Gyaandweep | Rig Veda Mandala , 1

ऋ॒जु॒नी॒ती नो॒ वरु॑णो मि॒त्रो न॑यतु वि॒द्वान् । अ॒र्य॒मा दे॒वैः स॒जोषाः॑ ॥ १.९०.०१ ॥

ṛ̱ju̱nī̱tī no̱ varu̍ṇo mi̱tro na̍yatu vi̱dvān | a̱rya̱mā de̱vaiḥ sa̱joṣā̍ḥ || 1.090.01 ||

ते हि वस्वो॒ वस॑वाना॒स्ते अप्र॑मूरा॒ महो॑भिः । व्र॒ता र॑क्षन्ते वि॒श्वाहा॑ ॥ १.९०.०२ ॥

te hi vasvo̱ vasa̍vānā̱ste apra̍mūrā̱ maho̍bhiḥ | vra̱tā ra̍kṣante vi̱śvāhā̍ || 1.090.02 ||

ते अ॒स्मभ्यं॒ शर्म॑ यंसन्न॒मृता॒ मर्त्ये॑भ्यः । बाध॑माना॒ अप॒ द्विषः॑ ॥ १.९०.०३ ॥

te a̱smabhya̱ṁ śarma̍ yaṁsanna̱mṛtā̱ martye̍bhyaḥ | bādha̍mānā̱ apa̱ dviṣa̍ḥ || 1.090.03 ||

वि नः॑ प॒थः सु॑वि॒ताय॑ चि॒यन्त्विन्द्रो॑ म॒रुतः॑ । पू॒षा भगो॒ वन्द्या॑सः ॥ १.९०.०४ ॥

vi na̍ḥ pa̱thaḥ su̍vi̱tāya̍ ci̱yantvindro̍ ma̱ruta̍ḥ | pū̱ṣā bhago̱ vandyā̍saḥ || 1.090.04 ||

उ॒त नो॒ धियो॒ गोअ॑ग्राः॒ पूष॒न्विष्ण॒वेव॑यावः । कर्ता॑ नः स्वस्ति॒मतः॑ ॥ १.९०.०५ ॥

u̱ta no̱ dhiyo̱ goa̍grā̱ḥ pūṣa̱nviṣṇa̱veva̍yāvaḥ | kartā̍ naḥ svasti̱mata̍ḥ || 1.090.05 ||

मधु॒ वाता॑ ऋताय॒ते मधु॑ क्षरन्ति॒ सिन्ध॑वः । माध्वी॑र्नः स॒न्त्वोष॑धीः ॥ १.९०.०६ ॥

madhu̱ vātā̍ ṛtāya̱te madhu̍ kṣaranti̱ sindha̍vaḥ | mādhvī̍rnaḥ sa̱ntvoṣa̍dhīḥ || 1.090.06 ||

मधु॒ नक्त॑मु॒तोषसो॒ मधु॑म॒त्पार्थि॑वं॒ रजः॑ । मधु॒ द्यौर॑स्तु नः पि॒ता ॥ १.९०.०७ ॥

madhu̱ nakta̍mu̱toṣaso̱ madhu̍ma̱tpārthi̍va̱ṁ raja̍ḥ | madhu̱ dyaura̍stu naḥ pi̱tā || 1.090.07 ||

मधु॑मान्नो॒ वन॒स्पति॒र्मधु॑माँ अस्तु॒ सूर्यः॑ । माध्वी॒र्गावो॑ भवन्तु नः ॥ १.९०.०८ ॥

madhu̍mānno̱ vana̱spati̱rmadhu̍mā astu̱ sūrya̍ḥ | mādhvī̱rgāvo̍ bhavantu naḥ || 1.090.08 ||

शं नो॑ मि॒त्रः शं वरु॑णः॒ शं नो॑ भवत्वर्य॒मा । शं न॒ इन्द्रो॒ बृह॒स्पतिः॒ शं नो॒ विष्णु॑रुरुक्र॒मः ॥ १.९०.०९ ॥

śaṁ no̍ mi̱traḥ śaṁ varu̍ṇa̱ḥ śaṁ no̍ bhavatvarya̱mā | śaṁ na̱ indro̱ bṛha̱spati̱ḥ śaṁ no̱ viṣṇu̍rurukra̱maḥ || 1.090.09 ||

Languages