nyo̍kase bṛ̱hadbṛ̍ha̱ta eda̱riḥ | indrā̍ya śū̱ṣama̍rcati || 1.009.10 ||

Languages