वायो॒ ये ते॑ सह॒स्रिणो॒ रथा॑स॒स्तेभि॒रा ग॑हि । नि॒युत्वा॒न्सोम॑पीतये ॥ २.०४१.०१ ॥
vāyo̱ ye te̍ saha̱sriṇo̱ rathā̍sa̱stebhi̱rā ga̍hi | ni̱yutvā̱nsoma̍pītaye || 2.041.01 ||
नि॒युत्वा॑न्वाय॒वा ग॑ह्य॒यं शु॒क्रो अ॑यामि ते । गन्ता॑सि सुन्व॒तो गृ॒हम् ॥ २.०४१.०२ ॥
ni̱yutvā̍nvāya̱vā ga̍hya̱yaṁ śu̱kro a̍yāmi te | gantā̍si sunva̱to gṛ̱ham || 2.041.02 ||
शु॒क्रस्या॒द्य गवा॑शिर॒ इन्द्र॑वायू नि॒युत्व॑तः । आ या॑तं॒ पिब॑तं नरा ॥ २.०४१.०३ ॥
śu̱krasyā̱dya gavā̍śira̱ indra̍vāyū ni̱yutva̍taḥ | ā yā̍ta̱ṁ piba̍taṁ narā || 2.041.03 ||
अ॒यं वां॑ मित्रावरुणा सु॒तः सोम॑ ऋतावृधा । ममेदि॒ह श्रु॑तं॒ हव॑म् ॥ २.०४१.०४ ॥
a̱yaṁ vā̍ṁ mitrāvaruṇā su̱taḥ soma̍ ṛtāvṛdhā | mamedi̱ha śru̍ta̱ṁ hava̍m || 2.041.04 ||
राजा॑ना॒वन॑भिद्रुहा ध्रु॒वे सद॑स्युत्त॒मे । स॒हस्र॑स्थूण आसाते ॥ २.०४१.०५ ॥
rājā̍nā̱vana̍bhidruhā dhru̱ve sada̍syutta̱me | sa̱hasra̍sthūṇa āsāte || 2.041.05 ||
ता स॒म्राजा॑ घृ॒तासु॑ती आदि॒त्या दानु॑न॒स्पती॑ । सचे॑ते॒ अन॑वह्वरम् ॥ २.०४१.०६ ॥
tā sa̱mrājā̍ ghṛ̱tāsu̍tī ādi̱tyā dānu̍na̱spatī̍ | sace̍te̱ ana̍vahvaram || 2.041.06 ||
गोम॑दू॒ षु ना॑स॒त्याश्वा॑वद्यातमश्विना । व॒र्ती रु॑द्रा नृ॒पाय्य॑म् ॥ २.०४१.०७ ॥
goma̍dū̱ ṣu nā̍sa̱tyāśvā̍vadyātamaśvinā | va̱rtī ru̍drā nṛ̱pāyya̍m || 2.041.07 ||
न यत्परो॒ नान्त॑र आद॒धर्ष॑द्वृषण्वसू । दुः॒शंसो॒ मर्त्यो॑ रि॒पुः ॥ २.०४१.०८ ॥
na yatparo̱ nānta̍ra āda̱dharṣa̍dvṛṣaṇvasū | du̱ḥśaṁso̱ martyo̍ ri̱puḥ || 2.041.08 ||
ता न॒ आ वो॑lहमश्विना र॒यिं पि॒शङ्ग॑संदृशम् । धिष्ण्या॑ वरिवो॒विद॑म् ॥ २.०४१.०९ ॥
tā na̱ ā vo̍ḻhamaśvinā ra̱yiṁ pi̱śaṅga̍saṁdṛśam | dhiṣṇyā̍ varivo̱vida̍m || 2.041.09 ||
इन्द्रो॑ अ॒ङ्ग म॒हद्भ॒यम॒भी षदप॑ चुच्यवत् । स हि स्थि॒रो विच॑र्षणिः ॥ २.०४१.१० ॥
indro̍ a̱ṅga ma̱hadbha̱yama̱bhī ṣadapa̍ cucyavat | sa hi sthi̱ro vica̍rṣaṇiḥ || 2.041.10 ||
इन्द्र॑श्च मृ॒ळया॑ति नो॒ न नः॑ प॒श्चाद॒घं न॑शत् । भ॒द्रं भ॑वाति नः पु॒रः ॥ २.०४१.११ ॥
indra̍śca mṛ̱ḻayā̍ti no̱ na na̍ḥ pa̱ścāda̱ghaṁ na̍śat | bha̱draṁ bha̍vāti naḥ pu̱raḥ || 2.041.11 ||
इन्द्र॒ आशा॑भ्य॒स्परि॒ सर्वा॑भ्यो॒ अभ॑यं करत् । जेता॒ शत्रू॒न्विच॑र्षणिः ॥ २.०४१.१२ ॥
