इ॒दं क॒वेरा॑दि॒त्यस्य॑ स्व॒राजो॒ विश्वा॑नि॒ सान्त्य॒भ्य॑स्तु म॒ह्ना । अति॒ यो म॒न्द्रो य॒जथा॑य दे॒वः सु॑की॒र्तिं भि॑क्षे॒ वरु॑णस्य॒ भूरेः॑ ॥ २.०२८.०१ ॥
i̱daṁ ka̱verā̍di̱tyasya̍ sva̱rājo̱ viśvā̍ni̱ sāntya̱bhya̍stu ma̱hnā | ati̱ yo ma̱ndro ya̱jathā̍ya de̱vaḥ su̍kī̱rtiṁ bhi̍kṣe̱ varu̍ṇasya̱ bhūre̍ḥ || 2.028.01 ||
तव॑ व्र॒ते सु॒भगा॑सः स्याम स्वा॒ध्यो॑ वरुण तुष्टु॒वांसः॑ । उ॒पाय॑न उ॒षसां॒ गोम॑तीनाम॒ग्नयो॒ न जर॑माणा॒ अनु॒ द्यून् ॥ २.०२८.०२ ॥
tava̍ vra̱te su̱bhagā̍saḥ syāma svā̱dhyo̍ varuṇa tuṣṭu̱vāṁsa̍ḥ | u̱pāya̍na u̱ṣasā̱ṁ goma̍tīnāma̱gnayo̱ na jara̍māṇā̱ anu̱ dyūn || 2.028.02 ||
तव॑ स्याम पुरु॒वीर॑स्य॒ शर्म॑न्नुरु॒शंस॑स्य वरुण प्रणेतः । यू॒यं नः॑ पुत्रा अदितेरदब्धा अ॒भि क्ष॑मध्वं॒ युज्या॑य देवाः ॥ २.०२८.०३ ॥
tava̍ syāma puru̱vīra̍sya̱ śarma̍nnuru̱śaṁsa̍sya varuṇa praṇetaḥ | yū̱yaṁ na̍ḥ putrā aditeradabdhā a̱bhi kṣa̍madhva̱ṁ yujyā̍ya devāḥ || 2.028.03 ||
प्र सी॑मादि॒त्यो अ॑सृजद्विध॒र्ताँ ऋ॒तं सिन्ध॑वो॒ वरु॑णस्य यन्ति । न श्रा॑म्यन्ति॒ न वि मु॑चन्त्ये॒ते वयो॒ न प॑प्तू रघु॒या परि॑ज्मन् ॥ २.०२८.०४ ॥
pra sī̍mādi̱tyo a̍sṛjadvidha̱rtā ṛ̱taṁ sindha̍vo̱ varu̍ṇasya yanti | na śrā̍myanti̱ na vi mu̍cantye̱te vayo̱ na pa̍ptū raghu̱yā pari̍jman || 2.028.04 ||
वि मच्छ्र॑थाय रश॒नामि॒वाग॑ ऋ॒ध्याम॑ ते वरुण॒ खामृ॒तस्य॑ । मा तन्तु॑श्छेदि॒ वय॑तो॒ धियं॑ मे॒ मा मात्रा॑ शार्य॒पसः॑ पु॒र ऋ॒तोः ॥ २.०२८.०५ ॥
vi macchra̍thāya raśa̱nāmi̱vāga̍ ṛ̱dhyāma̍ te varuṇa̱ khāmṛ̱tasya̍ | mā tantu̍śchedi̱ vaya̍to̱ dhiya̍ṁ me̱ mā mātrā̍ śārya̱pasa̍ḥ pu̱ra ṛ̱toḥ || 2.028.05 ||
अपो॒ सु म्य॑क्ष वरुण भि॒यसं॒ मत्सम्रा॒ळृता॒वोऽनु॑ मा गृभाय । दामे॑व व॒त्साद्वि मु॑मु॒ग्ध्यंहो॑ न॒हि त्वदा॒रे नि॒मिष॑श्च॒नेशे॑ ॥ २.०२८.०६ ॥
