Gyaandweep | Rig Veda Mandala , 10

अग्ने॒ हंसि॒ न्य१॒॑त्रिणं॒ दीद्य॒न्मर्त्ये॒ष्वा । स्वे क्षये॑ शुचिव्रत ॥ १०.११८.०१ ॥

agne haṃsi nya1triṇaṃ dīdyanmartyeṣvā | sve kṣaye śucivrata || 10.118.01 ||

उत्ति॑ष्ठसि॒ स्वा॑हुतो घृ॒तानि॒ प्रति॑ मोदसे । यत्त्वा॒ स्रुचः॑ स॒मस्थि॑रन् ॥ १०.११८.०२ ॥

uttiṣṭhasi svāhuto ghṛtāni prati modase | yattvā srucaḥ samasthiran || 10.118.02 ||

स आहु॑तो॒ वि रो॑चते॒ऽग्निरी॒ळेन्यो॑ गि॒रा । स्रु॒चा प्रती॑कमज्यते ॥ १०.११८.०३ ॥

sa āhuto vi rocate'gnirīळ्enyo girā | srucā pratīkamajyate || 10.118.03 ||

घृ॒तेना॒ग्निः सम॑ज्यते॒ मधु॑प्रतीक॒ आहु॑तः । रोच॑मानो वि॒भाव॑सुः ॥ १०.११८.०४ ॥

ghṛtenāgniḥ samajyate madhupratīka āhutaḥ | rocamāno vibhāvasuḥ || 10.118.04 ||

जर॑माणः॒ समि॑ध्यसे दे॒वेभ्यो॑ हव्यवाहन । तं त्वा॑ हवन्त॒ मर्त्याः॑ ॥ १०.११८.०५ ॥

jaramāṇaḥ samidhyase devebhyo havyavāhana | taṃ tvā havanta martyāḥ || 10.118.05 ||

तं म॑र्ता॒ अम॑र्त्यं घृ॒तेना॒ग्निं स॑पर्यत । अदा॑भ्यं गृ॒हप॑तिम् ॥ १०.११८.०६ ॥

taṃ martā amartyaṃ ghṛtenāgniṃ saparyata | adābhyaṃ gṛhapatim || 10.118.06 ||

अदा॑भ्येन शो॒चिषाग्ने॒ रक्ष॒स्त्वं द॑ह । गो॒पा ऋ॒तस्य॑ दीदिहि ॥ १०.११८.०७ ॥

adābhyena śociṣāgne rakṣastvaṃ daha | gopā ṛtasya dīdihi || 10.118.07 ||

स त्वम॑ग्ने॒ प्रती॑केन॒ प्रत्यो॑ष यातुधा॒न्यः॑ । उ॒रु॒क्षये॑षु॒ दीद्य॑त् ॥ १०.११८.०८ ॥

sa tvamagne pratīkena pratyoṣa yātudhānyaḥ | urukṣayeṣu dīdyat || 10.118.08 ||

तं त्वा॑ गी॒र्भिरु॑रु॒क्षया॑ हव्य॒वाहं॒ समी॑धिरे । यजि॑ष्ठं॒ मानु॑षे॒ जने॑ ॥ १०.११८.०९ ॥

taṃ tvā gīrbhirurukṣayā havyavāhaṃ samīdhire | yajiṣṭhaṃ mānuṣe jane || 10.118.09 ||

Languages