Gyaandweep | Rig Veda Mandala , 3

अ॒ग्निर्होता॑ पु॒रोहि॑तोऽध्व॒रस्य॒ विच॑र्षणिः । स वे॑द य॒ज्ञमा॑नु॒षक् ॥ ३.०११.०१ ॥

a̱gnirhotā̍ pu̱rohi̍to'dhva̱rasya̱ vica̍rṣaṇiḥ | sa ve̍da ya̱jñamā̍nu̱ṣak || 3.011.01 ||

स ह॑व्य॒वाळम॑र्त्य उ॒शिग्दू॒तश्चनो॑हितः । अ॒ग्निर्धि॒या समृ॑ण्वति ॥ ३.०११.०२ ॥

sa ha̍vya̱vāḻama̍rtya u̱śigdū̱taścano̍hitaḥ | a̱gnirdhi̱yā samṛ̍ṇvati || 3.011.02 ||

अ॒ग्निर्धि॒या स चे॑तति के॒तुर्य॒ज्ञस्य॑ पू॒र्व्यः । अर्थं॒ ह्य॑स्य त॒रणि॑ ॥ ३.०११.०३ ॥

a̱gnirdhi̱yā sa ce̍tati ke̱turya̱jñasya̍ pū̱rvyaḥ | artha̱ṁ hya̍sya ta̱raṇi̍ || 3.011.03 ||

अ॒ग्निं सू॒नुं सन॑श्रुतं॒ सह॑सो जा॒तवे॑दसम् । वह्निं॑ दे॒वा अ॑कृण्वत ॥ ३.०११.०४ ॥

a̱gniṁ sū̱nuṁ sana̍śruta̱ṁ saha̍so jā̱tave̍dasam | vahni̍ṁ de̱vā a̍kṛṇvata || 3.011.04 ||

अदा॑भ्यः पुरए॒ता वि॒शाम॒ग्निर्मानु॑षीणाम् । तूर्णी॒ रथः॒ सदा॒ नवः॑ ॥ ३.०११.०५ ॥

adā̍bhyaḥ purae̱tā vi̱śāma̱gnirmānu̍ṣīṇām | tūrṇī̱ ratha̱ḥ sadā̱ nava̍ḥ || 3.011.05 ||

सा॒ह्वान्विश्वा॑ अभि॒युजः॒ क्रतु॑र्दे॒वाना॒ममृ॑क्तः । अ॒ग्निस्तु॒विश्र॑वस्तमः ॥ ३.०११.०६ ॥

sā̱hvānviśvā̍ abhi̱yuja̱ḥ kratu̍rde̱vānā̱mamṛ̍ktaḥ | a̱gnistu̱viśra̍vastamaḥ || 3.011.06 ||

अ॒भि प्रयां॑सि॒ वाह॑सा दा॒श्वाँ अ॑श्नोति॒ मर्त्यः॑ । क्षयं॑ पाव॒कशो॑चिषः ॥ ३.०११.०७ ॥

a̱bhi prayā̍ṁsi̱ vāha̍sā dā̱śvā a̍śnoti̱ martya̍ḥ | kṣaya̍ṁ pāva̱kaśo̍ciṣaḥ || 3.011.07 ||

परि॒ विश्वा॑नि॒ सुधि॑ता॒ग्नेर॑श्याम॒ मन्म॑भिः । विप्रा॑सो जा॒तवे॑दसः ॥ ३.०११.०८ ॥

pari̱ viśvā̍ni̱ sudhi̍tā̱gnera̍śyāma̱ manma̍bhiḥ | viprā̍so jā̱tave̍dasaḥ || 3.011.08 ||

अग्ने॒ विश्वा॑नि॒ वार्या॒ वाजे॑षु सनिषामहे । त्वे दे॒वास॒ एरि॑रे ॥ ३.०११.०९ ॥

agne̱ viśvā̍ni̱ vāryā̱ vāje̍ṣu saniṣāmahe | tve de̱vāsa̱ eri̍re || 3.011.09 ||

Languages