indra̱ āśā̍bhya̱spari̱ sarvā̍bhyo̱ abha̍yaṁ karat | jetā̱ śatrū̱nvica̍rṣaṇiḥ || 2.041.12 ||
विश्वे॑ देवास॒ आ ग॑त शृणु॒ता म॑ इ॒मं हव॑म् । एदं ब॒र्हिर्नि षी॑दत ॥ २.०४१.१३ ॥
viśve̍ devāsa̱ ā ga̍ta śṛṇu̱tā ma̍ i̱maṁ hava̍m | edaṁ ba̱rhirni ṣī̍data || 2.041.13 ||
ती॒व्रो वो॒ मधु॑माँ अ॒यं शु॒नहो॑त्रेषु मत्स॒रः । ए॒तं पि॑बत॒ काम्य॑म् ॥ २.०४१.१४ ॥
tī̱vro vo̱ madhu̍mā a̱yaṁ śu̱naho̍treṣu matsa̱raḥ | e̱taṁ pi̍bata̱ kāmya̍m || 2.041.14 ||
इन्द्र॑ज्येष्ठा॒ मरु॑द्गणा॒ देवा॑सः॒ पूष॑रातयः । विश्वे॒ मम॑ श्रुता॒ हव॑म् ॥ २.०४१.१५ ॥
indra̍jyeṣṭhā̱ maru̍dgaṇā̱ devā̍sa̱ḥ pūṣa̍rātayaḥ | viśve̱ mama̍ śrutā̱ hava̍m || 2.041.15 ||
अम्बि॑तमे॒ नदी॑तमे॒ देवि॑तमे॒ सर॑स्वति । अ॒प्र॒श॒स्ता इ॑व स्मसि॒ प्रश॑स्तिमम्ब नस्कृधि ॥ २.०४१.१६ ॥
ambi̍tame̱ nadī̍tame̱ devi̍tame̱ sara̍svati | a̱pra̱śa̱stā i̍va smasi̱ praśa̍stimamba naskṛdhi || 2.041.16 ||
त्वे विश्वा॑ सरस्वति श्रि॒तायूं॑षि दे॒व्याम् । शु॒नहो॑त्रेषु मत्स्व प्र॒जां दे॑वि दिदिड्ढि नः ॥ २.०४१.१७ ॥
tve viśvā̍ sarasvati śri̱tāyū̍ṁṣi de̱vyām | śu̱naho̍treṣu matsva pra̱jāṁ de̍vi didiḍḍhi naḥ || 2.041.17 ||
इ॒मा ब्रह्म॑ सरस्वति जु॒षस्व॑ वाजिनीवति । या ते॒ मन्म॑ गृत्सम॒दा ऋ॑तावरि प्रि॒या दे॒वेषु॒ जुह्व॑ति ॥ २.०४१.१८ ॥
i̱mā brahma̍ sarasvati ju̱ṣasva̍ vājinīvati | yā te̱ manma̍ gṛtsama̱dā ṛ̍tāvari pri̱yā de̱veṣu̱ juhva̍ti || 2.041.18 ||
प्रेतां॑ य॒ज्ञस्य॑ श॒म्भुवा॑ यु॒वामिदा वृ॑णीमहे । अ॒ग्निं च॑ हव्य॒वाह॑नम् ॥ २.०४१.१९ ॥
pretā̍ṁ ya̱jñasya̍ śa̱mbhuvā̍ yu̱vāmidā vṛ̍ṇīmahe | a̱gniṁ ca̍ havya̱vāha̍nam || 2.041.19 ||
द्यावा॑ नः पृथि॒वी इ॒मं सि॒ध्रम॒द्य दि॑वि॒स्पृश॑म् । य॒ज्ञं दे॒वेषु॑ यच्छताम् ॥ २.०४१.२० ॥
dyāvā̍ naḥ pṛthi̱vī i̱maṁ si̱dhrama̱dya di̍vi̱spṛśa̍m | ya̱jñaṁ de̱veṣu̍ yacchatām || 2.041.20 ||
आ वा॑मु॒पस्थ॑मद्रुहा दे॒वाः सी॑दन्तु य॒ज्ञियाः॑ । इ॒हाद्य सोम॑पीतये ॥ २.०४१.२१ ॥
ā vā̍mu̱pastha̍madruhā de̱vāḥ sī̍dantu ya̱jñiyā̍ḥ | i̱hādya soma̍pītaye || 2.041.21 ||
AnonymousUser
150
5 Days
Learn
Teach
Discuss
Dashboard
Verses & Playlist
Flashcards
Saved Chants
Saved Discussions
Logout
Copy Shloka
Shloka Link
