Gyaandweep | Rig Veda Mandala , 10

आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से ॥ १०.००९.०१ ॥

āpo hi ṣṭhā mayobhuvastā na ūrje dadhātana | mahe raṇāya cakṣase || 10.009.01 ||

यो वः॑ शि॒वत॑मो॒ रस॒स्तस्य॑ भाजयते॒ह नः॑ । उ॒श॒तीरि॑व मा॒तरः॑ ॥ १०.००९.०२ ॥

yo vaḥ śivatamo rasastasya bhājayateha naḥ | uśatīriva mātaraḥ || 10.009.02 ||

तस्मा॒ अरं॑ गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः ॥ १०.००९.०३ ॥

tasmā araṃ gamāma vo yasya kṣayāya jinvatha | āpo janayathā ca naḥ || 10.009.03 ||

शं नो॑ दे॒वीर॒भिष्ट॑य॒ आपो॑ भवन्तु पी॒तये॑ । शं योर॒भि स्र॑वन्तु नः ॥ १०.००९.०४ ॥

śaṃ no devīrabhiṣṭaya āpo bhavantu pītaye | śaṃ yorabhi sravantu naḥ || 10.009.04 ||

ईशा॑ना॒ वार्या॑णां॒ क्षय॑न्तीश्चर्षणी॒नाम् । अ॒पो या॑चामि भेष॒जम् ॥ १०.००९.०५ ॥

īśānā vāryāṇāṃ kṣayantīścarṣaṇīnām | apo yācāmi bheṣajam || 10.009.05 ||

अ॒प्सु मे॒ सोमो॑ अब्रवीद॒न्तर्विश्वा॑नि भेष॒जा । अ॒ग्निं च॑ वि॒श्वश॑म्भुवम् ॥ १०.००९.०६ ॥

apsu me somo abravīdantarviśvāni bheṣajā | agniṃ ca viśvaśambhuvam || 10.009.06 ||

आपः॑ पृणी॒त भे॑ष॒जं वरू॑थं त॒न्वे॒३॒॑ मम॑ । ज्योक्च॒ सूर्यं॑ दृ॒शे ॥ १०.००९.०७ ॥

āpaḥ pṛṇīta bheṣajaṃ varūthaṃ tanve3 mama | jyokca sūryaṃ dṛśe || 10.009.07 ||

इ॒दमा॑पः॒ प्र व॑हत॒ यत्किं च॑ दुरि॒तं मयि॑ । यद्वा॒हम॑भिदु॒द्रोह॒ यद्वा॑ शे॒प उ॒तानृ॑तम् ॥ १०.००९.०८ ॥

idamāpaḥ pra vahata yatkiṃ ca duritaṃ mayi | yadvāhamabhidudroha yadvā śepa utānṛtam || 10.009.08 ||

आपो॑ अ॒द्यान्व॑चारिषं॒ रसे॑न॒ सम॑गस्महि । पय॑स्वानग्न॒ आ ग॑हि॒ तं मा॒ सं सृ॑ज॒ वर्च॑सा ॥ १०.००९.०९ ॥

āpo adyānvacāriṣaṃ rasena samagasmahi | payasvānagna ā gahi taṃ mā saṃ sṛja varcasā || 10.009.09 ||

Languages