उपे॑मसृक्षि वाज॒युर्व॑च॒स्यां चनो॑ दधीत ना॒द्यो गिरो॑ मे । अ॒पां नपा॑दाशु॒हेमा॑ कु॒वित्स सु॒पेश॑सस्करति॒ जोषि॑ष॒द्धि ॥ २.०३५.०१ ॥
upe̍masṛkṣi vāja̱yurva̍ca̱syāṁ cano̍ dadhīta nā̱dyo giro̍ me | a̱pāṁ napā̍dāśu̱hemā̍ ku̱vitsa su̱peśa̍saskarati̱ joṣi̍ṣa̱ddhi || 2.035.01 ||
इ॒मं स्व॑स्मै हृ॒द आ सुत॑ष्टं॒ मन्त्रं॑ वोचेम कु॒विद॑स्य॒ वेद॑त् । अ॒पां नपा॑दसु॒र्य॑स्य म॒ह्ना विश्वा॑न्य॒र्यो भुव॑ना जजान ॥ २.०३५.०२ ॥
i̱maṁ sva̍smai hṛ̱da ā suta̍ṣṭa̱ṁ mantra̍ṁ vocema ku̱vida̍sya̱ veda̍t | a̱pāṁ napā̍dasu̱rya̍sya ma̱hnā viśvā̍nya̱ryo bhuva̍nā jajāna || 2.035.02 ||
सम॒न्या यन्त्युप॑ यन्त्य॒न्याः स॑मा॒नमू॒र्वं न॒द्यः॑ पृणन्ति । तमू॒ शुचिं॒ शुच॑यो दीदि॒वांस॑म॒पां नपा॑तं॒ परि॑ तस्थु॒रापः॑ ॥ २.०३५.०३ ॥
sama̱nyā yantyupa̍ yantya̱nyāḥ sa̍mā̱namū̱rvaṁ na̱dya̍ḥ pṛṇanti | tamū̱ śuci̱ṁ śuca̍yo dīdi̱vāṁsa̍ma̱pāṁ napā̍ta̱ṁ pari̍ tasthu̱rāpa̍ḥ || 2.035.03 ||
तमस्मे॑रा युव॒तयो॒ युवा॑नं मर्मृ॒ज्यमा॑नाः॒ परि॑ य॒न्त्यापः॑ । स शु॒क्रेभिः॒ शिक्व॑भी रे॒वद॒स्मे दी॒दाया॑नि॒ध्मो घृ॒तनि॑र्णिग॒प्सु ॥ २.०३५.०४ ॥
tamasme̍rā yuva̱tayo̱ yuvā̍naṁ marmṛ̱jyamā̍nā̱ḥ pari̍ ya̱ntyāpa̍ḥ | sa śu̱krebhi̱ḥ śikva̍bhī re̱vada̱sme dī̱dāyā̍ni̱dhmo ghṛ̱tani̍rṇiga̱psu || 2.035.04 ||
अ॒स्मै ति॒स्रो अ॑व्य॒थ्याय॒ नारी॑र्दे॒वाय॑ दे॒वीर्दि॑धिष॒न्त्यन्न॑म् । कृता॑ इ॒वोप॒ हि प्र॑स॒र्स्रे अ॒प्सु स पी॒यूषं॑ धयति पूर्व॒सूना॑म् ॥ २.०३५.०५ ॥
a̱smai ti̱sro a̍vya̱thyāya̱ nārī̍rde̱vāya̍ de̱vīrdi̍dhiṣa̱ntyanna̍m | kṛtā̍ i̱vopa̱ hi pra̍sa̱rsre a̱psu sa pī̱yūṣa̍ṁ dhayati pūrva̱sūnā̍m || 2.035.05 ||
अश्व॒स्यात्र॒ जनि॑मा॒स्य च॒ स्व॑र्द्रु॒हो रि॒षः स॒म्पृचः॑ पाहि सू॒रीन् । आ॒मासु॑ पू॒र्षु प॒रो अ॑प्रमृ॒ष्यं नारा॑तयो॒ वि न॑श॒न्नानृ॑तानि ॥ २.०३५.०६ ॥
aśva̱syātra̱ jani̍mā̱sya ca̱ sva̍rdru̱ho ri̱ṣaḥ sa̱mpṛca̍ḥ pāhi sū̱rīn | ā̱māsu̍ pū̱rṣu pa̱ro a̍pramṛ̱ṣyaṁ nārā̍tayo̱ vi na̍śa̱nnānṛ̍tāni || 2.035.06 ||
स्व आ दमे॑ सु॒दुघा॒ यस्य॑ धे॒नुः स्व॒धां पी॑पाय सु॒भ्वन्न॑मत्ति । सो अ॒पां नपा॑दू॒र्जय॑न्न॒प्स्व॑न्तर्व॑सु॒देया॑य विध॒ते वि भा॑ति ॥ २.०३५.०७ ॥
sva ā dame̍ su̱dughā̱ yasya̍ dhe̱nuḥ sva̱dhāṁ pī̍pāya su̱bhvanna̍matti | so a̱pāṁ napā̍dū̱rjaya̍nna̱psva1̱̍ntarva̍su̱deyā̍ya vidha̱te vi bhā̍ti || 2.035.07 ||
यो अ॒प्स्वा शुचि॑ना॒ दैव्ये॑न ऋ॒तावाज॑स्र उर्वि॒या वि॒भाति॑ । व॒या इद॒न्या भुव॑नान्यस्य॒ प्र जा॑यन्ते वी॒रुध॑श्च प्र॒जाभिः॑ ॥ २.०३५.०८ ॥
yo a̱psvā śuci̍nā̱ daivye̍na ṛ̱tāvāja̍sra urvi̱yā vi̱bhāti̍ | va̱yā ida̱nyā bhuva̍nānyasya̱ pra jā̍yante vī̱rudha̍śca pra̱jābhi̍ḥ || 2.035.08 ||
