Gyaandweep | Rig Veda Mandala , 3

इन्द्रा॑ग्नी॒ आ ग॑तं सु॒तं गी॒र्भिर्नभो॒ वरे॑ण्यम् । अ॒स्य पा॑तं धि॒येषि॒ता ॥ ३.०१२.०१ ॥

indrā̍gnī̱ ā ga̍taṁ su̱taṁ gī̱rbhirnabho̱ vare̍ṇyam | a̱sya pā̍taṁ dhi̱yeṣi̱tā || 3.012.01 ||

इन्द्रा॑ग्नी जरि॒तुः सचा॑ य॒ज्ञो जि॑गाति॒ चेत॑नः । अ॒या पा॑तमि॒मं सु॒तम् ॥ ३.०१२.०२ ॥

indrā̍gnī jari̱tuḥ sacā̍ ya̱jño ji̍gāti̱ ceta̍naḥ | a̱yā pā̍tami̱maṁ su̱tam || 3.012.02 ||

इन्द्र॑म॒ग्निं क॑वि॒च्छदा॑ य॒ज्ञस्य॑ जू॒त्या वृ॑णे । ता सोम॑स्ये॒ह तृ॑म्पताम् ॥ ३.०१२.०३ ॥

indra̍ma̱gniṁ ka̍vi̱cchadā̍ ya̱jñasya̍ jū̱tyā vṛ̍ṇe | tā soma̍sye̱ha tṛ̍mpatām || 3.012.03 ||

तो॒शा वृ॑त्र॒हणा॑ हुवे स॒जित्वा॒नाप॑राजिता । इ॒न्द्रा॒ग्नी वा॑ज॒सात॑मा ॥ ३.०१२.०४ ॥

to̱śā vṛ̍tra̱haṇā̍ huve sa̱jitvā̱nāpa̍rājitā | i̱ndrā̱gnī vā̍ja̱sāta̍mā || 3.012.04 ||

प्र वा॑मर्चन्त्यु॒क्थिनो॑ नीथा॒विदो॑ जरि॒तारः॑ । इन्द्रा॑ग्नी॒ इष॒ आ वृ॑णे ॥ ३.०१२.०५ ॥

pra vā̍marcantyu̱kthino̍ nīthā̱vido̍ jari̱tāra̍ḥ | indrā̍gnī̱ iṣa̱ ā vṛ̍ṇe || 3.012.05 ||

इन्द्रा॑ग्नी नव॒तिं पुरो॑ दा॒सप॑त्नीरधूनुतम् । सा॒कमेके॑न॒ कर्म॑णा ॥ ३.०१२.०६ ॥

indrā̍gnī nava̱tiṁ puro̍ dā̱sapa̍tnīradhūnutam | sā̱kameke̍na̱ karma̍ṇā || 3.012.06 ||

इन्द्रा॑ग्नी॒ अप॑स॒स्पर्युप॒ प्र य॑न्ति धी॒तयः॑ । ऋ॒तस्य॑ प॒थ्या॒॑ अनु॑ ॥ ३.०१२.०७ ॥

indrā̍gnī̱ apa̍sa̱sparyupa̱ pra ya̍nti dhī̱taya̍ḥ | ṛ̱tasya̍ pa̱thyā̱3̱̍ anu̍ || 3.012.07 ||

इन्द्रा॑ग्नी तवि॒षाणि॑ वां स॒धस्था॑नि॒ प्रयां॑सि च । यु॒वोर॒प्तूर्यं॑ हि॒तम् ॥ ३.०१२.०८ ॥

indrā̍gnī tavi̱ṣāṇi̍ vāṁ sa̱dhasthā̍ni̱ prayā̍ṁsi ca | yu̱vora̱ptūrya̍ṁ hi̱tam || 3.012.08 ||

इन्द्रा॑ग्नी रोच॒ना दि॒वः परि॒ वाजे॑षु भूषथः । तद्वां॑ चेति॒ प्र वी॒र्य॑म् ॥ ३.०१२.०९ ॥

indrā̍gnī roca̱nā di̱vaḥ pari̱ vāje̍ṣu bhūṣathaḥ | tadvā̍ṁ ceti̱ pra vī̱rya̍m || 3.012.09 ||

Languages