apo̱ su mya̍kṣa varuṇa bhi̱yasa̱ṁ matsamrā̱ḻṛtā̱vo'nu̍ mā gṛbhāya | dāme̍va va̱tsādvi mu̍mu̱gdhyaṁho̍ na̱hi tvadā̱re ni̱miṣa̍śca̱neśe̍ || 2.028.06 ||
मा नो॑ व॒धैर्व॑रुण॒ ये त॑ इ॒ष्टावेनः॑ कृ॒ण्वन्त॑मसुर भ्री॒णन्ति॑ । मा ज्योति॑षः प्रवस॒थानि॑ गन्म॒ वि षू मृधः॑ शिश्रथो जी॒वसे॑ नः ॥ २.०२८.०७ ॥
mā no̍ va̱dhairva̍ruṇa̱ ye ta̍ i̱ṣṭāvena̍ḥ kṛ̱ṇvanta̍masura bhrī̱ṇanti̍ | mā jyoti̍ṣaḥ pravasa̱thāni̍ ganma̱ vi ṣū mṛdha̍ḥ śiśratho jī̱vase̍ naḥ || 2.028.07 ||
नमः॑ पु॒रा ते॑ वरुणो॒त नू॒नमु॒ताप॒रं तु॑विजात ब्रवाम । त्वे हि कं॒ पर्व॑ते॒ न श्रि॒तान्यप्र॑च्युतानि दूळभ व्र॒तानि॑ ॥ २.०२८.०८ ॥
nama̍ḥ pu̱rā te̍ varuṇo̱ta nū̱namu̱tāpa̱raṁ tu̍vijāta bravāma | tve hi ka̱ṁ parva̍te̱ na śri̱tānyapra̍cyutāni dūḻabha vra̱tāni̍ || 2.028.08 ||
पर॑ ऋ॒णा सा॑वी॒रध॒ मत्कृ॑तानि॒ माहं रा॑जन्न॒न्यकृ॑तेन भोजम् । अव्यु॑ष्टा॒ इन्नु भूय॑सीरु॒षास॒ आ नो॑ जी॒वान्व॑रुण॒ तासु॑ शाधि ॥ २.०२८.०९ ॥
para̍ ṛ̱ṇā sā̍vī̱radha̱ matkṛ̍tāni̱ māhaṁ rā̍janna̱nyakṛ̍tena bhojam | avyu̍ṣṭā̱ innu bhūya̍sīru̱ṣāsa̱ ā no̍ jī̱vānva̍ruṇa̱ tāsu̍ śādhi || 2.028.09 ||
यो मे॑ राज॒न्युज्यो॑ वा॒ सखा॑ वा॒ स्वप्ने॑ भ॒यं भी॒रवे॒ मह्य॒माह॑ । स्ते॒नो वा॒ यो दिप्स॑ति नो॒ वृको॑ वा॒ त्वं तस्मा॑द्वरुण पाह्य॒स्मान् ॥ २.०२८.१० ॥
yo me̍ rāja̱nyujyo̍ vā̱ sakhā̍ vā̱ svapne̍ bha̱yaṁ bhī̱rave̱ mahya̱māha̍ | ste̱no vā̱ yo dipsa̍ti no̱ vṛko̍ vā̱ tvaṁ tasmā̍dvaruṇa pāhya̱smān || 2.028.10 ||
माहं म॒घोनो॑ वरुण प्रि॒यस्य॑ भूरि॒दाव्न॒ आ वि॑दं॒ शून॑मा॒पेः । मा रा॒यो रा॑जन्सु॒यमा॒दव॑ स्थां बृ॒हद्व॑देम वि॒दथे॑ सु॒वीराः॑ ॥ २.०२८.११ ॥
māhaṁ ma̱ghono̍ varuṇa pri̱yasya̍ bhūri̱dāvna̱ ā vi̍da̱ṁ śūna̍mā̱peḥ | mā rā̱yo rā̍jansu̱yamā̱dava̍ sthāṁ bṛ̱hadva̍dema vi̱dathe̍ su̱vīrā̍ḥ || 2.028.11 ||
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