अ॒पां नपा॒दा ह्यस्था॑दु॒पस्थं॑ जि॒ह्माना॑मू॒र्ध्वो वि॒द्युतं॒ वसा॑नः । तस्य॒ ज्येष्ठं॑ महि॒मानं॒ वह॑न्ती॒र्हिर॑ण्यवर्णाः॒ परि॑ यन्ति य॒ह्वीः ॥ २.०३५.०९ ॥
a̱pāṁ napā̱dā hyasthā̍du̱pastha̍ṁ ji̱hmānā̍mū̱rdhvo vi̱dyuta̱ṁ vasā̍naḥ | tasya̱ jyeṣṭha̍ṁ mahi̱māna̱ṁ vaha̍ntī̱rhira̍ṇyavarṇā̱ḥ pari̍ yanti ya̱hvīḥ || 2.035.09 ||
हिर॑ण्यरूपः॒ स हिर॑ण्यसंदृग॒पां नपा॒त्सेदु॒ हिर॑ण्यवर्णः । हि॒र॒ण्यया॒त्परि॒ योने॑र्नि॒षद्या॑ हिरण्य॒दा द॑द॒त्यन्न॑मस्मै ॥ २.०३५.१० ॥
hira̍ṇyarūpa̱ḥ sa hira̍ṇyasaṁdṛga̱pāṁ napā̱tsedu̱ hira̍ṇyavarṇaḥ | hi̱ra̱ṇyayā̱tpari̱ yone̍rni̱ṣadyā̍ hiraṇya̱dā da̍da̱tyanna̍masmai || 2.035.10 ||
तद॒स्यानी॑कमु॒त चारु॒ नामा॑पी॒च्यं॑ वर्धते॒ नप्तु॑र॒पाम् । यमि॒न्धते॑ युव॒तयः॒ समि॒त्था हिर॑ण्यवर्णं घृ॒तमन्न॑मस्य ॥ २.०३५.११ ॥
tada̱syānī̍kamu̱ta cāru̱ nāmā̍pī̱cya̍ṁ vardhate̱ naptu̍ra̱pām | yami̱ndhate̍ yuva̱taya̱ḥ sami̱tthā hira̍ṇyavarṇaṁ ghṛ̱tamanna̍masya || 2.035.11 ||
अ॒स्मै ब॑हू॒नाम॑व॒माय॒ सख्ये॑ य॒ज्ञैर्वि॑धेम॒ नम॑सा ह॒विर्भिः॑ । सं सानु॒ मार्ज्मि॒ दिधि॑षामि॒ बिल्मै॒र्दधा॒म्यन्नैः॒ परि॑ वन्द ऋ॒ग्भिः ॥ २.०३५.१२ ॥
a̱smai ba̍hū̱nāma̍va̱māya̱ sakhye̍ ya̱jñairvi̍dhema̱ nama̍sā ha̱virbhi̍ḥ | saṁ sānu̱ mārjmi̱ didhi̍ṣāmi̱ bilmai̱rdadhā̱myannai̱ḥ pari̍ vanda ṛ̱gbhiḥ || 2.035.12 ||
स ईं॒ वृषा॑जनय॒त्तासु॒ गर्भं॒ स ईं॒ शिशु॑र्धयति॒ तं रि॑हन्ति । सो अ॒पां नपा॒दन॑भिम्लातवर्णो॒ऽन्यस्ये॑वे॒ह त॒न्वा॑ विवेष ॥ २.०३५.१३ ॥
sa ī̱ṁ vṛṣā̍janaya̱ttāsu̱ garbha̱ṁ sa ī̱ṁ śiśu̍rdhayati̱ taṁ ri̍hanti | so a̱pāṁ napā̱dana̍bhimlātavarṇo̱'nyasye̍ve̱ha ta̱nvā̍ viveṣa || 2.035.13 ||
अ॒स्मिन्प॒दे प॑र॒मे त॑स्थि॒वांस॑मध्व॒स्मभि॑र्वि॒श्वहा॑ दीदि॒वांस॑म् । आपो॒ नप्त्रे॑ घृ॒तमन्नं॒ वह॑न्तीः स्व॒यमत्कैः॒ परि॑ दीयन्ति य॒ह्वीः ॥ २.०३५.१४ ॥
a̱sminpa̱de pa̍ra̱me ta̍sthi̱vāṁsa̍madhva̱smabhi̍rvi̱śvahā̍ dīdi̱vāṁsa̍m | āpo̱ naptre̍ ghṛ̱tamanna̱ṁ vaha̍ntīḥ sva̱yamatkai̱ḥ pari̍ dīyanti ya̱hvīḥ || 2.035.14 ||
अयां॑समग्ने सुक्षि॒तिं जना॒यायां॑समु म॒घव॑द्भ्यः सुवृ॒क्तिम् । विश्वं॒ तद्भ॒द्रं यदव॑न्ति दे॒वा बृ॒हद्व॑देम वि॒दथे॑ सु॒वीराः॑ ॥ २.०३५.१५ ॥
ayā̍ṁsamagne sukṣi̱tiṁ janā̱yāyā̍ṁsamu ma̱ghava̍dbhyaḥ suvṛ̱ktim | viśva̱ṁ tadbha̱draṁ yadava̍nti de̱vā bṛ̱hadva̍dema vi̱dathe̍ su̱vīrā̍ḥ || 2.035.15 ||
AnonymousUser
150
5 Days
Learn
Teach
Discuss
Dashboard
Verses & Playlist
Saved Flashcards
Saved Chants
Saved Discussions
Logout
Copy Shloka
Shloka Link
